G%E1latas 1
1
Rutzil wachij
1Yin in ma Pablo chi in apóstol, lik in taqtal rumal i Jesucristo, xaq winaq ti xintaqawik; are i Jesucristo xintaqawik, xaq rumal i Qaqajaw Dios chi xuwalijsaj i Jesucristo che i kamik 2Yin, ku' konojel i qachalal chwach i Cristo chi je o wu', kqaya pan rutzil iwach yix, ix jutzob'aj re i Dios chila pa ulew Galacia. 3I Qaqajaw Dios xaq i Ajwal Jesucristo, chkiya utzil chomal piwi xaq i utz laj olem. 4I Jesucristo xuya rib' che i kamik rumal i qamak pacha uch'ob'om i Qaqajaw Dios. Keje ile xu'ano, elsab'al qe chupam ni'pa i utz taj chi wo'or o chwach i jyub' ta'aj. 5¡Choksax u'ij i Dios k-e ij saq chrij! Lik keje ile ch-antaj na.
Ub'isonik i ma Pablo
6Lik kinb'isoj wach kixtijin chu'anik, chi xiwo'taj kan i Dios. Ire xixusik'ij ru' yab'al re utzil chomal piwi rumal i Jesucristo; xwiri wo'or kixtijin chukojik retalil che jun chik tzij chi are ti utz laj tzij k'ak' re i Dios. 7Xwiri nti chik jun tzij pacha i utz laj tzij k'ak' re i Dios. Je o ni jujun je uponnaq iwu' xa kixkitunu; kkaj ike kkiyoj i utz laj tzij k'ak' re i Cristo. 8We o jun kuk'ut jun chik tzij chiwe, junwi chwach qak'utum kan yoj chiwe, chk'oqox ni uri rumal i Dios. Nti ku'ano we yin, o xaq we jun ángel aj chikaj k-anawik, chk'oqox ni uri. 9Inb'im chik iri chiwe, xaq kinkamulij chik ub'ixkil: We o jun kuk'ut i utz laj tzij k'ak' re i Dios junwi chwach ile chi ikojom yix, chk'oqox uri rumal i Dios.
10We keje xinb'ij ile chiwe, rumal ti kintzukuj ukojik in-ij kumal i winaq; xwi kwaj kin-ano pacha kraj i Dios. Man we yin xa kintzukuj ukojik in-ij kumal i winaq lik in rajchak ti chik i Cristo.
I upatan i ma Pablo, ru' i Ajwal Jesucristo petnaq wi
11Ix, wachalal chwach i Cristo, kwaj kiwetamaj iri: I utz laj tzij k'ak' re i Dios chi kintijin yin chub'ixkil, ile unojim ti jun winaq. 12I tzij le xya' ti chwe xaq xk'ut ti chwe kumal i winaq. Lik are i Jesucristo x-aljinsaw chwe.
13Kwaj kinsaqij chiwe. Itom yix chi u'onom loq, lik inya'om te'eq ink'ux che wach taq kkikoj i aj Judío winaq. Lik ronojel ink'ux xinch'ojin chkij i jutzob'aj re i Dios; lik xintzukuj usachsaxik kiwach. 14Lik in sik'aj chu'ankil pacha i k'utunik qe yoj chi oj aj Judío, mas na chkiwach i wachi'il chi xaqjun qajunab' ku'. Lik mas xinya ink'ux chu'ankil pacha i k'utunik xkiya kan i qatit qamam ujer. 15Xwiri i Dios in ucha'om chik are k'amaja kinalaxik; rumal i nim laj k'axnab'al uk'ux xinusik'ij ru'. Te'uri are xraj ire 16xu'aljinsaj Uk'ojol pinwach xaq i pink'ux man kinpaxsaj ni utzijol chke i winaq chi je aj Judío taj wach i utz laj tzij k'ak' re i Dios. Yin, are xwetamaj uwach i Jesucristo, xintz'onoj ti innojb'al che jun winaq, 17xaq xin-e ti pa Jerusalén chkilik i apostolab' chi ax je apostolab' wi chik chinwach yin. Are i xin-ano, juntir xin-e k'a naj k'a pa ulew Arabia. X-on panoq, te'uri xintzalij chik pa tinimit Damasco.
U'ijlaxik kib' i ma Pablo ku' jub'an chik apostolab'
18Xik'aw oxib' junab', te'uri xin-e pa Jerusalén, kwetamajb'ej re uwach i ma Cefas. Jo'lajuj ij xin-an chila ru'. 19Xwiri are in o wi chila, xwil ti kiwach ni'pa i jub'an chik apostolab', xwi i ma Jacobo xwil uwach chi ucha' i Ajwal. 20Iri, chi kintijin chutz'ib'axik chiwe, i Dios reta'am chi lik saq laj tzij; lik keje ile xin-ano.
21Te'uri xinel pa Jerusalén i xin-e k'a pa ulew Siria, xaq che i ulew Cilicia. 22Xwiri i jutzob'aj qachalal chwach i Cristo, chi je o pa ulew Judea ike k'amaja kketamaj inwach. 23Ike xwi kitom wach kib'im i jub'an chik; ike kib'im: “I ma Pablo, chi ajch'oj te'eq chqij, wo'or ktijin chupaxsaxik i utz laj tzij k'ak' re i Cristo. I tzij le xraj te'eq kuchup uwach.” 24Rumali, lik xkikoj u'ij i Dios rumal wach u'anom chwe yin chi in ujalwachim.
Currently Selected:
G%E1latas 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
