2 PETRUX 2
2
Cao Gau Pa Ang Mawh
(Yud 4-13)
1Viang mawh nan, cao jhai pa ang mawh meh khankix kawx, hoik koe ka sinax pui khankix, awm hoik koe cao gau pa ang mawh meh ka sinax pex. Kix tak briex ti viex lox pa tak kieh laux leeing laig mai viang ka Cao pa hoik liag kix kawx, kix tak thiang ti tik kah mai nied ti viex ceu pa laux leeing piang tokaux kix laung laung heue. 2Pui tom nie tak sang hawt ti yuh krax pa seeing pa yuh kix mai mawh kheu sipieag kix tak sang ah lox map, lox caox, grawng krax pa mawh meh heue. 3Ka daux krax pa ghoing kix, kix tak sang teei lox pa nieb nyaw glaw mai yuh pex mawh kraung khrai. Krax pa sang prawng ca ka kix tom di dix tak ang kut tix mai krax laux leeing kix ang laig it heue. 4Grawh grawng nawh phan Siyiex ang deuh ka kawncau Siyiex khankix yam yuh kix phimap, viang mawh nan hoik teei ti taing kix ka daux mawnarhok mai hoik tawx pong kix ka daux pa faik sonsang priex kix tom singaix prawng ciyang, 5mai ang deuh ka haktiex di dix, viang mawh nan hoik priex mai taoh ka Noax pa mawh cao sidiex gau pa rahsee mai pui tang kaux aliah kaux yam kieh Nawh Cao rawm naog kheem piang haktiex pui pa ang chix nab yam mai pa yuh pa ang khaw ka Siyiex,#Jah 6:1—7:24 6kieh veng Sawdom mai veng Gawmawrax deeh tieh ti mawh nyaox#Jah 19:24 mai ciyang yuh laux leeing, sonsang yuh kieh mawh mhai hawt pui ti jawh khankix ka pa tak ot tak koe khaix pa ang chix nab yam mai pa yuh pa ang khaw ka Siyiex, 7hoik taoh Lotax pa rahsee, yam kha nawh rhawm kheu pa seeing pa yuh pui caox khankix,#Jah 19:1-16 8Mawh kheu pui rahsee an, ot sinax kix mai kheu yaox kheu mhong grawng pa yuh kix pa ang khaw mai beenli, tom chu ka rhawm pa rahsee nawh tix ngaix hoik tix ngaix. 9Siyiex tawng ti chix taoh pui pa chix nab yam mai pa yuh pa khaw ka Siyiex khankix, khaing krax nyaw glaw mai chix priex pui pa ang rahsee khankix greem krax prawng ca, tom hoek ngaix pa prawng ciyang, 10Viang mawh nan sang nie lheu ah ka kix pa hawt ti hu khaix alo nex nham, ka daux pa mie pa seeing mai pa ang chix nab yam ka ceu pa giex kaing heue. Kix ting rhawm mai nieb hawt alo tokaux tix mai ang ring ang siyaung ti ah lox pa ang cee ang cak, ka pa ting min pakngai khankix, 11viang kawncau Siyiex khankix, lheu ting riang mai sibrawm khaing kix kawx, ang viex lox prawng pa ang cee cak ti deuh phimap ka kix plak sivoe Siyiex heue. 12Viang mawh nan pui in khankix awm totiag pa ang koe ceu pa chix keud, pa hoik phan hoik yuh, son sang teei tiyieh laux, pa nieb ah lox pa ang cee ang cak ka grawh grawng pa ang kix tawng, ka daux ceu pa yieh kix laux an, tak sang yieh kix laux tete, 13kham geu pa ang khaw, son ngawh riang pa hoik yuh pa ang khaw heue. Kix mawh pui pa sawn ceu pa chax nie luan yuh yam ponngaix, mawh pa gaux rhawm. Kix mawh pa preeh pa pliag, pa gaux rhawm ka daux pie kheem kix, yam sawm yam ih kix pawie tau mai pex. 14Kix koe ngai pa naog ceu pa lud vao, pa ang pon yut phimap. Kix nyaw glaw ka rhawm pa ang kaux cong khankix. Rhawm kix hoik gaux ka daux krax pa ghoing. Kix mawh kawn praix pa lawg pa jhax. 15Kix hoik prah grham krax pa rahsee. Kix hoik lud krax mai hawt hu krax Balam kawn simex Bawsaw, pa moh ngawh riang, son pa yuh ceu pa ang khaw, 16viang mawh nan hoik ah ka nawh kheu phimap tokaux tix. La pa aw hoik sikah ka lox kawn pui ka nawh mai ne ka ceu pa yhot cao jhai an heue.#Si 22:4-35 17Pui an khankix awm rawm keut pa ang koe rawm mai awm simawg pa phlu bhaung hu heue. Hoik priex ti deuh pa faik pa lung son kix heue. 18Mawh kheu ah kix lox ting mu, pa giex going mai teei ceu pa simie alo nex nham mai ceu pa chax nie luan yuh mai nyaw glaw ka pui pa dex sang luan khaing kix pa yuh pa ang khaw ang jiet heue. 19Kix nieb tawx lox mukheu ti sang tawx pa ploi pa luan ka kix, yam uik mawh tokaux kix siliex ka pa cux sium heue. Grawh grawng nawh ceu pa yuh pex ka pui mawx ang ah, pui an deeh mawh siliex ka an heue. 20Khaix hoik luan kix khaing ceu pa seeing haktiex, kheu pa tawng ka Simiang mai Cao Taoh Yesux Khrit mai deeh baox krix vung vhien mai kieh pex ka kix ka daux ceu an, pa hoik mawh ka kix bawg khaix nie lheu nu khaing phao ka heue. 21Phan kix ang sax tawng krax pa rahsee lheu mhawm khaing pa hoik tawng ka krax an mai deeh tieh khaing lox tawm jhawm krai pa singax singeh pa hoik tawx ka kix heue. 22Hoik mawh ka kix awm lox tiag pa mawh meh pa ah nin, “Sox baox deeh hoek ka pa hoik hao tix#Kab 26:11 mai lig miex pa hoik heem hoik deeh ka pa lulieh tix daux glaox heue.”
Currently Selected:
2 PETRUX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012