2 SAMOELAX 22
22
Lox Rhax Davit Son Krax Taoh Siyiex
(Yaog 18 Title; Yaog 18:1-50)
1Khaix an Davit yaogyaw Simiang Siyiex ka lai rhax in khankix, yam hoik deeh taoh Simiang Siyiex nawh khaing daux tawm taix pui koeng khankix mai khaing daux tawm taix Sawlux. 2Mai nawh ah nin, Simiang Siyiex mawh rang ting dee deuh aux rhawm tix mai mawh guh veng pa kaux pa tiebtie ka aux. 3Simiang Siyiex mawh riang rao aux, Nawh Cao mawh pa tiebtie aux mai rung pa lawm Nawh taoh ti teei aux mai mawh tab pa kaux son aux, Maix Cao hoik taoh aux khaing daux pa kha rhawm. 4Mai aux tak kok yo ka Simiang Siyiex, pa khaw aux tix yaogyaw ka Nawh, mawh kheu hoik taoh Nawh aux luan khaing daux tawm taix pui koeng aux khankix. 5Maox krax yum hoik rob vung viang aux mai aux lhat ka rawm klawng yum pa chix kieh laux, 6maox meung yum hoik rob vung viang aux mai aux hoik krix ka kie krax yum, 7yam yaox aux krax nu krax khawm aux kok yo ka Simiang Siyiex mai aux rawg mhaing ka Nawh mai Nawh mhong ka lox pa kok yo aux ka daux nyiex bwan Nawh mai lox pa kok yo aux sivoe ngai Nawh hoek daux yhaok Nawh Cao. 8Yam an haktiex yung yang mai riah raoma hoik gah tix, mawh kheu kied song rhawm Nawh Cao. 9Mai taox ngu lih khaing daux meeh Nawh mai ngu lih khaing daux jheeh Nawh mai gaox ngu rup kheu Nawh. 10Nawh Cao plak raoma lih hoek ka greem caong Nawh mai lih ti mawh pa faik. 11Nawh Cao brug ka kawncau Siyiex Cherubin hoek mai po hu vung viang mai sidawng piang pruik bhaung. 12Nawh yuh pa faik mai mox ka daux rawm mai paiawm pa pu rob vung viang Nawh. 13Mawh kheu jhan pa riang sivoe ngai Nawh, gaox ngu hoik rup ka. 14Siyiex pa ting lhaong, kieh sinum praix lih piang raoma mai ploi lox sinum lih mawh mu pre mai gaox ngu. 15Nawh puing ak hu ka kix mai ploi pluk plak praix mai kieh kix som mai tang to. 16Siyiex eue, Maix deuh phimap ka kix, ka daux pa toek Maix bhawm ka daux meeh tix mai kieh greem rawm mai jaong num haktiex pruh. 17Nawh Cao ot dee lhaong mai nyeu taix Ti tuk aux lih ka daux rawm pa ting pa raux, 18mai taoh ti teei aux lih khaing pui pa koeng ka aux, pa nie lheu ting riang khaing aux mai pa koeng riang ciang khoi ka aux khankix, mawh kheu ang aux lai pex ka kix. 19Kix hoek ti yuh pa caox ka aux mai singaix yam yaox aux krax khi rhawm, viang mawh nan, Simiang Siyiex mawh dee deuh aux rhawm tix. 20Nawh thung aux hu ka dee vieh va mai Nawh taoh aux, kheu moh Nawh aux. 21Simiang Siyiex tawx bwanson, awm pa rahsee aux mai tawx awm taix pa singax singeh aux. 22Grawh grawng nawh kheu hawt aux daux krax Simiang Siyiex jheung jheung mai ang yuh pa caox caig mai ang tik ka Siyiex. 23Krax prawng ca Nawh, hoik koe sivoe ngai aux mai aux ang tik ka beenli Nawh Cao. 24Aux hoik rahsee sivoe ngai Nawh mai aux hoik viex ka phimap pa caox. 25Grawh grawng nawh Siyiex tawx bwanson pa rahsee aux mai tawx awm taix pa singax singeh plak sivoe ngai Nawh Cao. 26Mai tawx pa caux rhawm ka kix, pui pa chix caux rhawm, Maix tawx krax grum naog ka kix pa grum naog. 27Mai tawx pa singax singeh ka kix pui pa singax singeh mai Maix tawx pa lo pa cha ka kix pui pa lo pa cha. 28Maix taoh ti teei ka pui pa hot pa sibhawm khankix mai yeen ka pui pa ting rhawm lhaong ngai khankix. 