AMOT 5
5
Khi Rhawm Son Pui Isarelax
1Nyiex ma ceu pui Isarelax khankix eue, nghiet ka gumlox in, pa teei Aux ti ah ka piang pex, pa mawh lox rhax khi rhawm in heue. 2Bunkrih Isarelax hoik goh mai ang lai pon yaog ti kaoh khaix in tix bawg kawx heue. Nawh sigrub tix ka piang tiex pui pa sang deeh yaog nawh kaoh ang lai koe tix kaux kawx heue. 3Grawh grawng nawh Siyiex, ah nin, “Viang pui khankix lih hu tix rheng kawx, tak sang deuk ngie pui tiyieh kaux mai pui pa lih hu khankix tiyieh kaux, tak sang deuk ngie pui kao kaux son nyiex ma ceu pui Isarelax heue.
Kok Yo Son Krax Doh Keud
4Mawh kheu Siyiex ah nin ka nyiex ma ceu pui Isarelax khankix, “Pex sawg ti yaox Aux, tak koe krax im ju kah heue.” 5Paw lai sawg ti yaox veng Betelax, paw lai laig ka daux veng Gilagalax, paw lai tiang ti hu ka veng Beshabax, grawh grawng nawh, veng Gilagalax, tak sang mawh pa rhim ti hu mai veng Betelax tak sang hoek krax pa ang lai mawh tidtix heue. 6Sawg ka Siyiex mai tak koe krax im ju kah heue. Phan ang yuh nan, Nawh Cao tak lih awm ngu ka daux nyiex ma Yosiep mai gleeing ka veng Betelax tom ang lai koe pui pa pon preet ka tix kaux kawx heue. 7Pex pa kieh krax pa rahsee deeh tieh ti mawh lhax sup mai pa tik krax pa rahsee ka piang tiex khakix, 8Sawg Nawh Cao pa hoik yuh cub simuing sigiang bo#Bax 9:9, 38:31 mai cub simuing grawng lat, pa tieh veei pa yum mawh krax jhan riang plak ponngawb mai kieh plak ponngaix faik awm plak ponsawm, pa kok rawm sigrit sigra khankix mai see lih ka piang ca haktiex, Siyiex mawh ceu kaux Nawh Cao heue. 9Nawh Cao tawx krax pa laux leeing hoek ka piang pui pa koe riang rao, tom sidah laux leeing nyiex tab lhaong heue. 10Kix koeng ka pui pa sidiex gau pa ot ka daux diang siviex veng mai kix seeing ka pui pa sikah lox pa rahsee heue. 11Mawh kheu dig pex pui hot shia mai rhim ti teei gha nghox koi khaing kix, viang pex hoik sum ti ot nyiex ka lon simaox pa hoik saik tix kawx mai pex tak ang lai yaox ti ot ka daux ankix, viang pex hoik sum ti cie sipeem plix siiet pa mhawm kawx mai pex tak ang lai yaox ti nyaux rawm plix siiet ankix heue. 12Grawh grawng nawh Aux tawng ka krax phit krax lud pa hoik yuh pex khankix nie khaing nie mai khawm ka phimap pa kied ting kied lhaong pex heue. Pex yuh krax kin ka pui pa rahsee mai teei ti ih mau pa cun praok khankix, pex kheem ti ih pui pa cud cha khaing daux krax pa rahsee hawt daux diang siviex veng heue. 13Mawh kheu nan, pui pa chix rien tix, tak ot yiien yawg ka daux bawg yam an heue. Grawh grawng nawh, an mawh bawg yam pa kied caox caig heue. 14Pex sawg ka ceu pa mhawm mai paw sawg ka ceu pa caox, sonsang pon pex ti im ju heue. Mawh kheu nan, Siyiex, pa mawh Siyiex cao kru naing raoma, tak ot tau mai pex awm krax pa hoik krai pex ti deuh heue. 15Koeng ka pa caox, moh ka ceu pa mhawm, yuh ti deuh pa rahsee ka daux diang siviex veng heue. Phan yuh nan Siyiex pa mawh Siyiex cao kru naing raoma, tak sang koe krax caux rhawm ka ceu pui Yosiep, pa kawn deuk an khankix heue.
Singaix Siyiex
16Mawh kheu nan, Siyiex cao kru naing raoma pa mawh Siyiex ah nin “Krax ngia krax ngheeik tak sang koe ka daux biang pa vieh va khawmuik mai kix tak sang ah nin ka daux krax ting khankix, “Akiex eue, Akiex eue, kix tak kok cao yuh kaung hoek yiiem yo mai kok cao pa chix doe ka lox jhaox khi rhawm hoek ti ah heue. 17Ka daux sipeem plix siiet khankix, tak sang koe krax pa yiiem yo, grawh grawng nawh, Aux tak sang tiang ti hu ka daux sinax pex heue. Siyiex ah nan heue. 18Pui pa simie singaix Siyiex hoek khankix, koe krax kha rhawm heue. Pex lai simie singaix Siyiex yuh ka mawx lie? An tak sang mawh pa faik mai ang lai mawh pa riang ka son pex heue. 19An tak sang mawh pa awm pui tix kaux, pa ot ti klawd khaing sivai sangsi mai hu sipub ti yaox krih, phan ang mawh nan, awm pa hoik hu laig nawh ka daux nyiex, yam hoik neung nawh tix ka piang ding mai siuing tut ka nawh heue. 20Singaix Siyiex mawh pa faik mai ang tie mawh pa riang ang mawh lie? An mawh pa kied faik mai pa ang jhan riang pie ceeix kawx ang mawh lie? 21“Aux koeng mai seeing ka singaix pawie yuh pex khankix mai Aux ang lai khaw rhawm ka krax khrawm pa singax pex heue. 22Viang pex tan ti tawx krax tan pa gleeing mai krax tan phawng nghox ca im ka Aux kawx, Aux tak ang lai rieb ti teei ankix mai Aux tak ang lai koe krax dex dawd tau mai to brie kluing pa tan pex ti tawx son krax tan pa nhim khankix heue.#Isa 1:11-14 23Kieh lox sinum lai rhax pa ah pex khankix luan khaing Aux, grawh grawng nawh, Aux ang lai rhawm nghiet ka lox ting pa tah pex khankix heue. 24Kieh ngie krax pa rahsee lih hu awm rawm mai kieh krax pa mawh meh awm rawm klawng pa kied riex riang heue. 25Nyiex ma ceu pui Isarelax khankix eue, Mawh hoik sax tan pex krax tan pa appong tix khankix mai krax tan an khankix ka Aux, yam ot pex ka daux tiag tixpon num lie? 26Pex hoik klawm teei ti viex nyiex gox Molawk pa mawh cie siyiex riang grang krub pex khankix mai pa mawh siyiex simuing pex, pa hoik yuh pex ka son tokaux pex heue. 27Mawh kheu nan, Aux tak sang kieh pex hoek ti mawh pui pa giex laung ka daux veng Damase heue.#Cau 7:42-43 Siyiex pa mawh ceu kaux Siyiex cao kru naing raoma ah nin heue.
Wa Common Language Bible © Bible Society of Myanmar, 2012