1 TIMOSE 4
4
Sara Cao Gau Pa Phit Lud Khankix
1Khuan Cao hoik grux krai sidawng, grawh grawng daux bawg yam phao khaix, pui tix blah tak deeh tieh khaing krax yum rhawm, nghiet lox khuan pie lhen khankix, lox ceu pa gau phicaox khankix, 2pa lih khaing pui pie lhen khankix, pa ah lox pie lox lhen, pa dee chix keud chix tawng kix hoik susi gleeing ka rhiem hax, 3pa ang cu kieh pui mex moeng mai nhie pui twah pa ih, pa hoik phan Siyiex ti deuh, pui ceu pa hoik yum rhawm mai pa tawng ka pa mawh pa meh, khaw ti yaogyaw bwanson mai ih heue. 4Mawh kheu can pa hoik phan hoik yuh Siyiex kuceu mawh pa mhawm mai ang koe pa khaw ti tik vud, phan rieb ti teei ka daux pa yaogyaw bwanson. 5Ceu an kix kieh singax ka daux gumlox Siyiex mai pa rawg bwan heue.
Kawncau Pa Mhawm Yesux Khrit
6Phan maix krai puxaik khankix mhong grawng ceu in khankix maix tak mawh cao sidiex cao gau pa mhawm cie Yesux Khrit mai tak baox tiien riang rao tix ka daux lox pa yum rhawm khankix mai lox gau pa mhawm, pa hoik hawt maix tom yam in heue. 7Paw dex mai lox been pa seeing brai, lox been pa ang tie mawh pa lao yiex kuad khankix, gau tokaux tix sonsang chix nab chix yam mai yuh pa khaw ka Siyiex heue. 8Pa gau plak tokaux koe bwanson ceeix ceeix, viang mawh nan pa chix nab chix yam mai pa yuh pa khaw ka Siyiex, koe bwanson son ku ceu khawmuik mai koe lox sijax mukheu son ju in, son ju pa tak sang hoek khaix heue. 9Lox pa ah nin mawh pa kaux sijax mai pa khaw ti rieb ti teei khawmuik heue. 10Pa nied ti yuh kaing mai pa yuh lung ex mawh jao in, mawh kheu ex hoik deuh pa keud pot jun pot ex ka Siyiex pa im ju, pa mawh Cao Taoh pui khawmuik mai pa nie mawh son pui pa yum rhawm khankix heue.
Rien Rhawm Ka Kaing Jhaw Pa Yuh tix
11Tawm lox mai gau ka ceu in khankix awx. 12Paw kieh pui tix kaux kawx nunai maix kheu awn ju maix, kieh maix mawh ceu pa hawt jawh pui pa yum rhawm khankix ti yuh, ka daux pa sikah, ka daux pa yuh maix, ka daux pa moh, ka daux pa yum rhawm, ka daux pa singax singeh heue. 13Nied ti coca phat lai mai jeeh nyaw, sidiex gau, tom hoek aux awx. 14Paw yuh ti dah rhawm ka totaix pa koe ka daux maix, pa hoik tawx ka maix, ka daux pa hoik grux keud, yam deuh kuad ceu cao taix tix ka piang maix heue. 15Viex rhawm tix khawmuik mai nied ti coca yuh ceu in khankix, sonsang sidawng pa haok pa huan maix ka pui khawmuik heue. 16Rien rhawm ka tokaux tix mai ka ceu pa gau maix awx. Kaux cong ka daux ceu in khankix, mawh kheu ka daux pa yuh nin maix tak taoh khawm tokaux tix mai kix pa mhong ka maix heue.
Currently Selected:
1 TIMOSE 4: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
