Efesios 3
3
I uchak i ma Pablo ku' i tzob'ajil re i Dios
1Are rumal uri chi yin (in ma Pablo) kintz'onoj che i Dios piwi. Wo'or in o prexil rumal re i Jesucristo, man kintijin chub'ixkil utzij i Dios chiwe yix chi ix ti aj Judío winaq. 2Kinb'ij yin, itom chik utzijol wach i yatal chinqul rumal i Dios; i uya'om chinqul are ub'ixkil i utzil chomal re Ire chiwe yix. 3I Dios xusaqij wach uch'ob'om u'anik ru' uk'utik jun b'iroxik chi weta'am ti te'eq chi xaq intz'ib'am chik jub'i' chiwe puwi ile. 4Yix, we kiwajlaj uwach i wuji chi intz'ib'am chiwe, kita ub'e uri chi yin weta'am usuk' wach ku'an i Cristo chi uch'ob'om i Dios. 5Ujer u'aljinsam ti ile, xwiri wo'or x-aljinsax chqe rumal Lo'laj Utewal i Dios; xu'aljinsaj chke i profeta, xaq chke i apostolab'. 6I usuk' i tzij chi u'aljinsam chqe are iri: Rumal i utz laj tzij k'ak' re i Jesucristo, xwi ti aj Judío winaq kkiriq ni utzil chomal re i Dios, xaq i ne te aj Judío kkiriq na, xaq ke'eloq je re i jutzob'aj re i Dios; xaq o ke che ronojel ni'pa usujum i Dios chke i je re i Jesucristo. 7I Dios, rumal i rutzil uk'ux, uya'om chwe kin-e chupaxsaxik i utz laj tzij le; xaq xuya ucho'ab' chwe.
8Keje xu'an i Dios ile chwe. Ni'pa i oj re i Dios, konojel i wachi'il lik o ni ki'ij ike chinwach yin. Xwiri, tupu nti mas in-ij yin, i Dios, rumal i rutzil uk'ux, uya'om chwe chi kinpaxsaj utzijol i Cristo chke i ne te aj Judío winaq. Kinb'ij chke wach i nim laj utz chi kusujuj i Cristo chke, i uk'iyal i utz le mijun ktiki chrajlaxik. 9I Dios uya'om chinqul kin-aljinsaj chke konojel i winaq wach uch'ob'om loq k'a chuxeb'al. Ire, chi is uyijb'am ronojel ni'pa i olik, k'ate wo'or u'aljinsam ile chqe wach uch'ob'om chi ruwam te uwach. 10Kraj i Dios chi qumal yoj oj jutzob'aj re ire, k-aljinsax ni uwach ni'pa uk'iyal unojb'al Ire. Wo'or ni'pa i je tewalil chi nimaq kipatan, nimaq kicho'ab' je aj chikaj, kkil na wach i nim laj unojb'al Ire. 11I Dios keje xu'an ile pacha uch'ob'om chuxeb'al ij saq. Ile chi uch'ob'om, x-antajik xa rumal wach xu'an i Qajwal Jesucristo. 12Yoj chi oj o chik che i Cristo, chi qakub'am chik qak'ux che ire, kqaxij ti chik qib' che i tejeb'ik ru' i Dios; lik kul qak'ux che chi kojuk'ulaj na are kojtejeb' ru'. 13Rumal ronojel ile, lik kinb'ij chiwe, misach ukowil ik'ux. Misacho tupu in o pa k'ax xa rumal xixinto yix; are i kmajawik, chixkikot che chi o i'ij chinwach (rumal wach in-anom chiwe).
Lapanik ru' i Dios xaq i ub'ixaxik u'ij Ire
14Rumali kinxuki'ik kojb'al re u'ij Uqajaw i Ajwal Jesucristo. 15Are ire, je ralk'uwalil ni'pa i alk'uwalxelab' chi je o chwach i jyub' ta'aj, xaq ni'pa i je o chikaj. 16Ire, nim i utz i chom o pu'ab', rumali kintz'onoj che kuya Utewal chiwe yab'al re icho'ab', xaq i ukowil ik'ux. 17Man kintz'onoj che chi kk'iji ni Cristo piwanima, rumal ukub'ib'al ik'ux che, xaq i k'axnab'al k'uxij are ni ukub'ib'al i k'aslemal yix. 18Keje kwaj yin ile chiwe yix, man yix, junam ku' konojel i je re i Dios, lik kita ni ub'e wach unimal i k'axnab'al uk'ux i Cristo, chi are iri: Nim uwach, naj raqan, naj qajnaq b'ik, xaq naj elnaq b'ik; keje ile unimal i k'axnab'al uk'ux i Cristo chqe. 19Kintz'onoj che i Dios chi kiwetamaj na wach i k'axnab'al k'uxij le, tupu kojtiki ti chretamaxik ronojel unimal. Xwiri we kixtijin chretamaxik i k'axnab'al uk'ux i Cristo, kel ni uri chiwe chi ni'pa o che i Dios lik o ni chiwe yix.
20K'amori che i Dios chi ktiki chu'ankil che qak'ux chi o mas puwi ronojel taq i kqatz'onoj che, o mas puwi ronojel i kqach'ob'o; ku'an ru' ucho'ab' Utewal chi kchakun pqak'ux. 21Are Ire choksax u'ij ronojel ij saq qumal yoj chi oj jutzob'aj re i Dios, xaq rumal i Jesucristo. Lik keje ile ch-antaj na.
Currently Selected:
Efesios 3: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
