Daniel 7
7
Ilik pa wachij ke i kajib' nimaq taq itzel chikop
1Che jun a'ab', re nab'e junab' re rajawinik ma Belsasar pa Babilonia, a Daniel xu'an jun achik' xaq o xril puwach. Are xk'un saq chwach, xutz'ib'aj ni'pa taq i o rajwaxik che chi xrachik'aj. Are iri xutz'ib'aj:
2Yin xwil pinwaram chi kajib' tew chi kpe chikaj lik kuyin upam i nim laj mar. 3Xaqte'et, kajib' nimaq taq itzel chikop, junwi ke'anawik, xe'el li pa mar. 4I nab'e keje ktzunik pacha jun koj, xwiri o uxik' keje pacha re kotxik. Tz'aqat yin kintijin chutaqexik, xkimich' uxik', xkiyak pulew i xki'ayb'a puwi i raqan re chrij, xkitak'b'a anoq pacha taq jun winaq, te'uri xya' jun ranima re winaq.
5I ukab' keje ktzunik pacha jun yum, i juperaj che uch'akul mas yaktajnaq chwach i jun chik juperaj, chi o oxib' b'aq re k'alk'ax puchi' xol uware; xaq xinta chi kkib'ij che: ¡Jat, chatija b'i ni'pa taq i ti' chi kach'ij utijawik!
6I urox keje ktzunik pacha jun b'alam, xwiri o kajib' uxik' chel rij; xaq xwilo chi o kajib' ujolom chi xaq xya' i cho'ab' pu'ab'.
7I ukaj nim laj itzel chikop chi xwil pinwach lik nti usuk', xaq lik xib'in ib', i ucho'ab' lik nti kmajawik. O nimaq taq uware re ch'ich'; xab'iroxik is kutijo xaq is ku'an ch'aqa taq che, ni'pa i kuk'is taj, kuya'ya uwi. Are jun nim laj itzel chikop chi lik junwi chkiwach konojel i jub'an chi yin wilom pa wachik', xaq o lajuj rok'a' che ujolom.
8Tz'aqat yin kintijin chrilik i rok'a', xwilo chi chkixol i rok'a' le xel chal jun ok'a' mas ch'utin, are uri xkimich' b'i oxib' ok'a', keje ile kkiya kan i k'ijib'al che i jun chi xel li k'isb'al re, chi xaq o ub'a'wach pacha re jun winaq xaq o uchi' chi kub'ij taq tzij xa re kojb'al u'ij.
U'atik tzij re i Dios
9Xinmayij ti taqenik,
xwilo xekoj ni jub'an kub'ib'al chi o u'ij,
te'uri xkub'i jun nim laj mam chi
u'u' lik saq pacha saqb'ach,
i uwi pacha lana lik chom saq.
I kub'ib'al chi o u'ij xaq i sotsaq re i raqan lik urep a'.
10I jun raqana re a' kel li chwach ire.
Lik je lajujwinaq kamo' (1,000) i je lajujwinaq kamo' (1,000) i kki'an uchak che,
xaq je jo'chiy waqt'ub' (millón: 1,000,000) i je jo'chiy waqt'ub' (millón: 1,000,000) je tak'al chwach ire.
I je aj-atol tzij xkijeq i lapanik re i molb'al ib',
xaq i wuj chi tz'ib'talik xjaq kiwach.
11Yin kintijin te chutaqexik, lik enaq ink'ux che taq i b'iroxik chi lik re okb'al il chi ral ok'a' ch'utin kub'ij; tz'aqat kintijin chrilik, xkikamsaj i nim laj itzel chikop xaq xki'an ch'aqa taq che, te'uri xkik'aq pa a' re k'atsab'al re. 12Xaq keje i jub'an chik nimaq taq itzel chikop xelsax i kicho'ab', xwiri xkiya chke chi kek'asi na k'a kuriq ni ki'ij.
