1 SAMOELAX 7
7
1Pui Kirayatyarim hoek mai teei teug sijax mukheu Siyiex hu mai viex laig daux nyiex Abinadat, piang gawng mai kix kieh kawn simex nawh Elaza singax sonsang priex ka teug sijax mukheu Simiang Siyiex.#2Sa 6:2-4; 1Been 13:5-7
Samoelax Prawng See Pui Isarelax
2Teug sijax mukheu rheung ot ka Kirayatyarim tixnga num mai nyiex ma pui Isarelax yiiem grai ka Simiang Siyiex, 3mai Samoelax ah nin ka doeh nyiex ma Isarelax, “Phan pex deeh veeh ti hoek ka Simiang Siyiex khawm rhawm tix khawmuik mai tik siyiex pui tang ceu siyiex Ashatariet khaing sinax tix mai ap tokaux tix yuh kaing Nawh nong nong mai Nawh Cao tak deeh taoh pex khaing tawm taix pui Philitix.” 4Pui Isarelax tik ka siyiex Balax mai siyiex Ashatariet dee singai mai yuh kaing jhaw Simiang Siyiex nong nong. 5Samoelax ah nin, “Khrawm pui Isarelax khawmuik ka veng Mizapa mai aux tak rawg bwan son pex ka Simiang Siyiex.” 6Kix khrawm paox ti ka Mizapa mai kin rawm hieh tan ka plak sivoe Simiang Siyiex mai twah pa ih daux singaix an mai kix ah nin ka dee an, “Ex khawmuik hoik lud ka Simiang Siyiex, mai Samoelax hoik prawng see ka pui Isarelax ka Mizapa. 7Yam mhong pui Philitix khrawm pui Isarelax paox ti ka Mizapa, cao kaing pui Philitix haok puing ka pui Isarelax. Yam mhong pui Isarelax ka grawng an, kix lhat ka pui Philitix. 8Pui Isarelax ah nin ka Samoelax, “Paw nyang naox krax rawg maix bwan ka Simiang Siyiex ka son ex, sonsang taoh Nawh Cao ka ex khaing tawm taix pui Philitix.” 9Mai Samoelax teei kawn yung pa kawn peux tix mu mai tan an khawm mu, son krax tan pa gleeing ka Simiang Siyiex, Samoelax rawg bwan khyox khaw ka Siyiex son pui Isarelax mai Simiang Siyiex pawk ka lox nawh. 10Yam kawn tan Samoelax krax tan pa gleeing pui Philitix greed tix dex sonsang puing ka pui Isarelax, viang mawh nan, Simiang Siyiex kieh sinum praix ting lih piang pui Philitix mai kieh kix prung prang som ka sivoe pui Isarelax. 11Pui Isarelax lih khaing Mizapa mai pheet pui Philitix mai pah kix tom hoek ka Bietkha. 12Samoelax teei simaox tix lon mai sum sinax Mizapa mai Shen, kok ceu kaux mawh Ebaneza ah nin, awm an Simiang Siyiex hoik teem ex tom hoek yam in.” 13Pui Philitix hoik som ang lai hoek ka mee haktiex pui Isarelax. Mai taix Simiang Siyiex tiebtie ka pui Philitix yam kawn im ju Samoelax. 14Veng pa hoik rhim pui Philitix khaing Isarelax hoik deeh hoek ka pui Isarelax, jah ka veng Ekaron tom hoek ka veng Gata mai pui Isarelax deeh puing ka haktiex an khankix khaing tawm taix pui Philitix. Yam an pa nhim koe sinax pui Isarelax mai pui Amawrix. 15Samoelax prawng see ka pui Isarelax glang yam im ju nawh, 16mai nawh lailing ing tiang ku num tom hoek ka veng Betelax, veng Gilagalax mai veng Mizapa mai prawng see ka pui Isarelax mai ka dee in khawmuik. 17Nawh ing ka veng Ramax jheung jheung, kheu koe nyiex nawh tan mai nawh kawx prawng see ka pui Isarelax tan mai sum khu dee tan son Simiang Siyiex heue.
Wa Common Language Bible © Bible Society of Myanmar, 2012