Daniel 4
4
Uch'ujlal i ajawinel ma Nabucodonosor
1Yin in ajawinel ma Nabucodonosor, kwaj i chomb'al ib' xaq i elik chisaq chke i winaq ke konojel taq i tinimit, nimaq taq tinimit xaq i kich'ab'al konojel i je o chwach ronojel ulew. 2Kwaj yin kiwetamaj wach i nimaq taq b'iroxik chi lik chom u'anom i Nim laj Dios chwe yin. 3¡Lik nimaq taq anik xaq i nimaq taq il! I rajawinik lik knajtin ni uwach ronojel ij saq i ktiki chu'anik lik nti uk'isik, arewi k-e chke konojel i lemajil.
4Yin in ma Nabucodonosor, utz te'eq in jeqel chupam i nim laj wachoch xaq lik kinqusij te'eq jun chom laj k'aslemal re elb'al chisaq. 5Xwiri che jun a'ab', are inkotz'ol chik, xin-an jun achik' chi lik xinuxib'ij, xaq i ch'ob'onik i rilik b'iroxik pa wachij chi lik xinkikoj il. 6Are uri xinya i taqanik chi kek'un wu' konojel i o kino'oj aj Babilonia, re kkib'ij usuk' chwe wach kel i wachik'. 7Xek'un konojel ni'pa i aj-ij, ajnanel, ajch'ob'onel aj Babilonia, xaq i jub'an chi keta'am wach ki'anom i ch'umil, yin xinlap i wachik' chke xwiri xetiki ti chub'ixkil chwe wach kraj ub'ixkil i wachik'. 8Pa k'isb'al re xk'un a Daniel, chi xaq ub'i a Beltsasar, chi are ub'i in-dios, chi uk'aslemal uk'am rumal utewal i lo'laj Dios, i xinlap i wachik' che chi keje iri: 9A Beltsasar, kaj-atzil i ajnanel, yin weta'am chi utewal i lo'laj Dios at rok'am, xaq aweta'am ronojel ni'pa taq i etamam ti uwach. Chata uri, wach wilom pwachik', i chab'ij chwe wach kraj ub'ixkil. 10Are iri xwil pinwach are tz'aqat inkotz'olik:
Punik'ajal i ulew o jun nim laj che' naj rij.
11I che' xk'iyik xaq lik x-on nim upam;
i utzam lik kuyin an i kaj, lik k-aljin li uwi chke
i k'ijib'al chi lik k'a naj je o wi loq chwach i jyub' ta'aj.
12Chi lik chomiq taq uxaq
xaq lik k'i uwach,
chi lik ktiki chkitzuqik konojel.
I itzel laj taq chikop aj pa taq es kemujan chuxe',
che i u'ab' kki'an kisok i tz'ikin,
i kik'aslemal konojel i je o chwach i jyub' ta'aj are Ire kyawik.
13Xaqte'et xwil pinwach jun ángel ajchajinel chi ktijin li uqajik chikaj, 14chi ksik'in chub'ixkil:
Chik'aqa i che' pulew xaq chik'atzij u'ab',
chiwesaj uxaq, xaq chikichersaj b'i uwach.
Che'anmaj i chikop chi kemujan chuxe'
xaq i tz'ikin chi je o chwi taq u'ab'.
15Xwiri chiya kan i ukutam xaq i ra' pulew;
chixima ru' karena re ch'ich' xaq re anch'ich',
xaq chiya kan chila pa taq es.
Chtzaq ni uxaqk'aj puwi ire,
xaq es na kutijo junam ku' i chikop aj pa taq es.
16Chu'ana ch'uj ujolom,
chu'ana pacha ujolom jun chikop,
i k'ax le chuch'ija ni wuqub' junab' che.
17Iri are i k'oqb'al chi kich'ikom
i lo'laj taq ángel chi je ajchajinelab',
man keje ile konojel i winaq chketamaj
chi i Nim laj Dios aj chikaj lik o ucho'ab'
pkiwi i winaq chi kerajawinik, lik are Ire kuya i ajawinik che i jun chi kraj kuya che,
xaq ku'an aj-atzil puwi jun nim laj tinimit
che i jun chi lik ajaj laj winaq.
18Iri are i achik' chi yin in ajawinel ma Nabucodonosor, xwachik'aj. Wo'or, a Beltsasar, chab'ij chwe wach ke'eloq, man mijun chke i o kino'oj re inrajawinik utom ti ub'e; xwiri yet kattiki ni chub'ixkil chwe wach ke'eloq, man awu' yet o utewal i lo'laj Dios.
