Zacar%EDas 11
11
1¡Tinimit Líbano, chajaqa uchija,
i a' chuk'ata nu b'i ache' re chakalte'!
2¡Chato'oq che' chaj,
man xtzaq i che' chakalte' pulew,
man i jub'an che' chi lik je chomiq
lik xsach kiwach!
¡Chixjilaw yix che' sik'al re Basán,
man i chom laj k'achelaj chi lik pim lik xsach uwach!
3Lik kesik'in i ajyu'ul chij che o'ej,
man i uchomalil i k'im
lik xsach uwach.
Lik ktataj ko'ej i koj,
man uchomalil i es chi taq raqana Jordán
lik xsach uwach.
I keb' ajyu'ul chij
4Iri are xub'ij Wajwal Dios chwe: “Cheachajiji i chij chi enam ke pa kamsab'al. 5I ajlo'onel kekikamsaj i chij, xwiri nti kuna kij we o kimak xaq i ajk'ayinel kkib'ij: ¡Mantiox che i Ajwal lik in b'eyom chik! Mitene je ajyu'ul ke, kkil ti tob'al kiwach. 6Xaq keje kin-an yin ile kwil ti tan chik tob'al kiwach i winaq chi je jeqel pa tinimiti, chkijujunal kinjach pu'ab' ulok'anij xaq pu'ab' rajawinel. Iri are ni kkisach uwach i tinimit, xaq lik mijun keinto ni pki'ab'. Yin in Ajwal, kinb'ij.”
7Are uri xinjeq kichajixik i chij chi kek'am b'i pa kamsab'al. Xin-ano man xinkitaq ajlo'onel che. Xaq xinriq keb' inch'amiy: Che i jun xinya pub'i “Utz” i che i jun chik xinya pub'i “Junamsab'al”. 8I xa che jun ik' xewesaj b'i oxib' ajyu'ul chij che i kichak chi lik xkimi'saj woywal, man lik tzel kinkilo.
9Chke i chij xinb'ij: “¡Lik in ajyu'ul ti chik iwe yix! ¡We o jun kkamik, chkamoq! ¡We o jun kkamsaxik, chkamsaxoq! ¡I kekanajik, chkitija kib' chkiwach!”
10Are uri xinchap pan inch'amiy chi ub'i: “Utz” xinpatz'o k'utb'al re chi nti chik u'ij i trat chi xu'an i Dios ku' konojel i nimaq taq tinimit. 11Che i ij le xchupsax ucho'ab' i trat, i ajlo'ol taq chij chi kinkitaqej, xkita ub'e chi are i Ajwal kb'iw chwe wach kin-an yin. 12Are uri xinb'ij chke: “We kumaj iwach, chitojo i wajil, we ntaj, chiya kan keje ile.” Xwiri xkitoj lajuj juwinaq (30) saqpwaq chwe.
13I Ajwal xub'ij chwe: “Chak'ama i pwaq le, chi lik are i chom laj wajil xkiya'o, i chaya chila pa k'olb'al mer pwachoch.” Yin xink'am i lajuj juwinaq (30) pwaq i xinya chila pa k'olb'al mer re rachoch i Ajwal. 14Te'uri xinpatz' chik ukab' ch'amiy chi ub'i: “Junamsab'al”, keje uri ile chi i tinimit Judá xaq i tinimit Israel xsach uwach chi katz kicha' kib'.
15I Ajwal xub'ij chwe: Wo'or cha'ana che awib' chi at are jun ajyu'ul chij chi lik utz ti achak ka'ano. 16Man kinya jun ajyu'ul chij puwi i tinimiti chi lik nti kuch'ob' chkilik i chij chi je o pa k'ax, mitene kutzukuj i jun chi sachnaq, mitene kukunaj i jun chi soktajnaq, mitene kutzuq i jun chi nti ucho'ab', xa are i ku'ano xa keutij i chij chi lik je ti'ojab', lik mitene i kixk'aq kuya kanoq. 17 ¡To' uwach i ajyu'ul chij chi nti reta'am man kero'taj kan i jutzob'aj chij! ¡Chtzaq i ch'ich' chi k'ulala o uware chwi uteleb' xaq che ub'a'wach wiqab'im! ¡Chkanaj uteleb' lik chaqij xaq ub'a'wach lik potz'!
Currently Selected:
Zacar%EDas 11: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
