1 TIMOSE 2
2
Rawg Bwan Son Pui Khawmuik
1Mawh kheu nan, ka paox tix khawmuik aux nhie maix, khyox khaw, rawg bwan, mhaing maix yaogyaw bwanson, son pui khawmuik heue. 2Son simiang khankix mai can pui pa giex kaing khawmuik, sonsang pon ex ti ot yiien yawg mhawm mhawm ka daux pa yuh ceu pa khaw mai Siyiex mai pa chix priex rhawm tix heue. 3In mawh pa mhawm mai pa khaw sivoe Siyiex Cao Taoh ex, 4pa koe rhawm ti kieh pui khawmuik hoek krax taoh mai tawng ka pa mawh meh heue. 5Grawh grawng nawh koe ngie Siyiex tix kaux khaing mai pui sinax, sinax Siyiex mai kawn pui kawx koe ngie tix kaux khaing, pui an, mawh Yesux Khrit, 6pa hoik tawx tokaux tix sonsang taoh ka pui khawmuik heue. Pa kham mhai ruk ka yam caw bawg yam heue. 7Mawh ka son an hoik ciak ti kieh aux mawh cao sidiex cao gau mai kawncau pa ting, Aux ah lox pa mawh pa meh, aux ang pie ang lhen, sonsang mawh aux cao gau, grawng krax yum rhawm mai pa mawh pa meh, ka pui tang ceu khankix heue.#2Ti 1:11
Simex Mai Bun Daux Ceu Cao
8Mawh kheu nan aux simie ti kieh simex khankix rawg bwan kudah kudee mai yaog taix pa singax singeh, pa ang koe krax song rhawm songrhi mai krax thung thiang heue. 9Awm an aux simie ti kieh bun khankix chix koe krax kaig mai priex rhawm tix, ti ceep kraung pa ang hiex jawg tix mai ang simie ti kieh dieh hauk kaing mai ih kraung khri, phan ang mawh nan siang pa koe daux jawx, phan ang mawh nan kraung ceep pa ting ngawh.#1Pe 3:3 10Kieh krax twah krax klaung pa mhawm mawh pa jawg tix, awm pa khaw pa nyawm ti jhak son bun khankix pa hoik ah ti mawh pa chix nab chix yam mai pa yuh pa khaw caw ka Siyiex heue. 11Kieh bun gau tix ka daux krax pa yiien pa yawg mai ka krax pa grum chix cu chix nghiet heue. 12Aux ang cu ti kieh bun mawh cao gau mai cao giex kaing piang simex, kieh nawh ot yiien yawg tix heue. 13Kheu hoik phan hoik yuh Adam phao ka, #Jah 2:7tom yuh Evax khaix heue.#Jah 2:21-22 14Lheu khaing an Adam ang mawh pa nghiet lox pie, bun hoik nghiet lox pie mai laig ka daux pa lud heue.#Jah 3:1-6 15Bun tak hoek krax taoh, ka daux pa keh kix kawn, phan kix kawn ot ka daux krax yum rhawm mai krax moh mai krax singax singeh tau mai krax pa chix priex rhawm rhi tix heue.
Currently Selected:
1 TIMOSE 2: WCL
Highlight
Copy
Compare
Share
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
