2 SAMOELAX 20
20
Krax Deeh Tieh Feen Shebax
1Mai krax tieh krax feen khankix hoik lih ti koe tan mai ceu kaux pui pa tieh feen an, hoik mawh Shebax, pa mawh kawn simex Bikharix mai pa mawh ceu pui Binyamin tix kaux heue. Mai nawh phlu teettawng ah nin, “Ceu pui Isarelax khankix eue, #1Sim 12:16; 2Been 10:16 Ex ang koe nyum pa sang pon tix ceu kawx khaing Davit mai ex ang koe sinngao pa sang pon tix khaing ka daux kawn simex Yessie, ” pui ku kaux tang deeh ing ka nyiex cao tix heue. 2Mawh kheu nan, pui Isarelax khankix ku kaux hoik prah ka Davit mai kix deeh hawt hu khaix Shebax pa mawh kawn simex Bikharix, viang mawh nan, jah khaing hawt rawm klawng Yawdan tom hoek ka dee singai ka veng Yerusaliem, pui Yudax khankix kawn hawt ti ot ka daux krax pa kaux sijax tix tau mai simiang kix. 3Yam in, Davit hoik hoek ka nyiex cao tix ka daux veng Yerusaliem tan mai simiang hoik teei bun an khankix kao kaux pa mawh moeng iak nawh, #2Sa 16:22 pa hoik prah nawh kix priex rien ka nyiex haw, pa hoik laung ti deuh kix ka daux lawg nyiex haw mai tawx pa ih ka kix, viang mawh nan, nawh ang sax dex dawd mai kix heue. Mawh kheu nan, kix hoik mawh pa laung tix ka daux kawg awm miexmai tom hoek bawg yam singaix yum kix heue. 4Khaix an, simiang ah nin ka Amasa, “Kraix khrawm ti priex pui Yudax khankix ka son aux, daux loe singaix in mai deeh hoek tin khawm tokaux cao maix heue.” 5Mawh kheu nan, Amasa, hoik lih hu ti kraix khrawm pui Yudax khankix, viang mawh nan, nawh hoik nie lheu tuk bawg yam khaing krax pa hoik tat Davit ti deuh ka son nawh. 6Mai Davit baox deeh ah nin ka Abishie, “Yam in, Shebax pa mawh kawn simex Bikharix tak yuh krax pa kha rhawm ka ex mai an tak mawh pa nie lheu khaing krax pa yuh Apsalom piang ex heue. Kok kawncau mau soi simiang maix khankix mai nied ti hawt khaix nawh, phan ang mawh nan, nawh tak yaox veng pa kaux cong khankix son tokaux cao nawh mai nawh tak pon ti luad luan klawd khaing daux tawm taix ex.” 7Mawh kheu nan, cub pui Yuabax khankix tau mai cub pui Kheretix mai khawm cub pui Peletix mai khawm cub pui pa kied ting riang rao an khankix, hoik lih hu ti hawt khaix nawh khawmuik mai kix hoik lih hu khaing veng Yerusaliem, sonsang hawt pheet tix ka Shebax pa mawh kawn simex Bikharix. 8Yam hoik hoek kix ka rang ting pa koe ka daux veng Gibun, Amasa hoik pon ti hoek sivoe kix tan. Yam in, Yuabax hoik ceep kraung naing tix mai nawh baox deeh rawd maox nyoi ti nyaing ka piang an tau mai vaig tix kre pa kawn koe kaux phak vaig tix mai an mawh pa hoik phyawk nawh ti deuh ka nyoi tix mai yam lih hu nawh vaig an hoik cod. 9Khaix an, Yuabax deeh ah nin ka Amasa, “Pux aux eue, mawh nyawm ot maix lie?” Mai Yuabax jhawp ka hauk jheeh Amasa ka taix khan dawm tix, sonsang ngheet tix ka nawh. 10Viang mawh nan, Amasa ang tawng tix rien tix ka vaig pa koe ka daux taix khawn gwiex Yuabax yam an, mai nawh suat tu Amasa ka vaig an mai kraung vaig nawh khankix hoik glhua tix lih piang tiex, nawh ang lai baox suat kawx, Amasa hoik yum tan heue. Khaix an, Yuabax mai pux nawh Abishie hoik nied tix hawt khaix Shebax, pa mawh kawn simex Bikharix. 11Glang daux bawg yam an, pui Yuabax tix kaux cung hawt dex Amasa ah nin, “Can pui pa koe rhawm ka Yuabax mai can pui pa koe rhawm ka Davit khankix, kieh nawh hawt ti hu khaix Yuabax heue.” 12Viang mawh nan, Amasa hoik lulieh tix ka daux nham tix piang sigreung krax ting mai yam hoik yaox kaw an ka hoik cung pui khankix ti ot tan khawmuik, nawh gah ti tik tokaux yum Amasa khaing daux greung krax mai hu tik nawh ka daux kaung mai hoik kheem kraung ceep tix pheen piang tokaux yum nawh tan kheu hoik yaox nawh ka hoik hoek pui ku kaux ti cung ti jhak nawh. 13Yam hoik gah kix tokaux yum khaing sigreung krax ting, pui khankix khawmuik hoik deeh lih hu ti hawt khaix Yuabax sonsang deeh pon hawt pheet kix ka Shebax pa mawh kawn simex Bikharix. 