13Yin xinmayij ti rilik ni'pa taq kwil pinwach cha'ab'. Xaqte'et:
Xwilo chi ktijin uk'unik chupam i sutz'
jun chi kmajaw pacha rak'al jun winaq,
chi x-e chila ipa o wi i nim laj mam;
xaq xki'an che chi xtejeb' pan ru' ire.
14Te'uri xya' i cho'ab' pu'ab', chomalil xaq i ajawinik,
konojel i winaq re nimaq taq tinimit xaq k'iyal taq ch'ab'al kechakun ru'.
I ucho'ab' lik arewi kjaltaj taj,
xaq rajawinik lik arewi kwulijsax taj.
15Yin, ma Daniel, xinna'o chi i kamik xib'rikil lik xinurajawij; xaq lik xink'achir rumal ronojel ni'pa i xwilo, 16xintejeb' pan ru' jun chke i je o chila chi je tak'alik, xaq xintz'onoj utzil che chi kub'ij usuk' ronojel taq ile chwe. Ire xraj ub'ixkil usuk' chwe, xub'ij: 17I kajib' nimaq taq itzel chikop le je are kajib' ajawinelab' chi ke'ajawin ni puwi i jyub' ta'aj.
18Xwiri k-on panoq i ajawinik kya' ni pu'ab' i tinimit re i Nim laj Dios aj chikaj, lik re ni Ire ronojel ij saq.
19Yin kwaj te'eq retamaxik mas chrij i ukaj itzel chikop, chi lik junwi chkiwach i jub'an, man i utzunb'al lik xib'in ib' ktzunik: O uware re ch'ich' xaq i rixk'aq re anch'ich', ronojel is kutijo xaq ku'an ch'aqa taq che, ni'pa i kuk'is taj, kuya'ya uwi. 20Xaq yin kwaj te'eq retamaxik mas chrij i lajuj rok'a', xaq che i ok'a' ch'utin chi o ub'a'wach xaq jun uchi' chi lik k'ax kch'awik, chi lik pacha taq mas nim chkiwach i jub'an chik ok'a', i oxib' ok'a' xetzaqik yab'al kan uk'ijib'al ire. 21Are uri xwilo chi jun ok'a' le ku'an ch'oj chrij i tinimit re i Dios, i lik kuch'ako, 22K'a xupon ni i nim laj Mam, xu'an i atb'al tzij che utinimit i Nim laj Dios, man ya xtz'aqat i ij chi i tinimit re i Dios kuk'am i ajawinik. 23Xub'ij:
I ukaj nim laj itzel chikop lik are ni ukaj ajawinik
chi o ni chwach ulew,
chi junwi chkiwach i jub'an chik.
Kutij nu b'i ronojel i ulew,
xaq kuya'ya ni uwi xaq ku'an ni ch'aqa taq che.
24I lajuj taq ok'a' are i lajuj ajawinelab'
chi kerajawin ni che i ajawinik le.
Chkij ike le kk'iji jun chik che i k'ijib'al re taqanik,
chi lik junwi na chkiwach i nab'e
i lik xaq keresaj oxib' chke i ajawinelab' le.
25Kuyo'ya ni i Nim laj Dios
xaq kok'lal kk'is ni uwach utinimit;
kuch'ob' ujalwachixik u'atb'al tzij i Dios xaq i k'iyal taq nima'ij,
i utinimit i Dios o ni pu'ab' che
oxib' junab' ru' nik'aj.
26Xwiri i aj-atol tzij ku'an ni jun atinik tzij
xaq kelsax ni cho'ab' pu'ab'
chi lik kusachsaj uwach ronojel.
27I ajawinik, i cho'ab' xaq chomalil
re konojel i ajawinik chwach i jyub' ta'aj,
lik kya' ni che utinimit i Nim laj Dios aj chikaj.
I rajawinik lik o ni ronojel ij saq
xaq konojel i tinimit re uwach ulew
kechakun ru' xaq kekojon ni che.
28Iri are k'isb'al re i tzijonik. Yin, ma Daniel, lik xinkanajik kinch'ob'on che xaq lik xinu'on saqt'ur rumal; xwiri lik mijun che xinlap wi.
Currently Selected:
Daniel 7: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
