Ezequiel 8

Ilik pa wachij ke i b'iroxik chi utz taj x-an pa Jerusalén

1Che i jo'ob' ij re uwaq ik' re uwaq junab', inkul te yin ru' ja wu' junam ku' i rijab' re i tinimit Judá. Xaqte'et i Ajwal xuya u'ab' pinwi, 2xwil jun b'iroxik chi keje pacha ktzun jun winaq. Chi k-aljinik chi chwi ra' kqaj b'ik keje pacha a' xaq chwi ra' kel b'i ajsik lik kwalch'inik pacha jun ch'ich' uyum rij. 3I winaq xurip b'i chi pacha ab'aj, xuchap che inwi. Are uri i ucho'ab' i Ajwal xinuyak chikaj pa tew, xwil pinwach rumal i Dios chi xinuk'am b'i pa tinimit Jerusalén xaq xinuya xolchija chi o pa ja chupam i tinimit chi ktzun pa moxab', chila ipa o wi i tiox chi xaril antalik chi lik kupetsaj roywal i Ajwal. 4Chila o wi te'eq u'ij uchomal i Ajwal re i tinimit Israel, keje pacha xwil te yin pinwach chila chwa ta'aj. 5Are uri xub'ij chwe: “Chattaqen b'i pa moxab'.”

Are uri xintaqen b'i yin pa moxab' xaq pa okb'al b'ik, chutzal uchija re sujb'al sipon, xwil uwach i tiox chi xaril antalik chi lik kupetsaj roywal i Ajwal.

6Te'uri xub'ij chwe: “¿Kawil ni'pa i utz taj chi kki'an aj Israel, chi rumal ile kinkesaj b'i chupam i lo'laj wachoch? Xwiri k'a kawil ni jub'an chik anik chi lik xib'in ib'.”

7Te'uri xinuk'am b'i che okb'al re uwaja. Che i tapial k-aljin jun tel. 8Are uri xub'ij chwe: “Chanimarsaj i tel che i tapial le.”

Yin xinnimarsaj i tel xaq xinriq jun okb'al. 9Are uri xub'ij chwe: “Chatok b'ik i kawil ni uri i b'iroxik chi ch'am taj chi kki'an chila.” 10Xinok b'ik, te'uri xwil che ronojel i raqan i tapial chi tz'ajtal jalajuj taq k'exwach chwach re itzel taq chikop chi kejukuk chwach taq ulew xaq jub'an chik chikop chi ne te ch'am, i k'iyal taq uwach tiox chi xaril je antal pa tinimit Israel. 11Lajuj oxwinaq (70) rijab' winaq aj Israel, chkixol ike le o ma Jaazanías, uk'ojol ma Safán, chi ketijin chukojik u'ij i tiox le. Chkijujunal o kisib'al pki'ab', chi chupam ile lik kb'uquq jub'an sib' re pom kel b'i chikaj.

12Xaq xub'ij chwe: “¿Kawilo wach kki'an i rijab' aj Israel ani'al, chkijujunal je o chwach i k'olb'al kitiox? Kkich'ob' ike chi yin kewil taj, chi xaq wo'tam kan i tinimit.” 13Xub'ij chik: “Xaq keawil na chi k'a kki'an i b'iroxik chi lik mas ch'am taj chwach iri.”

14Xinuk'am b'i che uchija che i okb'al re rachoch i Ajwal, chi ktzun b'i pa moxab'. Chila je kul wi jub'an ixoqib', ke'o' che i tiox Tamuz. 15Are uri xub'ij chwe: “¿Kawil iri? Xwiri kawil ni mas i utz taj chwach iri.”

16Are uri xinuk'am b'i che uwaja re i ja chi o chupam rachoch i Ajwal, xaq pa okb'al b'ik che i lo'laj k'ijib'al re i Dios, chuxol i okb'al k'a che i k'ijib'al ipa ksujux wi sipon, je o jo'ob' juwinaq (25) achiyab', kiya'om li chel kij che i rachoch i Ajwal chila che i k'ijib'al chi o u'ij, je xukul chila ipa kel wa li ij, kiqajsam kipalaj k'a chwach ulew, ketijin chukojik u'ij i ij. 17Are uri i Ajwal xub'ij chwe: ¿Kawilo? ¿Kub'inaq ti uk'ux i tinimit Judá waral chu'anik ni'pa taq i b'iroxik chi ch'am taj, xaq unojsam upam i tinimit chu'anik i ch'oj! Julaj i julaj chik kkipetsaj i nim laj woywal, i kki'ano chi kichuyil kupon k'a xe intzam. 18Xwiri yin kin-an ch'oj ru' nim laj woywal. Lik kwil ti tob'al kiwach ike. Tupu kesik'in chinsik'ixik, keinta taj.

Currently Selected:

Ezequiel 8: ACHICUB

Highlight

Copy

Compare