29Simiang Siyiex mawh kawk ngu aux mai jhan riang ka daux pa faik. 30Grawh grawng nawh aux to dex tab Maix mai pon jao ka guh veng, mawh kheu deuh aux rhawm tix ka Maix. 31Mai daux krax Siyiex, mawh pa grum naog mai sijax mukheu Simiang Siyiex mawh pa hoik ciied tix singax kaux cong jheung jheung mai pa kaux sijax Nawh Cao mawh ceu pa tieb ka kix pui pa deuh rhawm ka Nawh. 32Lheu khaing Siyiex, Siyiex mawx pa kawn koe tix kaux kaux, lheu khaing Siyiex ex, simaox rang mawx pa kawn ting khaing Nawh lie? 33Siyiex teei maox rawd nyoi mai nhawt ka nyoi aux mai kieh krax hu aux rahsee. 34Nawh kieh caong aux phai hu awm caong cak#Ha 3:19 mai kieh aux cung ka dee lhaong aux. 35Nawh gau taix aux sonsang chix puing naing mai plawng taix aux pon raig ti tik ka ak tawng lheung. 36Nawh tawx ceu pa tiebtie pa taoh ka aux mai taix khawn dawm Nawh joh jhan ka aux, Nawh yaog aux ting ka daux krax gun yeung pa caux rhawm Nawh. 37Nawh Cao kieh krax hu aux blang, son ang caong aux cang klad. 38Aux pheet ka pui pa koeng ka aux tom krup mai phan aux ang nyang yuh kix laux lak pak leeing ang aux deeh hoek. 39Aux dig kix goh greem caong tix, tom ang kix lai pon kaoh. 40Grawh grawng nawh Maix nhawt maox rawd nyoi aux, sonsang koe riang tix puing naing ka kix pa ot tang plak goh greem caong aux. 41Maix hoik kieh pui pa koeng ka aux khankix, to plak khaix aux mai aux sang yuh laux leeing ka pui koeng ka aux pak lawg. 42Kix riag yo miex ding kawx, ang koe pui pa taoh, kix kok yo Simiang Siyiex kawx, Nawh Cao ang pawk. 43Yam an, aux krid kix phawng awm phawng tiex pa phlu bhaung mai klup ti tik kix daux krax awm nyheu nyhawk. 44Mai maix kieh aux luan khaing pui pa lah pa cha ka aux maix kieh aux mawh simiang cao pa giex kaing piang pui tang ceu, pui pa ang aux tawng khankix mawh siliex aux. 45Yam mhong kix lox aux, nghiet lox aux dom mawx dom an, pui tang ceu khyox khaw ka aux. 46Kix khleep ngai mai lih khawm siyaung tix khaing daux tab dee mox kix tix, 47Siyiex mawh cao pa im ju, mai rang ting aux, kieh koe bwanson liak, kieh yaog ka Siyiex Cao taoh aux ting lhaong liak. 48Siyiex Cao prawng ca plak aux, kieh cub pui khankix ot ka greem aux, 49mai Maix kieh aux luan khaing daux tawm taix pui pa koeng ka aux mai yaog aux ting lhaong piang pui pa ot tang plak mai kieh aux luan khaing daux tawm taix pui pa tud rhim khankix. 50Mawh kheu nan Simiang Siyiex eue, aux tak sang yaogyaw ka Maix mai aux tak sang rhax lai yaogyaw ka ceu kaux Maix.#Ro 15:9 51Nawh Cao hoik tawx krax taoh pa ting lhaong ka simiang pa laug Nawh mai Nawh Cao hoik yuh bwanson jah ka Davit kaw pa hoik groi Nawh bee mai doeh ru nawh leeing ju heue.
Wa Common Language Bible © Bible Society of Myanmar, 2012