Zacar%EDas 4
4
Ilik pa wachij re i tikb'al kantela xaq i olivo
1Are uri xk'un chik i ángel chi klapan te wu' yin, i xinuk'astaj keje pacha uk'astaxik jun winaq are kwarik. Xutz'onoj chwe: 2“¿Wach kawilo?” I yin xinla' uwach che: “Kwil jun tzuk'b'al re an-o'oj, chi o jun yab'al aceite puwi. Xaq o wuqub' u'ab' i tzuk'b'al, ipa kupon wi i aceite chi kik'aw chupam i wuqub' u'ab'. 3Chutzal i tzuk'b'al o keb' olivo, jun o puwiqab'im xaq i jun chik o pumoxim.”
4Xintz'onoj che i ángel chi klapan wu' yin: “Wajwal, ¿Wach kraj ub'ixkil iri?” 5I ángel xula' uwach chwe: “¿Aweta'am taj wach kraj ub'ixkil?” Yin xinb'ij che: “Weta'am taj, ajwal.”
6Ire xub'ij chik: “Iri are utzijonik i Ajwal che i ma Zorobabel: Kumal ti jutzob'aj winaq chi je yij che i ch'oj, mitene che i cho'ab', iri lik rumal Intewal, kub'ij i Ajwal chi ronojel ktiki che. 7¿At pachin yet nim laj jyub'? ¡Katkanaj na ta'aj chwach i ma Zorobabel! Ire kresaj na li nab'e ab'aj, tz'aqat i winaq kesik'inik: ¡I Dios lik k'ax kuna i Jerusalén!”
8Te'uri xuya chik jun tzijonik i Ajwal chwe: 9“I ma Zorobabel ukojom ukub'ib'al i rachoch i Ajwali, xaq lik are ire kuk'is ni uyijb'axik,” kub'ij i Ajwal. Keje uri ile kiwetamaj ni yix chi are i Ajwal chi ronojel ktiki che inutaqom loq. 10“I jub'an chi xkikoj ti retalil che i jutaq b'i' ujeqanik b'ik, wo'or lik kekikot ni chrilik i ma Zorobabel chi xuk'is i chak.”
Chrijil iri, i ángel xub'ij chik: “I wuqub' kantili lik je are ub'a'wach i Ajwal, chi kkitzu b'i ronojel uwach i jyub' ta'aj.”
11Yin xintz'onoj che: “¿Wach kraj ub'ixkil i keb' olivo le, chi o jun puwiqab'im xaq jun pumoxim i tzuk'b'al?” 12Xaq xintz'onoj chik che: “¿Wach kraj ub'ixkil i keb' u'ab' olivo le chi o chkitzal i tuw an-o'oj ipa kupon wi aceite chke taq i kantil?” 13I ángel xula' uwach chwe: “¿Aweta'am taj wach kraj ub'ixkil?” Xinb'ij che: “Weta'am taj, ajwal.”
14Ire xula' uwach chwe: “Iri are i keb' chi ch'iktal kij re kki'an kipatan chrij i Ajwal che ronojel uwach i jyub' ta'aj.”
Currently Selected:
Zacar%EDas 4: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
