KAWNCAU 27
27
Tawx Pawlux Hu Ka Veng Romax
1Yam bak kix ti ploi ex brug reu hu ka meung Itali, kix teei ti tawx Pawlux mai pui pa hoik laung tang kaux khankix, ka cao giex kaing naing tix kaux pa kaux Yuxlix, pa dex dawd mai cub naing Awgutux heue. 2Ex laig ka daux reu Adramutix tix lhang, pa sang hu hawt dex meung Asix tix dah hoik tix dah mai ex yaog ti hu ka rawm sigrit sigra heue. Arittakhux pui veng Thesalonix, meung Makedonix kawx ot tau mai ex heue. 3Ngaix pasax ex hoek ka veng Sidom mai Yuxlix yuh bwanson ka Pawlux mai tawx akhwang kieh nawh hu lai ling ka paox grawm nawh khankix, sonsang khan kheu ka nawh heue. 4Ex yaog ti brug reu hu khaing tan mai kheu ang caw plak bhaung, ex tom hu plak laong klawn tiex Kuparux heue. 5Khaix hoik brug ex reu, tiang rawm sigrit sigra, pa koe dex meung Kiliki mai meung Pampuli, ex hoek ka veng Mura meung Luki heue. 6Cao giex kaing naing yaox reu Alezandre tan tix lhang, pa sang hu ka meung Itali mai nawh sau ex tan heue. 7Khaix hoik koi hu ex tom nie singaix, ex kied nu tix hoek ka sidieb Kanidu, kheu bhaung klat ex, ex tom hu plak laong klawn tiex Karete, sidieb veng Salamon heue. 8Ex kied nu ti hu hawt praok klawn tiex an mai hoek ka dee kok mawh dee bang pa mhawm grang, dex ka veng Lashie heue. 9Khaix hoik uik bawg yam tix miex nyao mai hoik luan bawg yam pa twah pa ih, Pawlux tawx lox satix ka kix, 10mai ah nin ka kix, “Pui khankix eue, aux tawng grawng pa hu ex yam in, kraung pa koe daux reu mai khawm reu mai viang mawh ju ex kawx tak hoek krax laux leeing mai krax som nai heue.” 11Viang mawh nan, cao giex kaing naing nhie nghiet lox cao giex kaing reu mai cao reu khaing lox pa hoik krai Pawlux khankix heue. 12Mawh kheu ang mhawm dee ot son bawg yam kwat, pui plak nie ah mhawm ti baox yaog ti hu khaing tan piang rawm sigrit sigra, sonsang hu ti yaox, sonsang pon ti ot ka veng Phinit daux bawg yam kwat, pa mawh dee bang ka klawn tiex Karete, pa veeh ka plak sigreung caong ma laong plak klip singaix mai veeh ka plak sigreung caong ma seh plak lih singaix heue.
Yam Phlu Bhaung Kang lux
13Yam bhaung briex koi phlu khaing plak caong ma seh, kheu kix ce, kix hoik pon pa bak kix ti yuh, kix deeh bluh rhiem ngak ngaw pa giex reu khaing daux rawm mai deeh brug reu hu dex hawt praok klawn tiex Karete heue. 14Viang mawh nan yam ang nyang bax rheung, bhaung kang lux ting pa kok mawh Urawklux, lih hoek ti klah reu. 15Giex reu mai kheu ang pon tie pon thang bhaung an, ex tom grham kieh bhaung phlu ex hu heue. 16Yam ex hu plak laong klawn tiex iak pa kok mawh Klawde, viang nu kawx ex pon ti teei reu iak, 17Khaix hoik pon bluh reu iak an haok deuh piang reu ting, kix teei maox vien ka reu ting, sonsang kieh kaux mai kheu lhat kix sang hu chun ka pak mhaik, kix tom teei man reu lih mai grham kieh bhaung phlu hu heue. 18Kheu kied klah bhaung ting lhiex ting ka ex, ngaix pasax ex tom jah ti tik kraung khrai khaing reu heue. 19Yam hoek loe ngaix kix teei ti tik kraung pa shiao daux reu ka taix tix heue. 20Kheu ang pon ti yaox singaix mai simuing tom nie singaix mai kheu bhaung pa klah ka ex, ang joeng mawh ceeix ngie, ceu pa keud pot jun pot ex grawng sang hoek krax taoh krax luan hoik grai uik heue. 21Khaix ang kix ih pa ih rheung nyao, Pawlux cung sinax kix ah nin, “Pui khankix eue, phan pex hoik nghiet lox aux mai ang yaog ti lih khaing klawn tiex Karete, pex tee hoik luan khaing krax laux krax nai in heue. 22Viang mawh nan yam in aux sang krai lox sonsang kieh pex nyawm rhawm heue. Grawh grawng nawh, lheu