Josu%E9 9
9
I trat ku' i aj Gabaón
1Konojel i ajawinelab' chi je o ch'aqa ya Jordán, konojel ni'pa je o chwi taq jyub', konojel ni'pa je o chwa taq ta'aj, konojel ni'pa je o chuchi' i mar Mediterráneo xaq konojel ni'pa je o tzam taq jyub' chi je aj Het, je aj Hamor, je aj Canaán, je aj Ferez, je aj Heveo xaq i je aj Jebús are xketamaj wach i kamsanik ki'anom i je aj Israel, are uri konojel i ajawinelab' le, 2xkijunamsaj kiwach chu'anik ch'oj chkij i je aj Israel xaq ru' i ma Josué. 3Xwiri i je aj Gabaón are xketamaj wach xu'an ma Josué che i keb' tinimit Jericó xaq i Hai, 4are uri xkich'ob' kit'orik. Rumali xekitaq b'i jub'an ku' pacha taq je aj naj xki'an b'i chke, xkiya b'i el laj taq koxtal chrij kikaway xaq el laj taq yab'al kiya' chi xa kik'ojom chik. 5Kikojom b'i el laj taq ki'u', kixajab' lik jarnaq chik xaq xa kik'ojom chik, xaq keje i kiwa lik ko chik xaq lik o chik pus che. 6Xe'e chila pa Gilgal ipa je o wi ma Josué ku' i je aj Israel xkib'ij chke:
—Yoj qapetik che jun tinimit naj, kqaj kqa'an jun trat iwu'.
7I je aj Israel xkila' uwach chke:
—Yix moqxa ix aj chi naqaj, ¿Wach u'anik uri jun trat kqa'an iwu'?
8Ike xkib'ij che ma Josué:
—Yoj kqaya qib' pi'ab', oj iwajchak.
Are uri ma Josué xutz'onoj chke:
¿Ix pachin yix xaq ipa kixpe wi?
9Ike xkib'ij:
—Yoj chi oj iwajchak, oj petnaq che jun tinimit chi lik k'a naj, rumal ub'i Iwajwal Dios, man qatom ronojel wach u'anom pa Egipto, 10Xaq ronojel ni'pa xu'an chke i je keb' ajawinelab' ke i je aj Hamor, chi je o ch'aqa ya Jordán, ma Sehón ajawinel re i tinimit Hesbón, xaq i ma Og ajawinel re i tinimit Basán, chi o pa Astarot. 11Rumali i winaq re i tinimit junam ku' i qaj-atzil xkib'ij chqe chi kqayijb'a qib' che i petik xaq kqab'ij i tziji chiwe: “Kqaj kqaya qib' pi'ab' chu'anik wach i kojitaq che; chqa'ana jun trat iwu'.” 12Are xojpe chitzukuxik yix, i qawa lik lub'ub' xaq lik mi'in; xwiri wo'or, chiwila pe', lik ko chik, xaq lik o chik pus che. 13I yab'al qaya'i lik k'ak' te'eq xaq lik nojnaq che i uwa'al uva muqb'am are xojpetik, xwiri wo'or kiwilo chi lik tel chik. Qa'u' xaq i qaxajab' lik jarnaq chik man lik naj oj petnaq wi.
14I je aj Israel xkil ub'itaq ke i je aj Gabaón chi lik el chik, xwiri xkik'am ti kinojb'al che i Ajwal. 15Are uri ma Josué xu'an jun trat ku' ike, xub'ij chke chi kekamsax taj, xaq i kaj-atzil i je aj Israel lik xkib'ij chke chi kekikamsaj taj.
16Are xel oxib' ij u'anik kitrat ku' i je aj Gabaón, are uri i je aj Israel xketamaj chi xa je aj chila chkinaqaj. 17Rumali xkimaj b'i kib'e chkitzukuxik aj Gabaón, churox ij xeupon pa kitinimit: Gabaón, Cafira, Beerot xaq Quiriat-Jearim. 18Xwiri i je aj Israel xekikamsaj taj man i kaj-atzil kib'im pub'i i Dios chi kekamsax taj.
Tupu konojel i je aj Israel xech'ojin chkij i kaj-atzil chi chekamsaxoq, 19xwiri i aj-atzil xkib'ij chke:
—Qa'anom jun trat ku' pub'i i Ajwal Dios chi keqakamsaj taj, rumali nti xaqmanal kqa'an chke. 20Keqak'asb'a na, man we keqakamsaj, i Dios kpe roywal chqe, man xqa'an jun trat ku' pub'i Ire.
21Rumali i kaj-atzil i je aj Israel xkib'ij chke chi kekikamsaj taj, xwiri kki'an ni je aj-ilol si' chke xaq je aj-erel ya ke i je aj Israel. Rumali i je aj-atzil xki'ano pacha kib'im.
22Are uri ma Josué xeusik'ij i je aj Gabaón, xutz'onoj chke:
—¿B'uchak xojit'oro, man xib'ij chqe chi lik naj kixpe wi, xwiri saq laj tzij xa ix aj naqaj. 23Rumali wo'or kixkanaj puyej ronojel ij saq, ix aj-ilol ni si' xaq ix aj-erel ni ya re jalajuj taq chak re rachoch in-Dios.
24Are uri i je aj Gabaón xkib'ij che ma Josué:
—Yoj xqab'ij ile man xqaxij qib' chiwe xaq moqxa kojikamsaj, man xqetamaj chi Iwajwal Dios ub'im che etz mam Moisés chi rajchak, chi kuya kan ronojel ulewi chiwe xaq keikamsaj konojel i winaq chi je o chwach. 25Yoj oj o pi'ab' yix, chi'ana chqe pacha kumaj iwach, xaq pacha usuk'.
26Keje kelsaxik i je aj Gabaón ile che i kamik xu'an ma Josué pki'ab' i je aj Israel. 27Rumali lik che i ij le ma Josué xu'an chke i je aj Gabaón chi je ajsi' xaq je aj-erel ya ke i je aj Israel xaq re i sujb'al sipon re i Ajwal, chi o chila ipa xub'ij wi i Ajwal. Keje xkijeq u'anik i je aj Gabaón ile xaq k'a are kki'an wo'or.
Currently Selected:
Josu%E9 9: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
