N%FAmeros 34
34
Uchi' i nim laj tinimit
1I Ajwal xub'ij che ma Moisés:
2Chab'ij i tziji chke aj Israel: Yix ya kixok b'i chwach ulew Canaán, i ulew le lik iwe yix na xaq are uchi' iri:
3I uchi' ulew pa wiqab' kik'aw chuchi' i tz'inilik jyub' chaqij chi Zin ub'i xaq kik'aw chuchi' ulew Edom, i uchi' prelb'al ij, kmajan b'i pa wiqab' che i Mar Tza, 4xaq k-e chub'i uchi' pa wiqab' kupon k'a chwa jyub' re Acrabim, kik'aw pa Zin, kupon k'a pa Cades-barnea; k-e chik pa Hasar-adar kupon k'a pa Asmón. 5Kel chila pa Asmón, k-e chik k'a chi raqana chi kjachaw uxol ru' Egipto, kupon k'a chuchi' i mar Mediterráneo.
6I uchi' ulew le puqajb'al ij k-e chi taq uchi' i mar Mediterráneo.
7I uchi' ulew pa moxab', chikojo jun ilb'al re chi kel chila chuchi' i mar Mediterráneo kupon k'a chwi jyub' Hor, 8kel chik chila che i jyub' Hor, kupon k'a pa okb'al che i tinimit Hamat, kupon k'a pa Zedad. 9Kel chik uchi' chila Zedad, k-e k'a pa Zifrón, kk'is k'a pa Hazar-enán. Ile are uchi' chi kkanaj pa moxab'.
10I uchi' ulew prelb'al ij chikojo jun ilb'al re chi kjeqan b'i pa Hazar-enán, kupon k'a pa Sefam, 11kel chik uchi' ulew chila pa Sefam, kupon k'a pa Ribla prelb'al ij che Aín, te'uri kqaj b'i prelb'al ij che i semelik ya chi Cineret ub'i. 12I uchi' le k-e chi taq raqana Jordán, kk'is k'a chuchi' i Mar Tza.
Ronojel ni'pa i mojon le are ni uchi' iwulew yix.
Ujachik ulew
13Ma Moisés xuya i jalajuj taq pixb'anik chke aj Israel ru' i tziji:
“Are ulew iri chi kijach ni yix chiwach ru' i sakinik; chi xaq ub'im i Ajwal chi kya' ni chke i je b'elejeb' lemaj ru' nik'aj chi k'amaja kel kulew. 14-15Man utzob'ajil ma Rubén, utzob'ajil ma Gad xaq nik'aj che utzob'ajil ma Manasés, elnaq chik kulew ike chila ch'aqap. Man ike xekanaj kan prelb'al ij che i raqana Jordán chwach i tinimit Jericó.”
16I Ajwal xlapan ru' ma Moisés, xub'ij che:
17I kejachaw ulew chiwe yix are ma Eleazar chi ajsujul sipon xaq ma Josué chi rak'al ma Nun. 18Xwiri xaq chisik'ij jujun aj-atzil chke i jutaq tzob'aj man kixkito chujachik ulew. 19I aj-atzil chi rajwaxik keisik'ij je are iri:
Chke utzob'ajil ma Judá are ma Caleb, chi uk'ojol ma Jefone.
20Chke utzob'ajil ma Simeón are ma Semuel, chi uk'ojol ma Amiud.
21Chke utzob'ajil ma Benjamín are ma Elidad, chi uk'ojol ma Quislón.
22Chke utzob'ajil ma Dan are ma Buqui, chi uk'ojol ma Jogli.
23Chke utzob'ajil i rak'al ma José are ma Haniel, chi uk'ojol ma Efod chi je utzob'ajil ma Manasés.
24Chke utzob'ajil ma Efraín are ma Kemuel, chi uk'ojol ma Siftán.
25Chke utzob'ajil ma Zabulón are ma Elizafán, chi uk'ojol ma Parnac.
26Chke utzob'ajil ma Isacar are ma Paltiel, chi uk'ojol ma Azán.
27Chke utzob'ajil ma Aser are ma Ahiud, chi uk'ojol ma Selomi.
28Chke utzob'ajil ma Neftalí are ma Pedael, chi uk'ojol ma Amiud.
29Je are aj-atzil ile chi xecha rumal i Ajwal chi kejachaw ulew Canaán chke aj Israel.
Currently Selected:
N%FAmeros 34: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
