LIH HU 19
19
Gawng Sina
1Khaix hoik lih hu pui Isarelax khankix khaing haktiex Ejiptux, ka daux khix loe tix ngaix, kix hoek ka daux tiag Sina. 2Khaix hoik lih kix khaing Rephidim mai hoek ka tiag Sina, kix bang ka daux tiag tan, pui Isarelax khankix bang hawt sivoe gawng an, 3Mose haok ka Siyiex mai Siyiex kok nawh khaing piang gawng ah nin, “Maix tak yaox ti krai ka nyiex ma Yakop mai ka pui Isarelax” 4“Pex hoik sax yaox pa hoik yuh Aux ka pui Ejiptux mai tokaux Aux hoik viex pex lih khaing Ejiptux awm viex klang krih kawn tix ka piang pruik tix.” 5“Phan pex cu nghiet ka gumlox Aux mai priex gumlox sijax mukheu Aux, pex tak mawh sinngao cie Aux sinax pui khawmuik, #Pi 4:20, 7:6, 14:2, 21, 26:18, 19; Ti 2:14; 1Pe 2:9 mawh kheu can pa koe ka piang haktiex khawmuik mawh cie Aux.” 6“Pex tak mawh simiang cao giex kaing li#Jhi 1:6, 5:10 khankix mai mawh ceu pui pa singax singeh ka Aux, inkix mawh gumlox pa sang krai maix ka kawn praix Isarelax khankix, ” 7Mose deeh hoek mai kok kuad song cao kaing pui khankix mai krai gumlox pa hoik tawx Siyiex ka nawh ka plak sivoe ngai kix. 8Pui khawmuik deeh pawk lox tix dum tau ah nin, “Ex tak sang yuh awm lox pa hoik krai Siyiex leeing ju khawmuik. “Mose viex gumlox krai pui khankix hu ka Siyiex. 9Siyiex ah nin ka Mose, “Jhak heue, Aux tak hoek ka maix, ka dee kied pu ceep paiawm, sonsang mhong pui yam sikah Aux ka maix mai yum rhawm ka maix leeing ju. Mawh kheu nan, Mose deeh krai gumlox pa ah kawn pui ka Siyiex. 10Khaix an Siyiex ah nin ka Mose, “Hu ka pui khankix mai kieh kix singax singeh daux singaix mai pasax mai kieh kix sidaux kraung tix, 11yam hoek daux loe singaix kieh kix khre rien ti, mawh kheu yam hoek daux loe singaix, Siyiex tak lih hoek ka piang gawng Sina, ka sivoe ngai kawn pui khawmuik.” 12Maix tak yuh mee hawt vung viang gawng ah nin, yuh satix pex paw luan khaing mee mai paw haok ka piang gawng mai teeh ka caong gawng, pui mawx ang ah pa teeh ka gawng tak kieh nawh yum tete.” 13“Pie taix kawx tak ang pon ti teeh, tak caw ti dheem nawh ka simaox. Phan ang mawh nan puing nawh yum ka te, pui ang ah, to brie ang ah, tak ang yaox ti im#He 12:18-20 Yam mhong luah lox teettawng tom rheung, kix tak yaox ti hoek dex gawng.” 14Mose lih hoek khaing piang gawng ka pui khankix, kieh pui singax mai kieh kix sidaux kraung tix, 15Nawh ah nin ka pui khankix, “Yam hoek daux loe singaix kieh kix khre rien tix paw kieh kix dex mai bun.” 16Yam hoek daux loe singaix plak ponngawb, lox tuh sah mai puk plak praix#Jhi 4:5 lih mai paiawm pa kied pu ceep ka piang gawng mai Lox pa kied ting sinum teet tawng lih, mawh kheu nan, pui pa ot ka daux nyiex bang kied lhat graung ka tete. 17Mose viex pui khankix lih khaing daux nyiex bang, sonsang yaox ka Siyiex, mai kix cung hawt caong gawng. 18Gawng Sina hoik naog ka taox ngu, mawh kheu Siyiex lih hoek ka piang gawng ka daux sinax ngu, #Pi 4:11-12 taox ngu an awm taox ngu pa kaoh khaing daux glah ngu mai gawng an hoik yung yang khawmuik. 19Yam sinum luah lox teettawng tom rheung mai nie baox nied ti ting sipie, Mose sikah mai Siyiex mai Nawh Cao pawk ka lox nawh ka daux sinum praix. 20Siyiex lih hoek ka piang choek gawng Sina. Siyiex kok Mose ka piang choek gawng mai Mose kawx haok. 21Siyiex ah nin ka Mose, “Lih hu mai tawx lox kieh pui rien rhawm tix, Aux lhat kix breeng tix laig, sonsang jhak ka Siyiex leeing ju mai pui khankix tak laux leeing tom nie.” 22“Cao giex kaing li pa hoek dex Siyiex leeing ju khankix kawx, kieh kix yuh tokaux tix singax, phan ang mawh nan, Siyiex tak kieh kix laux leeing.” 23Mose deeh ah nin ka Siyiex, “Pui khankix ang lai pon haok ka piang gawng Sina, kheu Maix Cao hoik tawx krax rien rhawm ah nin ka yix, yuh mee vie hawt vung viang gawng mai kieh gawng singax, ” 24Siyiex deeh ah nin ka Mose, “Lih hu mai deeh viex Arun haok tau mai maix, viang mawh nan, paw kieh cao giex kaing li mai pui khankix, breeng ti haok ka Siyiex, mawh kheu Aux lhat kix hoek krax laux leeing.” 25Mose lih hu ka pui khankix mai krai ka kix heue.
Currently Selected:
LIH HU 19: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
