Deuteronomio 15
15
I junab' re ukuytajik i k'as
1Pa taq wuqub' junab' kakuy ni ronojel ni'pa uk'as jun chik winaq awu'.
2I k'as chi kkuytaj na are iri: Xapachin uya'om jun b'iroxik pa cha'im che jun ulok'anij, rajwaxik uri kukuy ni che ronojel. Lik ku'an ti chik pen uri utz'onoxik uk'as ulok'anij che man i junab' le lik are jun junab' re kuyb'al k'as kojb'al u'ij i Ajwal. 3Chke i winaq chi je aj naj utz ka'an pen utz'onoxik kik'as chke, xwiri chke awach tinimit chakuyu kik'as chke chi ki'anom awu'. 4Keje ile nti jun nib'a' chixol, man Awajwal Dios kuya ni utzil chomal pawi are katk'iji ni chwach ulew chi kuya Ire chawe. 5Xwiri we lik katkojon che i Ajwal, xaq we ka'ano chrij pacha utzij upixab' chi xinya chawe wo'or. 6Qatzij, Awajwal Dios kuya ni utzil chomal pawi chrij pacha ub'im chawe, xaq o ni jalajuj taq b'iroxik awu' chi kaya ni chke k'iyal taq tinimit pa cha'im. Xwiri yet lik nti jun tinimit chi katz'onoj taq ub'itaq awe che pa cha'im, lik kat-ajawin ni pkiwi i jalajuj taq tinimit, xwiri mijun tinimit krajawin pawi yet.
7We o jun nib'a' chkixol awach aj tinimit chi o rajwaxik che; jun chke i nim laj tinimit chi kuya Awajwal Dios chawe ma'an nim che awib' chuto'ik. 8Lik xane cha'ana utz che awib' ru' ire, lik chaya che wach kraj kuchi'maj. 9Maya che i utz taj chi kok pa jolom man moqxa katok taq chuch'ob'ik: “Chi ya knaqajab' i wuqub' junab', chi are i junab' re kuyb'al k'as”, moq rumal ile katok taq chu'anik apalaj che awach aj tinimit chi o chupam i nib'a'il, rumali kawaj ti taq kato awach aj tinimit le, are uri ire kutz'onoj ni che i Ajwal i yet uri at ajmak. 10Lik rajwaxik chi arewi kato awach aj tinimit ru' ronojel ak'ux; man rumal i anik le i Ajwal kuya ni utzil chomal pawi xaq katuto na che ronojel ni'pa i ka'ano. 11Chwach i jyub' ta'aji lik arewi je o ni winaq chi o rajwaxik chke, rumali katintaq chu'anik utz laj winaq che awib' ru' awach aj tinimit chi nib'a', xaq ru' i jun chi o rajwaxik che, chila patinimit.
Atb'al tzij chkij i winaq chi je o pa k'ax kumal i kajaw
12We jun chke awach tinimit aj Hebreo kuk'ayij rib' awu' pacha winaq chi o pa k'ax rumal i rajaw, nti k-ono we achi xaq we ixoq, xa waqib' junab' uri kchakun awu', xwiri che uwuq junab' kawo'taj nu b'ik. 13Are kuriq i junab' chi kawo'taj b'i i winaq chi o pa k'ax awu', kataq tu b'i keje ile tak'tik, 14kaya nu b'i jalajuj taq achikop che, k'iyal trigo xaq i uwa'al uva muqb'am, ke'eloq chi kaya k'i che ni'pa utzil chomal chi uya'om i Awajwal Dios chawe. 15Msach chak'ux chi yet at winaq te'eq chi at o te pa k'ax rumal i awajaw chila pa Egipto, xwiri Awajwal Dios xatro'taj loq; rumali xinya i taqanik le chawe wo'or.
16Xwiri we i winaq chi o pa k'ax awumal kraj ti katro'taj kanoq, man lik nim uk'axnab'al uk'ux chawe yet xaq awalk'uwal xaq rumal utz utaqik ka'ano, 17kak'am b'i uri i winaq chi o pa k'ax awu' le, ka'ayb'a che uchija re awachoch, te'uri kawor ni uxikin ru' arya. Keje ile i winaq chi o pa k'ax le kkanaj ni uri awu' ronojel ij saq, lik keje ile ka'an che we ixoq xaq we achi. 18Mach'ob' yet chi utz taj we kawo'taj b'i jun winaq chi o pa k'ax awu', man ire ya xchakun waqib' junab' awu', xaq ni'pa rajil xaya'o rumal xchakun chawij, xa nik'aj che i rajil jun ajchak; xwi ta la ile, i Ajwal kuya ni utzil chomal pawi che ronojel ni'pa ka'ano.
Kijachik i nab'e taq kak'al i jalajuj taq chikop pu'ab' i Ajwal chi je mama'ib'
19Konojel i nab'e taq kak'al achikop chi je mama'ib' kealaxik xaq i nab'e taq kak'al achij, rajwaxik chi kajach pu'ab' i Awajwal Dios.
Meachakunsaj i nab'e taq kak'al achikop xaq mawesaj i kismal i nab'e taq kak'al achij. 20Junab' junab' junam ku' awalk'uwal keitij ni i chikop le chwach Awajwal Dios chila che i k'ijib'al ipa ku'ul wi Ire. 21Xwiri we jetz', potz' xaq we xa pachike taq k'ax o che, kajach ti uri pa re asipon chwach i Ajwal. 22Katij ni chila pa tinimit ipa at o wi, xaq nti k-ono we kkitij konojel ni'pa je ch'am xaq we je ch'am taj pacha utijawik uti'lal i chikop chi pacha kej. 23Xwiri lik matij ukik'el, chatixa b'i pulew pacha k-ani che i ya.
Currently Selected:
Deuteronomio 15: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