khaing reu in ju pex tix kaux kawx ang som nai heue. 23Mawh kheu daux sawm in kawncau Siyiex pa mawh aux cie Nawh mai Kaw pa yuh aux kaing son Nawh, hoek ti cung liep aux, 24ah nin, Pawlux eue, paw lhat graung, kheu maix tak cung sivoe simiang Kesa mai Siyiex hoik tawx ka maix pui pa brug reu tau mai maix khawmuik heue. 25Mawh kheu nan pui khankix eue, kieh nyawm rhawm heue. Mawh kheu yum rhawm aux ka Siyiex, grawng tak sang mawh awm pa hoik krai ka aux heue. 26Viang mawh nan, ex tak lai kham geu pa chun pa taing piang klawn tiex tix klawn heue.” 27Viang mawh nan yam hoek kao pon sawm, yam bhaung phlu ex hu vu vied jee blaong ka daux rawm sigrit sigra Adri, yam dex hoek greung sawm pui reu khankix ce ex hoik hoek dex ka praok haktiex tix dah dah, 28mai kix tiag ti yaox rawm mai yaox raux dieang tixnga tawp mai khaix an tivud kix baox deeh tiag ti yaox rawm tix bawg mai yaox raux dieang kao phwan tawp heue. 29Kheu lhat ex sang chun sang taing ex, ka dee kruk khrek simaox, kix tom ploi rhiem ngak ngaw giex reu pon mu, khaing ka plak sidax reu mai mie praix riang heue. 30Yam sawg pui reu khankix ti to khaing reu ting mai hoik ploi reu iak ka daux rawm sigrit sigra, kix yuh grang awm sang ploi rhiem ngak ngaw giex reu, ka plak kaing reu heue. 31Pawlux tom ah nin ka cao giex kaing naing mai ka pui naing khankix, “Phan pui inkix ang ot ka daux reu, pex ang tau ti pon hoek krax taoh krax luan heue.” 32Yam an pui naing khankix tat ti tik maox reu iak an khankix mai kieh rau heue. 33Yam dex sang riang praix Pawlux khyox khaw kix khawmuik nhie kix ih pa ih ceeix ah nin, “Singaix hoik mawh kao pon ngaix pa ca krox pex mai ang ih tidtix, 34mawh kheu nan aux tom khyox khaw pex ih pa ih ceeix, kheu mawh pa mhawm son pex heue. Grawh grawng nawh hauk kaing pex tix kaux kawx, tak ang hoek krax laux leeing tix gawng kawx heue.” 35Khaix hoik ah nawh nan, nawh teei blah mai yaogyaw bwanson Siyiex ka sivoe kix khawmuik mai nawh sivit blah mai jah ti ih heue. 36Yam an kix khawmuik nyawm rhawm mai tokaux kix kawx ih pa ih heue. 37Ex pa ot ka daux reu khawmuik koe ra yieh atixgliah liah kaux heue. 38Khaix hoik ih kix tom sak tix, kix teei ti tik nghox ca ka daux rawm sigrit sigra, sonsang kieh reu chaong heue.
Grawh Grawng Laux Reu
39Yam hoik riang praix, kix ang tawng haktiex an, kix yaox dee kawk rawm tix dah pa koe caong raog mai kix kum paox tix grawng sang pon ti kieh reu hu tum piang caong raog an lie. 40Kix tik rhiem ngak ngaw giex reu mai kix grham rhiem an kix ka daux rawm sigrit sigra mai bawg yam tix yam ngie, kix kah maox khaox saoh ting pa koe ka sidax reu mai kix yaog man reu, pa koe plak kaing reu, ti kieh bhaung phlu mai kix hu plak caong raog heue. 41Viang mawh nan yam hoek dee sidah rawm sigrit sigra ra nyhawm mai kix kieh reu hu chun piang tiex mai kaing reu chun tan mai ang chix chuh, kheu kied ting puk pak rawm, plak sidax reu tom uik jah ti jieh heue. 42Yam an pui naing khankix keud ti sang pah pui pa hoik laung khankix yum, mawh kheu lhat kix tix kaux kaux sang loe rawm to luan heue. 43Viang mawh nan kheu cao giex kaing naing simie ti taoh ti kieh Pawlux luan, nawh tom kieh raw pa bak kix mai nawh tawx lox nhie kix pa chix loe rawm, phoh khaing reu, sonsang hoek ka praok heue. 44Pui pa deuk khankix tix blah brug piang khaox piang phia mai tang kaux tix blah piang tang ceu khaing reu heue. Mawh kheu nan pui khawmuik pon ti hoek ka praok mhawm mhawm heue.
Currently Selected:
KAWNCAU 27: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
