N%FAmeros 31
31
Uchupik kiwach aj Madián
1I Ajwal xub'ij che ma Moisés:
2“Cha'ana uk'exel chke aj Madián pacha xki'an chiwe yix pkib'i aj Israel, te'uri katkamik.”
3Are uri ma Moisés xub'ij chke konojel aj Israel:
—Chkiyijb'a kib' jujun chiwe yix, man kix-e chu'anik ch'oj chkij aj Madián, anb'al uk'exel chke pub'i i Ajwal. 4Chkijujunal i jutaq tzob'ajil, chkitaqa b'i lajujwinaq kamo' (1,000) achiyab' pa ch'oj.
5Rumali pa taq tzob'ajil xe'ul lajujwinaq kamo' (1,000) achiyab' chi je yij che i ch'oj, xeyiji lajujmo' juchiy (12,000) konojel chi lik je yij che i ch'oj. 6Are uri ma Moisés xeutaq b'i pa ch'oj xeachnimax b'i rumal ma Finees, chi uk'ojol ma Eleazar chi ajsujul sipon, are ire xk'amaw b'i b'iroxik chi o u'ij, xaq i trompeta chi kxut'ixik jeqb'al re i ch'oj 7Are uri xki'an ch'oj ku' aj Madián, lik konojel xekikamsaj chrij pacha xub'ij i Ajwal che ma Moisés. 8Xekikamsaj jo'ob' ajawinel aj Madián, ike le je are iri: Ma Evi, ma Requem, ma Zur, ma Hur, ma Reba. Xaq xkikamsaj ma Balaam chi uk'ojol ma Beor. 9I aj Israel xekik'am b'i konojel ixoqib' aj Madián xaq konojel i kak'al, chi k'a je ch'utiq xaq konojel i jalajuj taq kichikop xaq ronojel ub'itaq ke chi lik paqal rajil, 10xwi ta la ile, xaq xkinak' a' che ronojel kitinimit xaq kik'ijib'al ipa je o wi te'eq. 11Konojel ni'pa i jalajuj taq chikop xaq i winaq chi xemaj chke aj Madián, 12xkik'am b'i che ma Moisés, che ma Eleazar chi ajsujul sipon xaq chke konojel aj Israel. I aj Israel le je uxlannaq chila chwa ta'aj Moab, chutzal i raqana Jordán, chwach i tinimit Jericó.
13Are uri ma Moisés, ma Eleazar chi ajsujul sipon xaq konojel i kaj-atzil aj Israel, xe'e chkik'ulaxik naj pan jub'i' che i k'ijib'al ipa je o wi aj Israel. 14Xwiri ma Moisés lik xpe roywal chke i aj-atzil ke i lajujwinaq kamo' (1,000) xaq chke i aj-atzil ke i jo'winaq (100) chi xeupon pa ch'oj. 15Xub'ij chke:
—¿B'uchak chi xeikamsaj ti konojel ixoqib'? 16Man je are ixoqib' ile xetun rumal ma Balaam, chi xekitzaqsaj aj Israel chwach i Ajwal man xkikoj u'ij i tiox chi Baal-peor ub'i. Rumali, i Ajwal xuya jun tojpen pkiwi utinimit ru' i kamik. 17Te'uri xub'ij chke: Su' wo'or cheikamsaj konojel ral taq alab'om, xaq su' cheikamsaj konojel ixoqib' chi kiminom chik kib' achiyab' ku'. 18Xwiri konojel i altom chi kiminom ti kib' achiyab' ku' meikamsaj chixkanaj yix ku'. 19Konojel ni'pa ki'anom i kamik xaq konojel ni'pa kichapom jun kamnaq, chekanaj kan k'a naj che i k'ijib'al ipa je o wi i aj Israel wuqub' ij. Yix xaq i je altom chi xek'asi kanoq, rajwaxik chi kijos-ij iwib' che urox ij xaq che i uwuq ij. 20Rajwaxik chi ki'an ch'am che ronojel i u'u', ronojel ni'pa i jalajuj taq b'iroxik chi antal ru' tz'um, ru' rismal chab'at xaq ru' jalajuj taq che'.
21I ma Eleazar chi ajsujul sipon xub'ij chke konojel i achiyab' chi je yij che i ch'oj, chi lik xeupon chu'anik ch'oj:
—Iri are jun atb'al tzij chi xuya i Ajwal che ma Moisés: 22Ronojel ni'pa i b'iroxik chi an-o'oj, saq-o'oj, anch'ich', ch'ich', estaño xaq i rax ch'ich'. 23Ronojel ni'pa kk'at ti pa a', rajwaxik chi kik'aw ni pa a', te'uri kch'aj ni ru' ya anb'al ch'am che. Xaq ronojel ni'pa kuch'ij ti a', rajwaxik chi ru' ya kch'ajik. 24Che uwuq ij rajwaxik chi kich'aj ni i'u' man keje ile kix-on ni ch'am, xaq utz uri kixok ni chila che i k'ijib'al ipa je o wi i jub'an chik aj Israel.
