2 SAMOELAX 9
9
Grawng Caux Rhawm Davit
1Davit ah nin, sonsang pon aux ti jhi krax caux rhawm tix ka son min ceu kaux Yawnasan, “Mawh kawn koe pui tix kaux kaux khaing daux paox nyiex Sawlux lie?”#1Sa 20:15-17 2Koe pui tix kaux pa mawh kawncau daux nyiex ma Sawlux ceu kaux nawh mawh Zibax, yam kok kix nawh hoek ka Davit, simiang ah nin ka nawh, “Mawh maix Zibax lie?” nawh ah nin, “Mawh awm pa ah maix.” 3Khaix an simiang ah nin, “Sonsang pon jhi aux krax caux rhawm Siyiex, mawh ang pui tix kaux kawx khaing daux nyiex ma Sawlux lai koe lie? mai Zibax deeh ah nin ka simiang, kawn simex Yawnasan pa koe jhawm saux laux caong kawn koe tix kaux.”#2Sa 4:4s 4Simiang ah nin ka nawh, “Mawh ot nawh dee mawx?” mai Zibax deeh ah nin, “Nawh ot daux nyiex Makhirax kawn simex Amelax daux yaong Lawdebarax.” 5Davit ploi pui hu teei nawh hoek khaing daux nyiex Makhirax kawn simex Amelax khaing daux yaong Lawdebarax. 6Yam hoik hoek Mephibawshiet kawn simex Yawnasan, pa mawh kawn saux Sawlux, ka plak sivoe Davit, nawh gup pakngai tix mai krub ka Davit, Davit ah nin, “Mephibawshiet eue, ” nawh pawk ah nin, “Kawncau maix ot tin.” 7Mai Davit ah nin ka nawh, “Paw lhat, mawh kheu aux tak jhi krax caux rhawm tix ka maix, son min ceu kaux keeing maix Yawnasan mai aux tak deeh tawx haktiex tax maix Sawlux ka maix, maix tak yaox ti ih blah piang pheen sawm aux ku singaix jheung jheung.” 8Yam an Mephibawshiet gup tix ah nin, “Mawh kheu grawng ceu patix maix lai sang kia ngiien ka kawncau maix pa awm sox yum lie?” 9Mai simiang kok Zibax kawncau Sawlux ah nin ka nawh, “Aux hoik tawx can pa mawh cie Sawlux mai cie paox nyiex nawh khawmuik ka kawn simex cao simiang maix.” 10Maix mai kawn simex maix khawm kawncau maix, tak yaox ti yuh kaung ma son nawh mai viex ti tawx plix nghox plix koi ka kawn simex cao simiang maix, sonsang yaox nawh ti ih pa ih, mawh kheu nan, Mephibawshiet kawn simex cao simiang maix, tak ih blah piang pheen aux ku singaix jheung jheung. Zibax hoik koe kawn simex kao phwan kaux, tau mai kawncau nawh tixnga kaux. 11Zibax deeh ah nin ka simiang, “Awm hoik tawm cao simiang aux ka kawncau tix, kawncau maix tak yuh.” Mai simiang deeh ah nin, phan mawh Mephibawshiet nawh tak ih priex tau mai aux piang pheen sawm cao aux, awm kawn simex simiang. 12Mephibawshiet koe kawn simex iak pa kaux Mikha, pui pa hoik ot ka daux nyiex Zibax khankix mawh kawncau Mephibawshiet khawmuik. 13Mawh kheu nan, Mephibawshiet ot ka daux veng Yerusaliem mai yaox ti ih priex jheung jheung piang pheen sawm simiang, nawh mawh pa laux caong khawm ra khawn heue.
Wa Common Language Bible © Bible Society of Myanmar, 2012