Jerem%EDas 17
17
Mak atzalal xaq uya'ik utojb'alil chke aj Judá
1Ix aj Judá, i imak tz'ib'tal ru' tz'uqub' re ch'ich',
lik tz'ib'tal ru' utzam i diamante,
chwach i awanima,
xaq che i rok'a' i sujb'al asipon.
2I ami'al awalk'uwal kk'un i sujb'al sipon chkik'ux
xaq ni'pa i kutam chi o u'ij
chi je o chkinaqaj i che' chi lik rojraq uxaq
xaq chwi taq loma naj uwi
3xaq chwi taq jyub'.
Rumal ronojel ni'pa amak,
kin-an na chi kel-ax b'i ab'eyomal xaq i b'iroxik nim u'ij,
xaq kkik'am b'i ni'pa o tzam taq jyub' chi o u'ij,
chi o chupam ronojel awulew.
4Lik kawo'taj ni kan i ulew
chi xinya yin chawe re kuxtab'al we,
xaq kin-an ni chawe chi pacha winaq chi o pa k'ax kumal i je ajch'oj chawij,
chwach jun ulew chi aweta'am ti uwach,
man i woywal lik kjuluwik
pacha jun a' chi katuk'at b'ik.
K'iyal taq uwach i tzijonik
5I Ajwal kub'ij:
Chk'oqtaj ni jun chi kujek' uk'ux wu' yin,
chi xa kuya uk'ux chke i winaq
xaq ku' ike kutzukuj wi tob'al rib'.
6Lik keje na pacha i lokej chi o pa taq tz'inilik jyub' chaqij,
chi lik ronojel ij kk'uxlax ti uwach,
chi kk'iy pa taq ab'aj,
pa taq ulew chi lik chaqij xaq che taq ulew chi lik nti winaq jeqel chwach.
7Xwiri kk'iji ni utzil chomal puwi i winaq chi kuya uk'ux chwe yin,
chi ni'pa roy-exik uk'ux lik chwe yin uya'om wi.
8Lik keje na pacha jun che' chi tiktal chuchi' jun raqana,
chi k-e b'i ra' pa taq ya,
chi lik kuna taj are kpe i ij,
xaq lik arewi rax uxaq;
pu'ijlal i sa'ij lik kkam taj
xaq lik kumayij ti uya'ik uwach.
9Lik nti chik jun b'iroxik chi kt'oronik xaq lik xaqmanal ku'ano
pacha uk'ux i winaq.
¿Pachin taq wa jun kumaj usuk' ile?
10Yin in Ajwal chi kinsolij ik'ux
xaq lik weta'am wach kkich'ob' pkik'ux xaq weta'am we kekikotik xaq we keb'isonik;
chkijujunal kinya'o pacha kmajaw chke,
chrij pacha ki'anom.
11I winaq chi utz ti uriqik ub'eyomal ku'an che,
lik keje pacha jun ati t'uq chi keupo'saj i saqmol chi je re taj.
Lik are k'a o ucho'ab' kro'taj kan ub'eyomal,
pa k'isb'al re ke'eloq chi xa are jun utz ti laj nojb'al.
12I ja re kojb'al u'ij i qa-Dios lik are jun kub'ib'al nim u'ij,
lik k'a chuxeb'al loq nim u'ij.
13Ajwal, yet at roy-exik kik'ux aj Israel.
Konojel ni'pa ike chi katko'taj kanoq lik ketzaq ni pa k'ixb'alil.
Konojel ni'pa kkijek' kib' awu'
ksach ni kiwach pacha jun b'iyaj tz'ib'tal puk'aj ulew,
rumal katko'taj kan yet chi at pacha ralaxb'al ya chi lik joror.
Ma Jeremías kukuxtaj kunataj ub'i i Ajwal
14Ajwal chinawutzirsaj yet, man keje ile lik kinutzir uri,
chinawesaj yet chwach i kamik, man keje ile kinel uri chwach i kamik,
man xwi yet katinb'ixaj.
