Proverbios 2
2
Nimaq taq utzil chomal chi kuya i no'oj
1Wak'al, cha'ana awe che intzij
xaq chak'olo intzij inpixab' panojb'al,
2Lik chakojo retalil i no'oj, xaq lik chaya anojb'al che i b'iwil.
3Lik ru' ronojel acho'ab' kasik'ij i nojb'al,
xaq we lik kaya awib' che i suk'ul laj tzij;
4lik chatzukuj pacha ka'an che utzukuxik i saqpwaq,
xaq pacha utzukuxik ka'an che jun b'eyomal uwam.
5Are uri kawetamaj na wach usuk' ukojik u'ij i Dios;
xaq kawetamaj na wach usuk' i retamaxik uwach i Dios.
6Man are i Ajwal kyaw i b'iwil,
puchi' Ire kpe wi nojb'al, xaq ronojel i etamanik.
7I Ajwal keuto xaq keuchajij
ni'pa i suk'ul kik'aslemal chi lik nti jun utz taj kki'ano.
8Are ire kechajiw i keb'in chupam i suk'ul laj atb'al tzij,
xaq keuchajij i o saqil tzij pkik'ux.
9Xaq kawetamaj ni suk'ulik xaq pachike taq i ch'am,
keje ile kakoj ni retalil ronojel i utz.
10Man i ach'ob'onik kuriq ni i nojb'al re i b'iwil
xaq katij ni ukiyal i utz laj k'aslemal.
11I uk'olik i tzij pak'ux xaq i no'oj
lik arewi katkichajij na.
12Ike le katkesaj ni che i utz ti laj b'e
xaq chkiwach itzel laj taq achiyab',
13xaq chkiwach i kko'taj kan i b'e suk'ulik
chi xa are kkimaj b'i i b'e re i equmal,
14chi lik kekikot chu'anik i utz taj,
xaq lik alaj chke chi utz ti kki'ano,
15man xa keb'in che i b'e chi suk'ul ti ke'e wi,
man lik je sachnaq che kib'e suk'ulik.
16Katkesaj ni chwach ixoq chi awixoqil taj,
xaq chwach i tz'i laj ixoq chi katumin chupam i utz taj ru' i tzij re kamb'al awach
17chi kro'taj kan i rachi'il re k'aslemal puk'ak'alil
xaq ksach utrat chuk'ux chi u'anom ru' i Dios.
18Pachin kumaj b'i i b'e chi k-e chi rachoch i tz'i laj ixoq le,
ke'el uri chi kumaj b'i i b'e re i kamik;
19Ni'pa i ke'ok chi rachoch ixoq le, lik ke'el ti chaloq,
lik ketzalij ti chik che i b'e re i k'aslemal.
20Rumali, yet, lik chatb'in che i utz laj b'e
xaq cha'ana che ak'aslemal pacha kki'an i je utz laj taq winaq.
21Man ni'pa i suk'ul kik'aslemal chi xaq lik je ch'am,
lik kek'asi ni ronojel ij saq chwach ulew.
22Xwiri i je utz ti laj taq winaq,
xaq i keb' kipalaj, ike le ke'oqtax nu b'i chwach i ulew.
© Biblia Achí de Cubulco, Derechos reservados de Sociedad Bíblica de Guatemala