AMOT 2
2
1Siyiex ah nin “Mawh kheu lud haktiex Mawbax, #Isa 15:1—16:14, 25:10-12; Ye 48:1-47; Yez 25:8-11; Ze 2:8-11ang joeng mawh loe ceu mawh pon ceu, Aux tak ang lai yoi krax pa song rhawm tix khaing kix heue. Grawh grawng nawh, nawh hoik gleeing si ang simiang haktiex Edom lih mawh nyaox heue. 2Aux tak sang ploi ngu hoek ka piang haktiex Mawbax, pa tak sang proe ti tik nyiex haw veng Kerok khankix, pui haktiex Mawbax tak sang yum tau mai lox lawh maw, pa riag yo mai lox luah teettawng khankix heue. 3Aux tak sang tat ti tik cao prawng see khaing daux sigreung haktiex Mawbax mai pah cub simiang greem nawh yum khawmuik tau mai nawh heue.
Ciyang Piang Haktiex Yudax
4Siyiex ah nin, “Mawh kheu lud ceu pui Yudax ang joeng mawh loe ceu mawh pon ceu, aux tak ang lai yoi krax song rhawm tix khaing kix heue. Grawh grawng nawh, kix hoik tik ka gumlox beenli Siyiex mai ang tie koe krax priex rien, ka gumlox pingnyap Nawh khankix heue. Krax pie lhen pa hawt keeing kix ti yuh, hoik kieh kix lud hu krax tix heue. 5Aux tak sang ploi ngu hoek ka piang haktiex Yudax, pa tak sang proe ti tik nyiex haw khankix pa koe ka daux veng Yerusaliem heue.”
Ciyang Piang Haktiex Isarelax
6Siyiex ah nin, “Mawh kheu lud ceu pui Isarelax, ang joeng mawh loe ceu mawh pon ceu, Aux tak ang lai veeh krax pa sang kham geu kix luan heue. Grawh grawng nawh, kix coh pui pa rahsee ka son mau mai coh pui pa hot shia sonsang pon kiiep tix ku heue.” 7Kix kied koe rhawm ti sang dig kaing pui hot shia laig ka daux phawng tiex mai deeh tieh daux krax pui pa awn rhawm khankix hu tix plak heue. Keeing mai kawn rom ti phit vao tau mai bun tix kaux ngie, seeing yuh ceu kaux pa singax singeh Aux heue. 8Kix tawm ti it hawt khu dee tan ku mu, ka kraung ceep pa hoik tang pui ti deuh son ceuk mai nyaux rawm plix siiet pa hoik se pui pa krox sux ka daux nyiex bwan Siyiex kix heue. 9Aux teei ti tik ceu pui Amawrix khankix laux leeing khaing plak sivoe ceu pui Isarelax heue. Viang mawh pui pa ting lhaong awm khaox piak van kawx mai hoik mawh pa kaux cong awm khaox tiah kawx, Aux hoik laux yuh plix plak piang nawh mai khawm riah pa koe greem nawh khankix heue. 10Aux hoik viex pex hoek khaing meung Ejiptux mai hoik thong pex daux tixpon num, ka daux tiagtu, kieh pex pon ti cie haktiex ceu pui Amawrix heue. 11Aux hoik yaog ti deuh kawn simex pex khankix tix blah mawh cao jhai mai pui pa awn ju pex khankix tix blah mawh pui Nazarix heue.#Si 6:1-8 Isa it Ceu pui Isarelax khankix eue, Mawh ang mawh lie? Siyiex ah nan heue. 12Pex hoik tawx pui Nazarix khankix nyaux rawm plix siiet mai hoik tawx lox tix ka cao jhai ka daux pa nhim, “Paw lai krai lox jhai heue.” 13“Jhak heue, Aux hoik gut ka dee ot pex awm ling lawx pa hoik naog lhiiem nghox khankix pa gut ka kuceu heue. 14Mawh kheu nan, pui pa phai to tak sang glawd, pui pa ting riang, ang lai pon ti shiao riang pa ting tix mai pui pa vao pa kwa kawx ang pon taoh ka tokaux tix heue. 15Pui pa giex ak khankix ang lai pon cung, pui pa phai caong, tak ang lai pon glawd mai pa brug brung kawx, tak ang lai pon taoh ka tokaux tix heue. 16Pui pa kied koe rhawm kwa khankix, tak sang yaox ti to ka kaong ka daux singaix an, “Siyiex ah nan heue.
Wa Common Language Bible © Bible Society of Myanmar, 2012