Deuteronomio 13
13
1Are kwinaqir jun winaq chixol chi kub'ij taq profeta, xaq we kril puwaram wach taq kk'ulmaxik xaq we kusaqij jun nim laj il, 2we qatzij xe'eloq pacha xub'ij i winaq le chiwe xaq we kub'ij chiwe: “Jo' chojterej chkij jub'an chik tiox chi yix iweta'am ti kiwach xaq chqakojo ki'ij”, 3lik mixkojon che man Iwajwal Dios xa ilb'al iwe ku'ano we yix lik k'ax kina ire ru' ronojel ik'ux xaq ru' ronojel iwanima. 4Lik xwi Iwajwal Dios chixterej chrij xaq xwi ire chikojo u'ij, chi'ana chrij pacha kub'ij utzij upixab', chita uch'awb'al xaq chikojo u'ij. 5I profeta o achi le chi kusaqij taq wach kk'ulmaxik, kya' ni utojb'alil umak che chi are i kamik rumal xixutun che i ch'ojinik chrij Iwajwal Dios chi xixresaj li pa Egipto ipa ix o wi te'eq pa k'ax, xaq rumal xraj iwelsaxik chupam ub'e Iwajwal Dios. Keje ile ksach ni uwach i utz taj chi o chixol yix.
6Tupu lik we awatz, ak'ojol, ami'al, awixoqil chi lik k'ax kana'o xaq tupu awamiy chi lik aya'om ak'ux che, we katutaq chukojik u'ij jun chik tiox chi lik miyet xaq mitene aqajaw achuch keta'am uwach, 7chkixol i jub'an chik dios chi je o naqaj xaq je o naj, xaq we je o jela xaq we jewa che i jyub' ta'aj. 8Lik maya urayijb'al che xaq maya axikin chutayik xaq mawil pich' tob'al uwach, xaq maya awib' puwi. 9Are rajwaxik chi ka'ano chakamsaj, man yet na at nab'e uri chu'anik ile chi kakamsaj i jun chi katutaq chu'anik i utz taj te'uri xaq keje ile kki'an tan chik konojel aj Israel chawijil chik yet. 10Chapuk'u chab'aj k'a kkam na man xraj te'eq awelsaxik pub'e Awajwal Dios, chi xatresaj li pa Egipto ipa ix o wi te'eq pa k'ax. 11Ru' i anik le konojel i winaq aj Israel kketamaj na xaq kkixij ni kib' chu'anik jun mak atzalal pacha ile.
12We o jun tinimit chke konojel i tinimit chi kuya i Ajwal chiwe re kixjeqi chwach, we xketamaj chi xewinaqir jub'an winaq 13chi kkiqel i Dios xaq kkijech'ab'saj kinojb'al i winaq chi je o che i tinimit le, kekitaq chukojik ki'ij i jub'an chik dios chi etamam ti kiwach, 14rajwaxik uri chi yix lik kik'am upam we qatzij xaq we qatzij taj. Xwiri we xiwetamaj chi lik qatzij chi antal i utz taj chixol yix, chi lik ch'am taj, 15lik keikamsaj ni uri konojel i winaq ru' ch'ich' chi je o chupam i tinimit le junam ku' konojel kichikop xaq kichup ni uwach ronojel ni'pa ub'itaq ke. 16Kimol ni uchi' ronojel ub'itaq ke chila pa k'eb'al, xaq kinak' ni a' che i tinimit xaq ronojel ni'pa kimaj chke i ajch'oj chiwij, lik ronojel kichup ni uwach pacha jun porom sipon kojb'al u'ij Iwajwal Dios. I tinimit le kkanaj na ronojel ij saq jut'ub'aj ch'aqa taq ab'aj xaq lik kyijb'ax ti chik.
17Lik nti jun b'iroxik kik'am che i ronojel ni'pa chupik chik re uwach. Man keje ile i Ajwal lik kmi' ti uri i roywal chiwe. Xa ne kuya i utzil chomal piwi xaq ku'an ni chiwe chi kixk'iyarik lik pacha xub'ij chke iwatit imam ujer, 18xwiri we kixkojon che Iwajwal Dios xaq we ki'ano pacha kub'ij ronojel utzij upixab' chi xixintaq che, xaq we ki'an i suk'ulik chwach ire.
Currently Selected:
Deuteronomio 13: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