Ujachik ni'pa i xkimajo
25I Ajwal xub'ij che ma Moisés:
26Yet, ma Moisés, xaq ma Eleazar chi ajsujul sipon xaq konojel i aj-atzil ke i jalajuj taq alk'uwal re i tinimit, chiwajlaj konojel i winaq xaq konojel ni'pa i jalajuj taq chikop chi ximaj chke aj Madián. 27Chajacha pa nik'aj konojel i chikop xaq konojel i winaq, chaya nik'aj chke i xeupon pa ch'oj xaq nik'aj chke konojel aj Israel. 28Konojel ni'pa i chij, axna, b'oyexab' xaq i winaq chi kya' chke achiyab' chi je yij che i ch'oj, kawesaj ni jun che i jo'winaq jumo' (500), man kiya ni chwe yin. 29Ile kaya ni che ma Eleazar chi ajsujul sipon man ire kujach ni chwe yin. 30Xaq i nik'aj chik chi kya' chke aj Israel: Winaq, b'oyexab', axna xaq i chij, kawesaj ni jun che i lajuj kawinaq (50), kaya chke aj Leví chi o i chak chkiqul pa ja re riqb'al ib' ru' i Dios re i Ajwal.
31I ma Moisés xaq i ma Eleazar xki'ano chrij pacha xub'ij i Ajwal che ma Moisés. 32Ronojel ni'pa xkimaj chke aj Madián lajujwinaq wuqmo' kajchiy kajt'ub' (675,000) chij ronojel, xe'ajlax ti uri ni'pa to' xkik'am i aj-anol ch'oj. 33B'elejchiy (72,000) b'oyexab', 34lajujwinaq kab'lajujmo' wuqchiy (61,000) axna, 35xaq kajchiy (32,000) altom chi kiminom ti kib' achiyab' ku'. 36Rumali i nik'aj chi xya' chke achiyab' chi xeupon chu'anik ch'oj, je jo'lajujwinaq oxmo' kachiy kat'ub' (337,500) chij. 37Che ile xkesaj jo'lajuj oxlajujwinaq jumo' (675) chij, xkiya che i Ajwal re kisipon. 38Chke i lajujmo' kajchiy (36,000) b'oyexab', xecha kab'lajuj oxwinaq (72) b'oyexab' chi xkiya che i Ajwal re kisipon. 39Chke i jo'winaq waqlajujmo' oxchiy (30,500) axna, xe'ul jun oxwinaq (61) axna xkiya che i Ajwal re kisipon. 40Chke i kachiy (16,000) altom chi nti achiyab' kiminom kib' ku', xe'ul kab'lajuj juwinaq (32), xkiya che i Ajwal re kisipon. 41Ma Moisés xujach ronojel che ma Eleazar chi ajsujul sipon, chrij pacha i taqanik chi xuya i Ajwal che ma Moisés.
42I nik'aj chik chi kya' te chke jub'an chik aj Israel, chi are resam kan ma Moisés che i jub'an chi xya' chke achiyab' chi je yij che i ch'oj, 43lik keje uk'iyal pacha xya' chke i je yij che i ch'oj: Jo'lajujwinaq oxmo' kachiy kat'ub' (337,500) chij, 44lajujmo' kajchiy (36,000) b'oyexab', 45jo'winaq waqlajujmo' oxchiy (30,500) axna, 46xaq kachiy (16,000) altom, 47Che i nik'aj le xek'am konojel i jalajuj taq chikop xaq i winaq, xe'ul jujun che i lajuj kawinaq (50) man kya' chke aj Leví chi kki'an kipatan pa ja re riqb'al ib' ru' i Dios re i Ajwal. Chrij pacha i taqanik chi xuya i Ajwal che ma Moisés.
48Are uri i aj-atzil chke i lajujwinaq kamo' (1,000) xaq aj-atzil chke i jo'winaq (100) achiyab' chi je yij che i ch'oj, xe'e chrilik ma Moisés, 49xkib'ij che: Yoj chi oj awajpatan, chi oj aj-atzil chke achiyab' chi je yij che i ch'oj, xeqajlaj, lik mijun xqasach kanoq. 50Xaq qok'am li ronojel i jalajuj taq b'iroxik chi an-o'oj chi xqariq chqajujunal: Sotsaq ch'ich' re wiqb'al teleb'aj, sotsaq ch'ich' re uqul ab'aj, b'aq re uwi ab'aj, arit xaq i uwaj. Ronojel iri qak'amom loq re qasipon che i Ajwal re riqb'al kuyb'al qamak.
51Are uri ma Moisés xaq ma Eleazar, chi ajsujul sipon, xkik'am ronojel ni'pa i jalajuj taq an-o'oj chke. 52I an-o'oj chi xkisujuj aj-atzil ke i lajujwinaq kamo' (1,000) xaq aj-atzil ke i jo'winaq (100), re kiqasan che i Ajwal, o oxib' tintal ru' wajxaqib' oxwinaq ral taq k'ox che. 53Chkijujunal i achiyab' chi je yij che i ch'oj, xkik'am jub'i' ke che i b'iroxik chi xkimaj chke aj Madián. 54Are uri ma Moisés xaq ma Eleazar, xya' ronojel i an-o'oj chke kumal aj-atzil chi kik'amom loq, te'uri xkik'am b'i pa ja re riqb'al ib' ru' i Dios man keje ile i Ajwal kek'un ni aj Israel chuk'ux.
Currently Selected:
N%FAmeros 31: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
