1 TIMOSE 6
6
Yungyi Ka Simiang
1Kieh pui can pa mawh siliex khankix, een cao kix mawh pa keung ti pon pa yungyi khawmuik, ceu kaux Siyiex mai lox ceu pa gau khankix tak ang koe dee salao kah heue. 2Kix pa koe cao pa yum rhawm, paw kieh kix yuh ti ang nab yam ka kix, kheu mawh kix puxaik, viang mawh nan nie kieh kix yuh son kix, mawh kheu kix pa pon bwanson kah, mawh pa yum rhawm mai pa moh heue. Sidiex mai gau ceu in khankix awx.
Pui Lud Mai Pui Simie Ti Koe
3Phan pui tix kaux kaux gau lox ceu pa gau pa tang pa siyox mai ang cu ka lox pa mawh pa meh, pa mawh gumlox Simiang ex Yesux Khrit mai ka lox ceu pa gau pa khaw mai pa nab yam pa yuh ceu pa khaw ka Siyiex. 4Nawh kroh ti ting rhawm mai ang tawng tidtix, nawh miag ka pa chawk mai ka pa thung thiang lox, pa lih ti mawh pa boh rhawm, pa simah simiang, pa salao, pa keud grawng pa caox pa ang tie mawh, 5mai pa nie thung thiang pui rhawm pa dee keud kix hoik cux hoik sium mai pa ang koe pa mawh pa meh, pa ce ceu pa nab yam pa yuh pa khaw ka Siyiex mawh pa sang pon rao kah heue. 6Viang mawh nan phan fah rhawm ka ceu pa nab yam pa yuh pa khaw ka Siyiex, mawh pa kied pon rao pa ting heue. 7Grawh grawng nawh ex ang viex tidtix hoek ka piang haktiex mai ex ang pon ti viex tidtix lih hu heue. 8Mawh kheu nan phan ex koe pa ih mai pa ceep, ex sang fah rhawm kah heue. 9Viang mawh nan kix pa koe rhawm ti sang mi sang koe, rau ka daux pa nyaw glaw mai ka daux kie mai alo nex nham pa daox pa aw pa chix yuh laux tom nie, ceu an khankix mawh pa kieh pui com nok ti yum ka daux pa laux pa leeing heue. 10Pa moh ka mau mawh riah pa caox ku ceu khawmuik mai pui tix blah kheu simie ti pon ka ceu an, hoik lud hu khaing krax yum rhawm mai hoik cun tokaux tix, pang phlat ka ceu pa khi rhawm tom nie heue.
Kham Mhai Rug Pa Mhawm
11Mawh kheu nan maix pa mawh pui Siyiex eue, to khaing ceu in khankix mai hawt khaix pa rahsee mai ceu pa nab yam pa yuh pa khaw ka Siyiex mai pa yum rhawm mai pa moh mai pa gun pa yeung mai pa awn rhawm heue. 12Yuh naing, naing pa mhawm pa dex dawd mai pa yum rhawm awx. Jhawp ka ju leeing ju, pa hoik kok ti teei maix kah, pa hoik kham maix ti teei, yam kham maix mhai ruk pa mhawm ka sivoe pui pa kham mhai ruk tom nie heue. 13Aux tawm lox ka maix ka sivoe Siyiex, pa tawx ju pa im ka ku ceu khawmuik, ka sivoe Yesux Khrit, pa hoik kham mhai ruk sivoe Pawntix Pilat, ka grawng pa rieb ti teei pa mhawm an heue. 14Sonsang priex maix ti hawt lox tawm an, ka daux pa ang koe dee pliag dee ne mai dee deuh phimap kah, tom lih bleeh Simiang ex Yesux Khrit heue. 15Pa tak sang jhi Nawh Cao yaox yam hoek bawg yam pa khaw cie tix, kaw pa mawh Simiang pa koe tix kaux khaing, pa ting bwanson, pa mawh Simiang piang simiang, Siyiex piang siyiex, 16pa mawh tix kaux khaing pa ang chix yum, pa ot ka daux pa riang, pa ang pon ti hu dex kah, pa ang pui sax yaox, pa ang chix yaox kah kieh Nawh koe krax yung krax yi mai sibrawm leeing ju liak. Amen.
Tawm Lox Ka Caomi
17Tawm lox ka kix pa mi pa koe ka daux haktiex in, son ang kix sang ting rhawm, son ang kix sang een krax keud pot jun pot ka sinngao pa ang kaux cong, kieh een krax keud pot jun pot ka piang Siyiex, pa tawx ku ceu khawmuik ka ex, sonsang gaux rhawm kah heue. 18Sonsang yuh kix pa mhawm, sonsang mi sang koe kix daux kaing pa mhawm, sonsang koe rhawm kix ti sang gwieh ti tawx ka pui mai pa koe rhawm ti sang yuh paox pie heue. 19Khrawm ti deuh kraung khrai pa mhawm mai jaong pa kaux son tokaux kix son ju phao khaix, sonsang pon kix ju pa im, pa mawh ju tete heue.
Lox Ghoik
20Timose eue, pau pa hoik tawx hoik pong aux ka maix awx. Via khaing lox bied pa kieh raw ka pa tawng, pa lud kok pui mawh krax tawng, 21Pui tix blah pa hoik rieb ti teei mai lud loe khaing pa yum rhawm heue. Kieh bwanson koe mai maix liak heue.
Currently Selected:
1 TIMOSE 6: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
