Deuteronomio 17

1Misujuj taq jun toro xaq jun chij chwach Iwajwal Dios re isipon we xa je klis, man Ire lik ch'am taj krilo.

2We x-etamaxik chi chupam jun chke i tinimit chi kuya i Ajwal Dios chiwe, jun achi xaq we jun ixoq chi ku'an i utz taj chwach i Ajwal; xaq kuqel i utrat, 3rumal kukoj taq ki'ij jub'an chik dios, xaq kxuki taq chkiwach pacha taq la chwach i ij, ik' xaq i ch'umil, ile lik utaqom ti u'anik i Ajwal; 4we yix xiwetamaj ile, lik chik'ama upam uri man keje ile k-etamaxik we qatzij o we qatzij taj; xwiri we xe'eloq qatzij chi lik x-ani ni'pa i ch'am taj le pa Israel, 5kik'am b'i uri i winaq le chi xu'an i utz taj chwach i atb'al tzij re i nim laj tinimit, man lik kkamsax ni che ab'aj.

6I ukamsaxik jun ajmak k-anik xwi we je keb' xaq we je oxib' keb'inik chi lik ajmak; xwiri we xa jun kuch'ix taq rib' chukojik umak jun winaq lik koksax ti uri pajil. 7I winaq chi kekojow umak je are ike kepuk'uw i nab'e taq ab'aj che i winaq chi kamsaxik re, te'uri xaq keje ile kki'an konojel i winaq; man keje ile kchup ni uwach i utz taj chi o chixol.

8We o jun u'atik tzij chi lik k'ax k-anik pacha la puwi jun kamik, jun ch'oj, jun sokonik xaq we xab'iroxik taq kk'ulmax pitinimit yix, jix uri che i k'ijib'al chi u'ulum i Ajwal; 9xaq chilapa chke ajsujul sipon chi je aj Leví xaq che i atol tzij chi ku'at tzij che i ij le, man are ike uri keb'iwik wach rajwaxik k-anik xaq wach taq utojb'alil kya' chke i winaq le. 10Yix kiya ni utojb'alil chke chrij pacha kkib'ij ni ike le chila che i k'ijib'al chi i Ajwal u'ulum. 11Lik chi'ana ronojel chrij pacha u'anik kkib'ij ike chiwe; lik chiya i tojb'alil pacha xb'ixik lik mijalwachij taq jub'i' che. 12Xwiri we o jun ku'ano pacha to' pacha kraj ire, kuqelo wach kkib'ij i ajsujul sipon chi je o chila chu'anik kipatan chwach i Ajwal, xaq we xa kuqel utzij i atol tzij, lik kkamsax ni uri, man keje ile kk'is uri i utz taj chi o chixol chila pa Israel, 13man keje ile are kketamaj aj Israel, lik kkixij ni uri kib' xaq kkimayij u'anik ni'pa i utz taj.

Pixb'anik ke i ajawinelab'

14Are ix oknaq chub'i pa ulew re i nim laj tinimit chi kuya Iwajwal Dios chiwe, xaq are ix o chik chwach kib'ij na: “Kqaj jun qajawinel chi ku'at tzij pqawi pacha ki'anom i jub'an chik tinimit chi je o chqij chqawach”. 15Rajwaxik chi kiya kan jun iwach aj tinimit pa ajawinel, xwiri lik are i Iwajwal Dios k-uluwik, man re ku'at ni tzij puwi i tinimit, kiya ti kan jun winaq chi iwach aj tinimital taj. 16Xwiri i ajawinel le kutzukuj ti k'i ukaway, xaq keutaq tu b'i i winaq pa Egipto re k-on taq k'i kikaway, man i Ajwal ub'im chik chiwe chi lik kixtzalij ti chik che i b'e le. 17Xaq kmajaw taj chi jun ajawinel je k'i taq rixoqil, man keje ile kjech'ab' ti unojb'al, xaq kok ti chumolik uchi' k'iyal taq saq-o'oj xaq i an-o'oj.

18Are kya' kan upatan ajawinel, kutaq ni utz'ib'axik jun uk'exwach i k'utunik le, chi lik che uxeb'al kelsax wi, chi o pki'ab' i ajsujul sipon chi aj Leví. 19I uk'exwach i k'utunik le rajwaxik kuya ni ru' xaq krajlaj ni uwach ronojel ij re uk'aslemal, man keje ile knaw ni chukojik u'ij i Rajwal Dios, xaq knaw ni chu'anik wach kub'ij i k'utunik xaq lik ku'an na pacha kub'ij i taqaniki; 20man keje k-on ti nim u'ij che rib' chkiwach i rach aj tinimit xaq kujek' ti rib' che i tzij pixab'. Man keje ile, ire xaq i je umuq uxikin lik naj na kerajawin pa Israel.

Currently Selected:

Deuteronomio 17: ACHICUB

Highlight

Copy

Compare