LIH HU 17
17
Rawm Khaing Daux Rang
1Cub pui hun Isarelax lih khaing daux tiag baoh haktiex Sin awm gumlox pa hoik tawm Siyiex, kix hu bang ka daux Rephidim, dee an rawm ang koe sonsang nyaux pui rawm. 2Pui khankix simah ka Mose ah nin, “Tawx yix nyaux rawm, ” “mai Mose ah nin ka kix, ” “Pex lai simah mai aux yuh ka mawx? Pex lai cheuk cheu ka Siyiex yuh ka mawx?” 3#Lih 14:12, 16:3Pui khankix kied sang nyaux nie rawm mai ngau simah ka Mose ah nin, “Maix lai viex yix lih khaing Ejiptux, sonsang pah ti yix mai kawn praix yix mai khawng brie yix tau ka daux pa simie ti nyaux nie rawm yuh ka mawx?” 4Mose riag yo ka Siyiex, “Aux sang yuh ka mawx ka pui inkix? Kix dex sang dheem aux ka simaox.” 5Siyiex ah nin ka Mose, “Lih hu sivoe pui khankix mai kok kuad song pui Isarelax, mai viex khaox grix pa koe daux taix maix pa hoik lah maix rawm klawng Nilax ka mai lih hu. 6Aux tak cung plak sivoe maix tan, ka piang rang baoh Hawrap, maix tak lah ka rang an mai rawm tak lih khaing daux an, sonsang pon nyaux pui heue. “Mose yuh awm an ka sivoe ngai kuad song pui Isarelax khankix. 7Nawh kok ceu kaux dee an mawh Masa mai Meribax, mawh kheu pui Isarelax khankix simah mai cheuk cheu ka Siyiex ah nin, “Ot Siyiex sinax yix lie? Phan ang mawh nan ang ot lie?”#Si 20:2-13
Pex Pui Amaliet
8Pui Amaliet hoek mai puing ka pui Isarelax ka baoh Rephidim. 9Mose ah nin ka Yawsux, “Laug pui khankix ka son ex mai hu puing ka pui Amaliet, pasax aux tak cung ka piang choek gawng tau mai khaox grix Siyiex ka daux taix tix.” 10Yawsux yuh awm pa ah Mose mai puing ka pui Amaliet, Mose, Arun mai Hurax haok ka piang choek gawng. 11Yam yaog Mose taix tix, pui Isarelax pex ka mai yam nyah nawh taix tix, pui Amaliet pex kah. 12Mawh kheu hoik meue taix Mose, kix tom teei simaox tix mu mai deuh ka greem nawh mai nawh ngawm ka piang an. Arun mai Hurax joh taix nawh tix plak tix kaux tom klip singaix. 13Yawsux pah ka simiang Amaliet mai pui nawh khankix yum ka lawm vaig. 14Siyiex ah nin ka Mose, “Tiiem ti deuh in ka daux phuk lai, sonsang mawh pa doh keud ka mai phat Yawsux mhong, Aux tak preet ti tik ceu kaux pui Amaliet khaing greem raoma.”#Pi 25:17-19; 1Sa 15:2-9 15Mose sum khu dee tan mai kok ceu kaux mawh Yahowanitsi, dee blee mawh Siyiex cao pa pex. 16Taix Siyiex Cao pa pex ah nin, “Siyiex tak yuh naing ka pui Amaliet tix ju hoik tix ju heue.”
Currently Selected:
LIH HU 17: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
