2 SAMOELAX 6
6
Davit Viex Teug Sijax Mukheu
(1Been 13:5-14)
1Davit khrawm pui pa hoik laug nawh khaing daux pui Isarelax loe mheen kaux. 2Davit yaog ti kaoh hu tau mai pui pa koe tau mai nawh khaing veng Balax pa koe daux haktiex Yudax, sonsang deeh nawh teei ti viex teug bwan sijax mukheu Siyiex khaing tan, pa hoik kok kix ceu kaux mawh min ceu kaux Simiang Siyiex Cao pa ting piang khawmuik, pa koe sinax riang Cherubin.#Lih 25:22 3Kix deuh teug bwan sijax mukheu Siyiex piang ling lawx pa khraox tix lhang mai kix viex lih khaing daux nyiex Abinadat#1Sa 7:1-2 pa koe piang gawng, Awza mai Ahio, kawn simex Abinadat mawh cao pa grheu ling lawx khraox an. 4Kix viex teug bwan sijax mukheu an lih hu khaing nyiex Abinadat pa koe piang ton gawng, Awza hawt hu praok teug bwan sijax mukheu Siyiex, Ahio, mawh cao pa hu sivoe teug bwan sijax mukheu an. 5Davit mai pui Isarelax tah ting kuceu, pa mawh ting plah khaox sideed maox, ting pawd, kraung, pi biang mai chiang mai yuh krax gaux rhawm ka plak sivoe Simiang Siyiex. 6Yam hoek kix ka gwang dee dig Nakhon nghox, kheu sideeing moi caong tix Awza nyeu taix tix, giex ka teug bwan sijax mukheu Siyiex. 7Krax song rhawm Simiang Siyiex lih piang Awza mai Siyiex ciyang ka nawh, kheu phimap nawh mai nawh yum tan praok teug bwan sijax mukheu Siyiex. 8Mai Davit song rhawm kheu jao ciyang Simiang Siyiex ka Awza mai nawh kok dee an mawh “Pereza Awza tom hoek daux in singaix.” 9Davit koe krax lhat graung ka Simiang Siyiex, ka daux singaix an ah nin, “Teug bwan sijax mukheu Simiang Siyiex sang pon hoek ka aux yuh ka mawx?” 10Mawh kheu nan, Davit ang lai pon gah tix viex teug bwan sijax mukheu Simiang Siyiex hoek tau mai tix daux veng Davit, Davit deeh viex teug bwan sijax mukheu an deuh daux nyiex Obet Dedom pui Gitix. 11Teug bwan sijax mukheu Simiang Siyiex ot daux nyiex Obet Dedom pui Gitix loe khix, Simiang Siyiex nawb bwan piang Obet Dedom mai khawm piang pui daux nyiex ma nawh.#1Been 26:4-5
Viex Teug Sijax Mukheu Hoek Yerusaliem
(1Been 15:1, 16:6)
12Yam mhong simiang Davit, ka nawb Simiang Siyiex bwan piang nyiex ma Obet Dedom mai piang can pa koe nawh, kheu jao teug bwan sijax mukheu Siyiex, mawh kheu nan, Davit deeh hu mai teei teug bwan sijax mukheu Siyiex khaing daux nyiex Obet Dedom, hoek ka veng Davit tau mai krax pa gaux rhawm tix. 13Khaix hoik klawm pui teug bwan sijax mukheu Simiang Siyiex hu liah diang, nawh yuh krax tan pa appong ka mawie mai kawn yung pa kluing. 14Davit ceep sibex dhah pa caing ka man tix pheen mai sau riang rao tix graoh ka plak sivoe Simiang Siyiex. 15Mawh kheu nan, Davit mai pui Isarelax, viex teug bwan sijax mukheu Simiang Siyiex hoek tau mai lox sinum pa yo tix mai khawm lox luah teettawng. 16Yam laig teug bwan sijax mukheu an daux veng Davit, Mikhalax kawn bun Sawlux kok jhak nawh khaing daux siviex iak, nawh yaox ka yaog Davit tix graoh khawm rhawm tix ka plak sivoe Simiang Siyiex mai nawh sibriem Davit ka daux rhawm tix. 17Kix viex teug bwan sijax mukheu Simiang Siyiex hoek tan mai deuh daux sigreung nyiex gox bwan man pa hoik sum Davit mai Davit tan krax tan pa gleeing mai krax tan pa nhim ka plak sivoe Simiang Siyiex. 18Khaix hoik tan Davit ka krax tan pa gleeing mai krax tan pa nhim, nawh nawb bwan piang pui daux min ceu kaux Simiang Siyiex Cao pa ting piang khawmuik. 19Mai nawh tawx blah tix kaux tix lon mai nex tix kaux tix khik mai khlawp blah plix siiet kroh tix kaux tix khlawp, ka pui Isarelax khawmuik simex khawm bun, khaix an pui khankix deeh ing ka nyiex ma cao tix. 20Davit deeh ing sonsang nawb bwan piang kawn nyiex ma#1Been 16:43 tix, Mikhalax kawn bun Sawlux hoek rieb Davit ah nin, “Simiang pui Isarelax yuh sonsang koe min plakngai tix singaix tau mai pa hoik peeik kraung ceep tix ka plak sivoe ngai kawncau simex kawncau bun tix daux pa ang tawng ti kaig tua mai ang ceep kraung ceep tix.” 21Mawh kheu nan, Davit ah nin ka Mikhalax, “Aux yuh an ka plak sivoe Simiang Siyiex pa hoik laug aux, tang keeing maix mai khaing daux nyiex ma nawh, sonsang yaog Nawh Cao aux mawh cao pa kwang piang pui Simiang Siyiex mai piang pui Isarelax, mawh kheu nan, aux tak tah ting mai graoh ka plak sivoe Simiang Siyiex. 22Mai aux tak nie lheu mawh pa iak min plakngai khaing in mai aux yeen rhawm tix tiem, viang mawh nan, kawncau bun pa ah maix, mawh pa koe krax pa yaogyaw ka aux.” 23Mawh kheu nan, Mikhalax kawn bun Sawlux ang lai chix koe kawn tom hoek bawg yam yum nawh heue.
Wa Common Language Bible © Bible Society of Myanmar, 2012