Apocalipsis 22
22
1Te'uri i ángel xuk'ut jun raqana chwe; are i ya chi uxeb'al i k'aslemal.#22.1 Ezequiel 47.1; Zacarías 14.8. I ya le, lik ch'am, xaq lik k'arar uwach; kalax li chila pa ukub'ib'al i Dios chi o u'ij, xaq i Tol qe, chi Ral Chij kb'ixik. 2K'ulala che i ya, o i che' chi uche'lal i echa' re i k'aslemal;#22.2 Génesis 2.9; Apocalipsis 2.7. xaq xk'iy che i nim laj b'e re i tinimit. I che'i, kab'lajuj mul kuya uwach che jun junab'; ik' ik' kuya uwach. I uxaq i che' le kuriq uchak rutzirsab'al ke i nimaq taq tinimit. 3Che i jachom tinimit le, nti to' kok chila we o k'oqb'al re i Dios puwi. Xaq chila o wi i ukub'ib'al i Dios chi o u'ij xaq i Tol qe chi Ral Chij kb'ix che. Konojel i rajchakib' kkikoj u'ij. 4Lik konojel kuriq ni rib' kiwach ru' i Dios,#22.4 Salmos 17.15; Mateo 5.8; 1 Juan 3.2. xaq o ni ub'i Ire chwach kikrusil.#22.4 Ile are k'utb'al re chi je ire. 5Che i tinimit le kok ti chik a'ab'; ni'pa i je o chila, nti chik uchak i a' re kantil chke, xaq nti chik uchak utzunb'al i ij#22.5 Isaías 60.19-20; Zacarías 14.7; Apocalipsis 21.23. chke. Man are utzunb'al i Ajwal Dios are k-anaw saq che ipa je o wi. Ike le chila ke'ajawin ni ronojel ij saq.
Uk'unik i Jesucristo naqaj chik o wi
6Are uri, i ángel xub'ij chwe: “I tziji chi atom lik qatzij, utz kakojo wach i kub'ij; lik ru' i Ajwal Dios petnaq wi chi keupixb'aj i je profeta, Ire utaqom i ángel chu'aljinsaxik chke i je rajchak wach i kik'aw na.”
7¡Chita pe'! Kub'ij i Jesús, ¡Lik ya kinupon iwu'! Utz ke ike chi je kojonnaq che i tzij chi u'aljinsam i Dios chiwe, chi tz'ib'tal chupam i wuji.
8Yin in ma Wan, lik xinta xaq xwilo ni'pa taq inb'imi. Are xink'is utayik xaq i rilik ni'pa ile, are uri xinxuki chwach i ángel chi u'aljinsam ile chwe, kojb'al re u'ij. 9Xwiri, ire xub'ij chwe: “Ma'an ile, man yin xa in rajchak i Dios, pacha yet, xaq pacha i awachalal chwach i Cristo; chi je profeta xaq konojel ike le chi kekojon che i tzij chi tz'ib'tal chupam i wuji. Lik xwi i Dios chakojo u'ij.”#22.9 Apocalipsis 19.10.
10Xaq xub'ij chwe: “Ni'pa iri chi u'aljinsam i Dios chawe, ni'pa atz'ib'am chupam i wuji, mawuwaj uwach; man ya kuriq i ij chi k-antaj na. 11Xwiri tz'aqat kawoy-ej i ij le matk'achirik i je aj-anol utz taj, kki'an ni pacha ax kki'an wi; xaq ni'pa i ch'am ti kik'aslemal, xa kki'an i ch'am taj. Xwiri ni'pa i je utz lik chki'ana ni utz, xaq ni'pa i ch'am kik'aslemal, is ch'am i chki'ana uri.” Xub'ij chwe.
12Kub'ij i Jesús; “¡Lik ya kinupon iwu'! Kink'am nu b'i wach taq kinya ni chke i winaq chkijujunal; kinya ni pacha kmajaw chke, chrij wach i ki'anom. 13Yin in uxeb'al ronojel i olik, xaq yin in k'isb'al re che; in keje pacha i keb' tz'ib' A xaq Z.” Xcha i Jesús.
14Utz ke ike chi kkich'aj ni kimak#22.14 Apocalipsis 7.14. man o ni ke che uwach i che' re i k'aslemal;#22.14 Génesis 2.9; cf. Apocalipsis 2.7. xaq kya' ni uri chke ke'ok che uchija re i tinimit. 15Xwiri ke'ok tu b'i ni'pa i utz ti kik'aslemal; xa kekanaj chisaq ni'pa i kki'an i itz, xaq ni'pa i kki'an i ch'am taj ru' kich'akul; xaq ni'pa i kki'an i kamik; xaq ni'pa i kkikoj ki'ij i tiox chi xaril je antalik; xaq keje ile chke ni'pa i kki'an i t'oronik.
16I Ajwal kub'ij: “Yin, chi in Jesús, intaqom in-ángel chawe, yab'al retamaxik ronojel iri chke i jutaq tzob'aj re i Dios. Yin in umuq uxikin#22.16 Cf. Isaías 11.1,10. i ajawinel ma David; Yin in keje pacha i ch'umil re usaqirb'al chi lik kwalch'inik”.#22.16 Cf. Apocalipsis 2.27-28.
17I Lo'laj Utewal i Dios xaq i rixoqil i jun chi pacha Ral Chij, keje iri kkib'ij: “¡Chatpetoq, Ajwal Jesús!” Konojel chi kkita intziji, xaq chkib'ij: “¡Chatpetoq, Ajwal Jesús!” Pachin kk'atik, we kraj uya', chpetoq i chutu'u i ya re i k'aslemal chi nti uk'isik chi lik nti rajil.
18Konojel ni'pa i kkita i tzij tz'ib'tal chupam i wuji chi u'aljinsam i Dios chwe, kinsaqij iri chke: Pachin jun kutz'ab'ij chik uwi i tziji, i Dios kutz'ab'ij ni uri i k'ax puwi ire, keje ile b'ital chupam i wuji. 19Xaq we o jun kresaj jun tzij chupam i wuji chi u'aljinsam i Dios chwe, i Dios kresaj ni uri ub'i ire chupam i wuj ipa tz'ib'tal wi kib'i ni'pa i o kik'aslemal saqil, xaq lik nti re uri che i lo'laj tinimit chi b'ital chupam i wuji.
20I ksaqiw iri chwe, kub'ij: ¡Qatzij, ya kink'unik!
Utz, Ajwal Jesús. ¡Lik chatk'unoq!
21I Ajwal Jesús chuya ni utz piwi yix iwonojel. Lik keje ile ch-antaj na.
Currently Selected:
Apocalipsis 22: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
