Deuteronomio 8
8
Xwi ti rumal wa kk'asi jun winaq
1Chi'ana ut chrij pacha kub'ij utzij upixab' i Ajwal chi ix intaqom chu'anik wo'or, man keje ile kixk'asi na xaq kix-on ni jun nim laj tinimit xaq kik'am ni kan i ulew chi i Ajwal usujum chke iwatit imam. 2Chk'un chik'ux ni'pa xixik'aw chupam pa taq tz'inilik jyub' chaqij rumal Iwajwal Dios are xixb'in kawinaq (40) junab', anb'al ajaj laj taq winaq chiwe ilb'al re we suk'ul i nojb'al xaq we kixkojon che utzij upixab' o we kixkojon taj. 3Tupu xixrik'awsaj pa k'ax xaq xitij numik, xwiri chrijil chik ile xixutzuq ru' maná. I maná le iweta'am ti uwach yix xaq mitene iwatit imam keta'am ti uwach, xuk'ulmaj ile yab'al retamaxik chiwe chi xwi ti ru' wa kk'asi wi jun winaq, xaq kk'asi rumal i tzij chi kel li puchi' i Ajwal. 4Che i ronojel kawinaq (40) junab' le x-elab' ti i'u' xaq xsipoj ti iwaqan. 5Chikojo retalil chi Iwajwal Dios xusuk'b'a i k'aslemal chiwe, pacha ku'an jun qajawxel chi kusuk'b'a uk'aslemal rak'al. 6Chi'ana ut chrij pacha kub'ij utzij upixab' Iwajwal Dios, chikojo u'ij xaq chixterej chrij i k'utunik chi uya'om Ire chiwe. 7Man i Ajwal kixuk'am b'i chwach jun rutzil ulew chi lik o k'iyal raqana chupam, xaq i ralaxb'al ya chi kealax chwa taq ta'aj xaq chwi taq jyub'. 8I ulew le lik kuya i trigo, cebada, uva, higuera, granado, olivo chi kuya aceite xaq uwa'al kab'. 9Che i ulew le lik nti kixk'achir che man lik o i kitijo xaq we rumal taq jub'an chik b'iroxik man che i nimaq taq jyub' kiwesaj ni kaqkoj ch'ich' xaq che i ab'aj kiwesaj ni ch'ich'. 10Xwiri chrijil chik ronojel ile are itzuqum chik iwib' xaq lik ix nojnaq chik, rajwaxik uri chi kikoj u'ij Iwajwal Dios rumal i chom laj ulew chi uya'om chiwe.
Atb'al tzij chrij uqelik i Dios
11Chi'ana kwent msach Iwajwal Dios chik'ux, mimayij u'anik pacha kub'ij utzij upixab', utaqanik xaq u'atb'al tzij chi kixintaq chu'anik wo'or. 12Are lik o chik kitijo xaq arewi ix nojnaq chik, xaq are i'anom chik chomiq taq iwachoch xaq are ix o chik chupam, 13xaq are je o chik k'iyal taq ichikop, ichij, xaq keje i'an-o'oj xaq isaq-o'oj, xaq i jub'an chik b'eyomal, 14are o chik ronojel ile iwu', mi'an taq to' nim che iwib' xaq msach Iwajwal Dios chik'ux chi xixresaj li pa Egipto ipa ix o wi te'eq pa k'ax; 15chi xu'an chiwe chi xixb'in pa nim laj tz'inilik jyub' chaqij, chi xaq lik xib'in ib', chi lik je o i kamsanel laj taq kumatz chila, sinaj, xaq ipa nti ya. Xwiri i Ajwal xresaj li ya chupam jun nim laj ab'aj xuyab'ej iya' yix. 16Xaq chila pa tz'inilik jyub' chaqij le xixutzuq ru' i maná. I maná le xketamaj ti uwach iwatit imam, xuk'ulmaj ile anb'al ajaj laj taq winaq chiwe, xaq ilb'al re we suk'ul i nojb'al man ile are anb'al utz chiwe yix.
17Xwiri yix mich'ob' taq iri: “Ronojel ni'pa i b'eyomal lik qach'akom ru' qacho'ab'.” 18Rajwaxik chi chk'un Iwajwal Dios chik'ux man are Ire uya'om icho'ab' chuch'akik ronojel i b'eyomal le, anb'al re saqil che i trat chi xu'an ku' iwatit imam ujer.
19Xwiri yix we xiwo'taj Iwajwal Dios man kixterej chkij i jub'an chik dios xaq we kikoj taq ki'ij, lik saq laj tzij uri chi lik kuchup ni iwach iwonojel. 20I Ajwal xaq kusachsaj ni kiwach konojel i tinimit chi keiriq yix pa taq b'e, xaq keje ku'an ile chiwe yix iwonojel we kixkojon ti che.
Currently Selected:
Deuteronomio 8: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
