Josu%E9 2
2
Ma Josué xeutaq b'i ajtaqenel pa tinimit Jericó
1I ma Josué chi uk'ojol ma Nun, are je o chila Sitim, ani'al xeutaq b'i keb' achiyab', xub'ij chke: “Jix chrilik ulew, wach u'anom, xaq i tinimit Jericó.” Xcha.
Are xe'upon i ajtaqenel le pa tinimit Jericó, xe'ok chi rachoch ati Rahab, chila xkik'awsaj wi a'ab'; i ati Rahab le are jun ixoq chi kuch'ak umer chwach uch'akul. 2Xwiri i winaq xe'e ru' i ajawinel re i Jericó, xkib'ij che:
—Chata pe', xe'ok li keb' achiyab' aj Israel che a'ab'i chretamaxik wach u'anom qatinimit —xecha.
3Are uri i ajawinel xutaq ub'ixkil i tziji che ati Rahab:
—Cheawesaj li achiyab' chi xek'un chawilik, chi je o chi awachoch, man ike le xa xek'un chutaqexik wach qach'akik kki'ano —xcha.
4Xwiri ixoq le je ruwam chik achiyab', rumali xub'ij:
—Saq laj tzij ile chi xek'un keb' achiyab' wu', xwiri xwetamaj taj je aj ipa. 5Are ya ktz'apix uchija re i okb'al che i tinimit, kolo laj kmoymat chik are uri xe'e i achiyab' le, xwiri weta'am taj ipa xe'e wi; we kixterej b'i chkitzukuxik moqxa ne k'a keiriqa —xcha.
6Xwiri ixoq le je utaqom chub'i i je ajtaqenel puwi i ja chi ta'aj uwi, je ruwam chila chuxol taq yotaj es chi lino ub'i, i es le yatal chila chaqijsab'al re.
7I achiyab' le chi je re i ajawinel xeterej b'i chkitzukuxik i je ajtaqenel; i b'e chi xkimaj b'ik are i b'e chi k-e chi raqana Jordán, chila ipa o wi i axb'al; are xe'el b'i achiyab' le, xtz'apix kan uchija re i elb'al che i tinimit. 8Are uri, chuxe'el i kikotz'olem je ajtaqenel chi je ruwam ati Rahab puwi i ja ta'aj uwi, ire xel b'i ku' xaq xub'ij chke:
9—Weta'am chi Ajwal uya'om ulewi chiwe, man Ire u'anom chqe chi kqaxij qib' chiwe yix, konojel i winaq re i tinimit lik to' ketzaq chik pulew rumal kixib'rikil. 10Man qatom chi Ajwal xuchaqijsaj i ya re i Mar Kaq re iwik'awb'al are xixel li pa Egipto, qatom wach uchupik kiwach i keb' ajawinelab' aj Hamor xi'ano, chi ma Sehón xaq i ma Og chi je o chila prelb'al ij che uchi' i raqana Jordán. 11Are xqata ile lik qonojel, laj xel qak'ux xaq laj x-e quxlab' iwumal yix, man i Ajwal chi i-Dios yix, lik are i Dios aj chikaj xaq Dios aj chwach ulew. 12Rumali kintz'onoj chiwe wo'or chi lik chib'ij chwe, pub'i i Ajwal, chi kiwil ni tob'al kiwach i walk'uwal pacha xin-an yin chiwe yix. Kwaj yin kiya jun k'utb'al re chwe, 13chi kikuy ni kimak inqajaw inchuch, watz incha' xaq ronojel ni'pa i o ku', chi kojito ni chwach i kamik. Keje ile xub'ij chke i je ajtaqenel.
14I je ajtaqenel xkib'ij che:
—Saq laj tzij kqaya ni qak'aslemal yoj puk'exel ik'aslemal yix, xwiri we kab'ij taj wach rumal xojk'unik, lik utz uri rilik tob'al awach kqa'ano are kya' ulew chqe rumal i Ajwal Dios —xecha.
15Te'uri ati Rahab xeuqajsaj b'i ru' jun laso pa wantana chrij i rachoch, man i rachoch ixoq le puwi i tapial nim uwach o wi. 16Xaq xub'ij chke:
Chix-anmajoq, jix k'a tzam taq jyub' man i winaq chi xe'e chitzukuxik kixkiriq taj. Chiwuwaj iwib' chila oxib' ij k'a ketzalij na li ike, te'uri kimaj chub'i ib'e yix —xcha.
17I je ajtaqenel xkib'ij che ati Rahab:
—Yoj kqa'an na pacha xatz'onoj chqe, xwiri we ka'an iri: 18Are kojok li yoj pa tinimit, katzayb'a i laso kaqi pa wantana chi kaqajsab'ej b'i qe wo'or; xaq kamol ni kichi' konojel ni'pa i awachalal, awatz acha' xaq aqajaw achuch waral chi awachoch. 19We o jun chke ike kel b'i chisaq are ktijin i ch'oj, utukel uri kutzukuj ukamik chrij, lik qamak ti yoj uri; xwiri we o jun chqe yoj kukamsaj i je o pa ja awu', lik qamak yoj uri. 20Xaq we yet kab'ij wach taq rumal xojk'un yoj waral, chqaqul ti uri o wi u'anik wach i xqab'ij chi kqa'ano, pacha xojataq chu'anik. Xecha che ati Rahab.
21—Utzi' —xub'ij ati Rahab, ch-antaj na pacha xib'ij yix.
Te'uri xeu'ijla b'ik, ike xe'ek; chrijil chik ki'enam ire xuyut' i laso kaq che i wantana.
22I keb' taqenel le xe'e tzam taq jyub' xaq xkuwaj kib' chila oxib' ij pacha xub'ij ati Rahab chke, k'a xetzalij ni pa Jericó i jub'an chi je enaq chkitzukuxik, lik xekitzukuj k'ulala xwiri xekiriq taj. 23Te'uri i keb' taqenel le xeqaj li tzam taq jyub', xki'axuj i raqana, xe'e chik chila ipa o wi kan ma Josué, chi uk'ojol ma Nun. Xkilap che ronojel ni'pa xkik'ulmaj; 24xaq xkib'ij che: I Ajwal ujachom i tinimit pqa'ab' man konojel i winaq lik ketzaq chik pulew rumal kixib'rikil chqe. Xecha.
Currently Selected:
Josu%E9 2: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