15I winaq kkib'ij chwe:
“¿Ipa o wi utzij i Ajwal?
¡Lik wo'or ch-antaj na we qatzij!”
16Tupu yin in-anom ti pen chawe
chi kataq li jun nim laj k'ax pkiwi,
xaq inrayim ti jun nim laj uyej pkiwi.
Yet lik aweta'am wach inb'im,
man lik chawach xinb'ij wi.
17Lik ma'an che awib' pacha jun nim laj xib'in ib' chwe yin,
man yet at tob'al wib' are in o puyej.
18Cha'ana chke i je ajch'oj chwij chi ktze'ex ni kipalaj, xwiri yin cha'ana chwe chi kintze'ex taj,
are ni ike chkixija kib', are ti yin.
Chapetsaj i nim laj b'is pkiwi
xaq lik cha'ana mutmut chke k'iyalmul.
Kojonik chrij i taqanik re i ij sábado
19I Ajwal xub'ij chwe: Jat, xaq chattak'al pa Okb'al b'ik che i Tinimit, ipa ke'ok wi b'ik xaq ipa ke'el wi li ajawinelab' re i tinimit Judá, te'uri xaq keje ile cha'ana pa taq okb'al re i tinimit Jerusalén. 20Chab'ij chke i winaq: Ajawinelab' xaq iwonojel yix ix re i tinimit Judá, xaq iwonojel yix ix aj Jerusalén chi kixok li che i okb'ali, chita utzij i Ajwal. 21I Ajwal kub'ij: Rumal ilb'al tob'al uwach ik'aslemal chijujunal, lik nti eqan kik'am b'ik xaq mitene kiwik'awsaj che i okb'al re i tinimit Jerusalén che i ij sábado. 22Xaq mitene kiwesaj li jun eqan piwachoch che i ij sábado, xaq nti jun chak ki'an che i ij sábado. Lik chiya i ij sábado le chwe yin, chrij pacha xeintaq iwatit imam chu'anik ujer. 23Xwiri ike are ti xki'ano xaq mitene xinkikojo, are i xki'ano, xki'an chikop laj taq winaq che kib', lik xkaj ti xekojonik xaq mitene xkijek' kib' chu'anik i utz taj.
24Yin in Ajwal kinb'ij iri: Lik chixkojon chwe, mik'am b'i jun eqan pa okb'al re i tinimit che taq i ij sábado; lik chiya i uxlanb'al ij le chwe Yin xaq mi'an taq jun chak. 25We keje ile ki'ano, lik o ni ajawinelab' uri, kek'iji kan pukub'ib'al ma David, chi xaq ke'ok che okb'al re i nim laj tinimiti pa taq ch'ich' wiqtalik xaq rij taq kaway, je achnimam kumal aj-atzil xaq kumal i winaq re i tinimit Judá xaq re i tinimit Jerusalén. Xaq i tinimit Jerusalén lik arewi je jeqel ni winaq chwach. 26Xaq kek'un ni winaq je aj pa tinimit Judá, chi je o chrij chwach i tinimit Jerusalén xaq ni'pa je o prulew ma Benjamín, chwa taq ta'aj, chwi taq jyub' xaq chwi taq jyub' re i Neguev. Kkik'am na li chikop prachoch i Dios re kporoxik, xaq i jub'an chik sipon, sipon ch'irajil, pom xaq i sipon re i tioxb'al. 27Xwiri yix we kixkojon ti che intaqanik, chi kiya i ij sábado chwe, xaq kikoj b'i eqan pa okb'al b'ik re i tinimit Jerusalén che i ij sábado, lik kinnak' a' uri che i okb'al re i tinimit Jerusalén, jun a' chi lik kujarsaj b'i i nimaq taq kachoch i ajawinelab' pa tinimit Jerusalén xaq mijun ktiki chuchupik i a' le.
Currently Selected:
Jerem%EDas 17: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