19Are uri a Daniel, chi yatal pub'i a Beltsasar, xok ni chuch'ob'ik, lik uxim rib' rumal ni'pa i ch'ob'onik chi kpe pujolom. Xwiri yin in ajawinel, xinb'ij che: A Beltsasar, mattok il che taq i achik' chi wachik'am yin, xaq mitene chrij ub'ixkil usuk' chwe. I a Beltsasar xula' uwach: ¡Ay, ronojel ni'pa taq i usuk' i achik' chtzaq ni pkiwi i ajch'oj chawij yet, Nim laj Winaq! 20I nim laj che' naj uwi chi xaq nim upam chi xawil yet, Nim laj Winaq, chi kupon te'eq utzam k'a chikaj chi lik k-aljin li uwi chke i k'ijib'al chi lik k'a naj je o wa loq chwach taq ulew, 21chi o chomiq taq uxaq xaq k'i uwach chi ktiki chkitzuqik konojel, xaq umujal ketejeb' i chikop aj pa taq es chuxe' i che taq u'ab' kki'an kisok i tz'ikin, 22i che' le are yet, Nim laj Winaq, chi lik at k'iynaq xaq nim a'ij. I unimal a'ij yet, Nim laj Winaq, lik k'iynaq chi lik kupon unimal k'a chikaj, xaq i ajawinik lik enaq puwi ronojel i jyub' ta'aj. 23Yet, Nim laj Winaq, xaq xawilo chi jun lo'laj ángel ajchajinel, kqaj li chikaj xaq kub'ij: Chik'aqa i che' pulew xaq chisachsaj uwach, xwiri chiya kan ukutamil pulew xaq i ra'; chixima ru' karena ch'ich' xaq anch'ich' i chiya kan pa taq es. Chtzaq ni uxaqk'aj puwi ire, xaq chutija i es junam ku' i chikop aj pa taq es che wuqub' junab'. 24Iri are kuya retamaxik i k'oqonik chi utaqom li Nim laj Dios aj chikaj pawi yet, Nim laj Winaq. 25Xaq yet, Nim laj Winaq, katelsax ni chkixol i winaq i katjeqi ni ku' i chikop; katij ni es pacha taq i b'oyexab', xaq uxaqk'aj lik kuch'enensaj ni ach'akul. Lik keje ni ile katk'asi che wuqub' junab' k'a kawetamaj na chi i Nim laj Dios aj chikaj nim ucho'ab' pkiwi konojel i ajawinelab', chi xaq are Ire kukoj jun aj-ok'al utzam pacha kraj Ire. 26I taqanik chi k-anik, chi kya' kan i ukutamil xaq i ra' i che' pulew, ile ke'eloq chi kattzalij chik yet, Nim laj Winaq, pa ajawinik are kawetamaj chi i Dios are Ire o ucho'ab'. 27Rumali yet, Nim laj Winaq, chakojo inpixb'aniki: Cha'ana che ak'aslemal suk'ulik xaq matmakun chik; chasacha uwach ni'pa i utz taj chi ka'ano, are cha'ana cheato i nib'a'ib'. Moqxa keje ile ak'aslemal yet, Nim laj Winaq, kjeqi chik pa chomb'al ib' xaq kel chisaq.
28Ronojel i b'iroxiki chi xya' retamaxik che i ajawinel ma Nabucodonosor, lik x-antaj na: 29Are ik'awnaq chik jun junab', tz'aqat kmalkat i ajawinel puwi i nim laj rachoch pa Babilonia, 30xub'ij: ¡Chiwila pe' i tinimit Babilonia lik nim! Yin lik ru' i nim laj incho'ab' xinyako lik pacha uchuch inrajawinik, keje ile kinya kan k'utb'al re i nim laj in-ij.
31K'a ktijin i ajawinel che i lapanik are xtataj jun ch'awb'al chikaj, chi xub'ij: Chata iri ajawinel ma Nabucodonosor. I awajawinik, chi kk'is wi; 32lik katelsax ni chkixol i winaq i katjeqi ni ku' i chikop; katij ni es junam ku' i b'oyexab' che wuqub' junab', k'a kawetamaj na chi i Nim laj Dios nim ucho'ab' pkiwi i nimaq taq tinimit re i jyub' ta'aj, chi lik are Ire kukoj aj-ok'al utzam chi kraj Ire.
33Lik juntir x-antaj i k'oqonik chi b'italik, i ma Nabucodonosor lik xelsax chkixol i winaq; xutij es pacha i b'oyexab', i uxaqk'aj xuch'enensaj uch'akul, chi lik xek'iy i rismal xaq i rixk'aq, pacha taq chik rismal xaq rixk'aq jun kotxik.
Ukunaxik ma Nabucodonosor
34Are xtz'aqat i ij re i k'oqonik, yin, ma Nabucodonosor, xintaqen chikaj i xinna'o chi xinutzir che inch'ujlal; are uri xinkoj u'ij i Nim laj Dios i xinb'ixaj ru' i tziji chi arewi k'aslik ronojel ij saq:
I ucho'ab' lik chnajtin ni ronojel ij saq;
i rajawinik lik arewi k-e ij saq chrij chke konojel i lemajil.
35Chwach ire, lik nti ki'ij
i winaq chwach i jyub' ta'aj.
Ire ku'ano pacha kuch'ob'o,
keje pacha ku'an i chikaj xaq keje ile ku'an chwach ulew.
Lik mijun ktiki chu'atixik ucho'ab'
xaq mitene ktz'onox taq che b'uchak ku'an ile chi ku'ano le.
36Che i jo'taj tan le xk'un chik innojb'al, i uchomalil i inrajawinik, in-ij xaq innimal. I je inpixb'anel xaq nimaq taq ajpatanib' re i inrajawinik xek'un chintzukuxik, are uri xink'iji chik chwach i rok'axik utzam i nim laj intinimit, chi lik xnimar mas in-ij chwach in o wi te'eq nab'e.
37Rumali wo'or, yin, ma Nabucodonosor, kinb'ixaj, kinkoj u'ij xaq kinb'ij uchomal i ajawinel re chikaj, man ronojel ni'pa i ku'ano lik saqil xaq suk'ulik, xaq kuqajsaj ki'ij i jub'an chi kkikoj ki'ij.
Currently Selected:
Daniel 4: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
