Isa%EDas 61
61
Utzijoxik i totajik chke aj Israel
1I utewal i Ajwal o pinwi,
man i Ajwal in u'ulum;
xaq in utaqom chuya'ik i utz laj utzijol chke i nib'a'ib',
pakb'al jub'i' kib'is ni'pa i keb'isonik,
utzijoxik i kelb'al ni'pa i je tz'apilik,
ko'taxik b'i ni'pa je o prexil,
2chutzijoxik i utz laj junab' re Ajwal,
chutzijoxik i ij chi i Dios
ku'an ni uk'exel chke ajch'oj chqij pacha xki'an chqe yoj.
In utaqom li chukub'saxik kik'ux konojel ni'pa i keb'isonik.
3Chuya'ik jun kikoron ni'pa keb'ison
pa tinimit Sion puk'exel i chaj,
kunb'al muy re kikotemal puk'exel o'ej,
ub'ixaxik i b'ix puk'exel i ub'a'krijik k'uxij.
Kya' ni pkib'i “b'aqit chi lik kech'akan che i ch'oj”,
chi je tiktal rumal i Ajwal k'utb'al re u'ij uchomal.
4Kkiyak chik i ujer taq ja chi je wulijnaq,
kewalij chik i nimaq taq ja chi je wulijnaq te'eq ujer,
xaq keyijb'ax ni ni'pa i tinimit chi ya kewulijik.
5I winaq je aj naj kkiya ni kib'
chuchajixik i jalajuj taq ichikop, iwulew, xaq i tikb'al i-uva yix.
6Yix kb'ix ni chiwe chi ix ajsujul sipon re i Ajwal,
ix rajpatan i Qajwal Dios.
Kiqusij i b'eyomal ke i jub'an chik nimaq taq tinimit,
xaq kiwiq ni iwib' ru' i kiwalch'inik ike.
7Xwiri intinimit ya xutij uyej,
kamul xqajsax u'ij xaq xyo'yaxik,
rumali putinimit kamul na kya' i b'eyomal che
xaq kuqusij ni i kikotemal ronojel ij saq.
8Man i Ajwal k'ax kuna i suk'ul laj atb'al tzij
xaq ktitat upam che ela' xaq che ronojel i utz ti laj taq anik.
Ire lik kuya ni jun jik laj tioxb'al chke,
xaq ku'an ni jun trat ku' ike chi ronojel ij saq uwach.
9I je umuq uxikin lik ketamax ni kiwach chkixol i nimaq taq tinimit;
konojel ni'pa i keilawik juntir kkil ub'e
chi are jun tinimit chi yatal utzil chomal puwi rumal i Ajwal.
10¡Lik kinkikot rumal i Ajwal!
Lik kinna i kikotemal re in-Dios,
man uya'om utotajik chwe,
¡Lik uya'om i ch'akanik chwe!
In keje pacha jun ala chi ya kk'uli'ik chi kukoj ukoron,
xaq pacha jun ali chi ya kk'uli'ik chi kuwiq rib' ru' i chomiq taq ab'aj re wiqb'al ib'.
11Man keje pacha kalaxik i es chwach ulew
xaq pacha uwakrijik li utux i kotz'ij pa tikb'al kotz'ij,
keje ile ku'an i Ajwal chi ch-aljin ni u'atb'al tzij
xaq konojel i nimaq taq tinimit kkib'ixaj ni b'ix che i Ajwal.
Currently Selected:
Isa%EDas 61: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
