Mateo 1
1
I je ratit umam i Jesucristo
1Iri are kib'i i je ratit umam i Jesucristo chi umuq uxikin i mam David ujer xaq mam Abraham.
2I mam Abraham le are uqajaw i mam Isaac; x-on panoq, i mam Isaac le are uqajaw i mam Jacob; te'uri i mam Jacob le are kiqajaw i mam Judá ku' i ratz ucha'. 3Te'uri i mam Judá are kiqajaw i mam Fares xaq i mam Zera, i kichuch are i ati Tamar. X-on panoq, i mam Fares are uqajaw i mam Esrom, te'uri i mam Esrom are uqajaw i mam Aram. 4X-on panoq, i mam Aram are uqajaw i mam Aminadab; te'uri i mam Aminadab are uqajaw i mam Naasón; i mam Naasón le are uqajaw i mam Salmón. 5X-on panoq, i mam Salmón are uqajaw i mam Booz, xaq uchuch are i ati Rahab. Te'uri i mam Booz are uqajaw i mam Obed, xaq uchuch are i ati Rut. Te'uri i mam Obed le are uqajaw i mam Isaí. 6Xaq x-on panoq, i mam Isaí are uqajaw i ma ajawinel David.
I mam David le are uqajaw i mam Salomón, i uchuch i mam Salomón are i rixoqil kan i etz mam Urías. 7X-on panoq, i mam Salomón le are uqajaw i mam Roboam; te'uri i mam Roboam are uqajaw i mam Abías; i mam Abías le are uqajaw i mam Asa. 8X-on panoq i mam Asa are uqajaw i mam Josafat, te'uri i mam Josafat are uqajaw i mam Joram; i mam Joram are uqajaw i mam Uzías. 9Te'uri i mam Uzías are uqajaw i mam Jotam; i mam Jotam are uqajaw i mam Acaz; i mam Acaz le are uqajaw i mam Ezequías. 10I mam Ezequías are uqajaw i mam Manasés, i mam Manasés are uqajaw i mam Amón; i mam Amón are uqajaw i mam Josías. 11I mam Josías are kiqajaw i mam Jeconías ku' i ratz ucha'. Are je k'as ike, are uri xechap i aj Israel winaq xaq xek'am b'i pa tinimit Babilonia.
12Chrijil chik kichapik b'i aj Israel, i mam Jeconías are uqajaw i mam Salatiel; te'uri i mam Salatiel are uqajaw i mam Zorobabel. 13I mam Zorobabel are uqajaw i mam Abiud; i mam Abiud are uqajaw i mam Eliaquim; i mam Eliaquim are uqajaw i mam Azor; 14i mam Azor are uqajaw i mam Sadoc; i mam Sadoc are uqajaw i mam Aquim; i mam Aquim are uqajaw i mam Eliud, 15i mam Eliud are uqajaw i mam Eleazar; i mam Eleazar are uqajaw i mam Matán; i mam Matán are uqajaw i mam Jacob. 16I mam Jacob are uqajaw i mam José; i mam José le are i rachijil i al Mariy. I al Mariy are uchuch i Jesús chi Cristo.
17Chi kqil wi i je kajlajuj lemaj chi kiqajaw kan i mam Abraham k'a ru' i mam David; te'uri xaq je kajlajuj chik lemaj chi kiqajaw kan i mam David k'a are xek'am b'i i aj Israel winaq pa tinimit Babilonia. Xaq je kajlajuj lemaj chik k'a che i ki'enam i aj Israel winaq pa Babilonia k'a xuriq i ij chi xalax i Cristo chi Mesías.
I ralaxik i Jesucristo
18I ralaxik i Jesucristo, keje iri xu'ano: I al Mariy, chi uchuch, ya ub'im chik che i ma José chi kek'uli'ik. Xwiri, are k'amaja kkuk'aj kib', ire raxwinaq chik rumal ucho'ab' Lo'laj Utewal i Dios chi petnaq puwi. 19I ma José xub'ij puk'ux chi kujach kan al Mariy ani'al. Man ire utz laj winaq, lik kraj taj chi kel utzijol chkiwach konojel i winaq chi kuya kan al Mariy. 20Are ktijin chuch'ob'ik ile, jun ángel re i Ajwal xupon ru'. I ma José xrachik'aj puwaram chi xub'ij i ángel che:
—A José, chi at umuq uxikin kan i mam David, maxij awib' che i al Mariy; chak'ulaj ni awu' re awixoqil, man i ak'al chi kalax ni ru', lik re i Lo'laj Utewal i Dios. 21I ak'al le chi kalax na, lik ala. Kaya ni pub'i a Jesús. Keje ni ub'i ile, man kresaj uwinaq chupam i kimak.
Keje ile xub'ij i ángel che.
22Ronojel iri xk'ulmaxik man keje ile ke'eloq pacha ub'im kan i Ajwal ujer. Ire ub'im che jun profeta:
23I apoj ali k-on ni raxwinaq
xaq kalax ni jun rak'al ala; i ala le, Emanuel kb'ix che.
I “Emanuel” ke'eloq: Dios qu' yoj.
24I ma José, are xk'un saq chwach, is xu'ano pacha xb'ix che rumal i ángel re i Ajwal; xuk'am i al Mariy re rixoqil. 25Xwiri to' xuchajij, lik xumin ti tan rib' ru', k'a xk'iji ni i ak'al chi xuya pub'i Jesús.
Currently Selected:
Mateo 1: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala