LIH HU 26
26
Nyiex Gox Bwan Man
(Lih 36:8-38)
1 #
Lih 36:8-19
“Lheu khaing an maix tak yuh nyiex gox bwan man, ka man tie kao pheen pa hoik taing ka keei ceu pa mhawm pa klai raoma mai pa lung pliex mai pa raoh rawt khawmuik maix yuh ti sau riang Cherubin pa mhawm khaix taix ka piang an. 2Man tie tix pheen kieh lang tixnga daix sawk, plak vieh pon sawk. man tie an ku pheen kieh sidu paox tix. 3Man tie an phwan pheen caing kleuk paox tix mawh tix pheen, mai pa deuk an phwan pheen kawx caing kleuk paox tix mawh tix pheen. 4Maix tak yuh daux jhup maox koe ka praok man tie ka man pa klai raoma see dee sitoe kix ti caing ku pheen, awm an maix tak deeh yuh nawh ka daog plak praix man tie an tix mu, sonsang sitoe man ra pheen mawh tix mu. 5Maix tak yuh daux jhup maox koe tixphwan mu, ka man tie an tix mu mai deeh yuh daux jhup maox koe tixphwan mu ka daog man tie an ra mu tix mu, sonsang sitoe daux jhup man an kix ti kab tix tau. 6Maix tak yuh grok khri tixphwan mu mai vhak man tie an kix tau ka grok khri kieh kleuk paox tix, sonsang mawh nyiex gox bwan man tix lhang. 7“Maix tak yuh man tawb kao tix pheen ka hak pex, son sang lhop ka piang nyiex gox bwan man. 8Man tie tix pheen kieh lang tixngoe sawk mai plak vieh pon sawk, man tie ankix kao tix pheen kieh sidu paox tix. 9Maix tak kleuk man tie an phwan pheen tau mai man tie an liah pheen tau, maix tak niiep ti deuh man tie liah pheen an ka sivoe nyiex gox bwan man heue. 10Ka daog man tie an tix pheen maix tak yuh daux jhup man koe tixphwan daux mai ka daog man tie an ra pheen tix pheen yuh daux jhup man koe tixphwan daux. 11“Maix tak yuh grok tawng lheung tixphwan mu mai vhak ankix ka daux jhup man khankix mai kleuk an ka piang kieh mawh nyiex gox bwan man tix lhang. 12Toh man pa kawn deuk ka piang nyiex gox bwan man an tix plak, kieh teuk teue tix lih ka plak khaix nyiex gox bwan man. 13Man tawb nyiex gox bwan pa lheu khaing plak piang ra sawk, sonsang tawb nyiex gox bwan man kieh teuk teue tix ka praok nyiex gox bwan man tix plak tix sawk. 14Maix tak yuh pa tawb nyiex gox bwan man ka hak yung pa hoik siang tix raoh mai hak phix khankix ka piang hauk yung. 15“Maix tak yuh ding jung nyiex gox bwan man ka khaox phia Akashax. 16Krax lang phia kieh koe kao sawk, krax vieh tix sawk mai tix diex. 17Phia ku plah, tak koe caong ra mu deeh sau kleuk paox tix, mawh kheu nan maix tak yuh nyiex gox bwan man an ka phia khawmuik. 18Maix tak yuh phia ding son nyiex gox bwan man plak seh koe tixnga plah, 19Maix tak yuh jhup jaong mau pa sang jhup ka jaong phia tixpon mu, phia ku plak kieh koe daux jhup ra dah, 20awm an maix tak yuh phia ding nyiex gox bwan man, plak laong koe tixnga plah, 21Maix tak yuh jhup jaong mau tixpon mu, son sang jhup jaong phia tix plah ra mu. 22Maix tak yuh phia ding nyiex gox bwan man son plak klip singaix koe liah plah. 23Maix tak yuh phia ding ra plah son daog nyiex gox bwan man an, ka plak khaix ra dah, 24kix sau jhup ka plak caong mai ka plak piang kieh sidu paox tix, mawh kheu nan, an tak mawh son daog khawm ra plak, 25phia daix plah, jhup jaong mau koe kao liah mu, phia tix plah koe daux jhup jaong ra dah. 26“Maix tak yuh lat pa lang ka khaox Akashax, sonsang sau ka jhup phia pa koe praok nyiex gox bwan man an tix plak phwan gawng. 27Maix tak yuh lat pa lang sonsang sau ka jhup phia, plak khaix nyiex gox bwan man phwan gawng. 28Lat pa koe sigreung, tak kieh laig daux jhup phia, jah ka toh plak in tom hoek ka toh plak an. 29Maix tak om phia ankix ka khri mai yuh daux jhup maox ka khri, sonsang giex lat kaux, mai om lat ka khri. 30Maix tak yaox ti sum nyiex gox bwan man, awm grang pa hoik jhi ka maix ka piang gawng. 31#Lih 36:35-38“Maix tak yuh man pa tie ka keei klai raoma, keei lung pliex mai keei pa raoh rawt pa hoik taing ka keei ceu pa mhawm, mai yuh ti sau riang Cherubin pa mhawm khaix taix ka piang an, 32Maix tak vhak man tie an ka rong khaox Akashax pon gawng pa hoik om ka khri, ka rong khaox an tak koe grok khri mai jhup jaong mau pon mu. 33Maix tak vhak man tie an ka rong khaox grok khri, khaix an maix tak viex khui pa kham sakse laig tan ka plak khaix man tie an, man tie an tak mawh pa khan sinax, dee singax mai ka dee kied blon singax. 34Maix tak sau dawb khui krax pa caux rhawm an ka piang khui bwan pa kham sakse ka daux dee pa kied blon singax. 35Maix tak deuh pheen ka plak praix man tieb an, ka praok plak laong. deuh pang jawk ten khri tix plak ka praok nyiex gox bwan man ka plak seh mai kieh see paox tix. 36“Maix tak yuh man tie diang siviex laig daux nyiex gox bwan man tix pheen ka keei pa klai raoma mai keei pa lung pliex mai keei pa raoh rawt pa taing ka keei ceu pa mhawm khaing cao pa taing man. 37Maix tak yuh rong Akashax phwan rong, son man tie diang siviex an om ka khri mai grok khri ka piang. Maix tak baox deeh yuh daux jhup jaong phwan daux ka tawng lheung son an kix heue.
Wa Common Language Bible © Bible Society of Myanmar, 2012