14Mai Yuabax hoik lailing ti hu ka sinax doeh ceu pui Isarelax khankix khawmuik, tom hoek ka veng Abilax, pa koe ka daux haktiex Pietmakha mai kix deeh hoek ka dee khrawm paox tix tau mai kix deeh baox hu hawt khaix Shebax. 15Khaix an, kix hoik hoek baoh tan mai kix hoik lai lawm ka Shebax pa hoik bang ti ot daux veng Abelax, pa koe ka daux haktiex Bietmakha tan mai kix hoik kaong tix pum tiex khankix hawt praok guh veng mai pum tiex ankix hoik pon jung tix, ti lhaong awm krax pa tiebtie son kix. Pui khankix khawmuik pa hoik ot tau mai Yuabax, hoik deeh preeng ti hu hawt dee dex guh veng, sonsang yieh kix ti tik guh veng an khankix grhup. 16Khaix an, bun pa koe pingnya cuyi ti kaux, hoik riag yo lox tix lih khaing daux veng ah nin, “Nghiet heue, Nghiet heue, yuh bwanson deeh ing ah nin ka Yuabax, hoek dex aux, sonsang pon aux ti sikah tau mai nawh.” 17Yam hoik hoek Yuabax hawt dex nawh, bun an hoik deeh ah nin, “Mawh maix Yuabax lie? Nawh deeh pawk lox ah nin, “Mawh aux heue, “Khaix an, bun an baox deeh ah nin ka nawh, “Nghiet ka gumlox sikah kawncau bun maix liak, ” mai Yuabax deeh pawk ti ah nin, “Aux nghiet nawh daux yam in heue.” 18Khaix an, bun an deeh krai lox ah nin, “Awm hoik koe lox lai been ah nin, kieh kix hu chawk cheng ka daux veng Abilax, khaix an, kix tak pon prawng ka kaing patix heue.” 19“Aux mawh pui pa viex krax pa nhim mai khawm krax pa kaux sijax, ka daux ceu pui Isarelax khankix maix sawg ti sang yuh krax laux leeing ka veng in tix veng ka miex ceu pui Isarelax khankix tix kaux maix tak sang bleet ti ih sinngao cie Simiang Siyiex kheu jao grawng ceu patix lie?” 20Mai Yuabax deeh pawk lox ah nin, “Kieh ceu inkix mawh pa singai hu khaing aux, sonsang bleeh aux ti ih ceu inkix mai sonsang yaox aux ti yuh krax pa laux leeing inkix heue.” 21Ang mawh awm an, viang mawh nan, pui tix kaux khaing piang gawng Epharem khankix, pa kok ceu kaux mawh Shebax pa mawh kawn simex Bikharix, hoik deeh yaog riang plawng taix tix, ka simiang mai nawh hoik yuh krax pa deeh tieh feen ka Davit, ap ti tawx ngie nawh ka aux mai aux tak deeh lih hu khaing veng in.” Mai bun an deeh ah nin ka Yuabax, “Pau ti jhak heue, Kaing nawh tak mawh pa taing ti tawx ka maix khaing piang guh veng heue.” 22Khaix an, awm hoik koe pingnya cuyi nawh, bun an hoik deeh hu ka cub pui hun mai kix kid ti teei kaing Shebax pa mawh kawn simex Bikharix mai taing ti tawx ka Yuabax. Khaix an, Yuabax deeh phlu teettawng mai kix deeh ing khaing veng an, pui ku kaux hoik deeh ing ka nyiex gox cao tix, mawh kheu nan, Yuabax hoik deeh ing ka simiang daux veng Yerusalie heue.
Pa Ot Greem Kwang Davit
(2Sa 8:15-18; 1Been 18:14-17)
23Mai Yuabax hoik mawh cao kaing naing ting piang cub kru naing ceu pui Isarelax khawmuik, Benayax pa mawh kawn simex Yehawdax, hoik mawh cao kaing pa kwang piang ceu pui Kheretix mai khawm piang ceu pui Peletix khankix, 24Adawram hoik mawh cao kaing pa kwang ti koh keen khankix, Jehawshaphat pa mawh kawn simex Ahilut, hoik mawh cao kaing pa priex carang khankix, 25Shevan hoik mawh cao pa tiiem lai, Zadok mai Abitax hoik mawh cao giex kaing li, 26mai Irax pa mawh pui veng Ya-irax, hoik mawh cao kaing pa kwang ka greem Davit heue.
Wa Common Language Bible © Bible Society of Myanmar, 2012