Colosenses 1

I ma Pablo xutz'ib'aj b'i wuj chke aj Colosas

1Yin in ma Pablo in rapostol i Jesucristo, man lik keje xraj i Dios ile chwe, junam ru' i qachalal chwach i Cristo a Timoteo. 2Kintz'ib'aj b'i chiwe yix chi lik ix elsam re i Dios chila pa tinimit Colosas, yix ix qachalal chwach i Cristo chi lik ix terejnaq chrij i Cristo. I Qaqajaw Dios chuya ni utz olem chiwe, xaq i uxlanb'al k'uxij.

Tioxinik che i Dios

3Are kojlapan ru' i Dios piwi yix, lik arewi kqatioxij che Ire chi Uqajaw i Qajwal Jesucristo, 4man qatom utzijol chi yix lik o ukub'ib'al ik'ux che i Jesucristo, xaq lik k'ax keina konojel ni'pa i kiya'om kib' che i lo'laj tinimit ch'am re i Dios. 5Keje ile kixtijin chu'anik man kul ik'ux che chi kiwil na wach uyijb'am i Dios chiwe chila chikaj. Xita usuk' ile wach uyijb'am chiwe are xita i saq laj tzij; i tzij le are i utz laj tzij k'ak' re i Dios chi uya'om Ire chqe. 6I tzij le chi b'ital kan chiwe, ktijin upaxsaxik uwach chwach ronojel i jyub' ta'aj; lik je k'i i winaq ketijin chukojik. Xaqjun ru' pacha i'anom li yix are lik xita ub'e i tzij re i k'axnab'al uk'ux i Dios, lik xikojo. 7Are i ma Epafras xk'utuw ile chiwe, ire lik k'ax kqana'o. Lik chakunnaq qu' yoj, xaq lik utz u'anom che uchak i Cristo chixol yix. 8Are ire ub'im chqe wach i nim laj k'axnab'al ik'ux chiwach, man o i Lo'laj Utewal i Dios iwu'.

9Rumali, are xqata utzijol, qamayim ti utz'onoxik che i Dios piwi; kqatz'onoj che chi ku'an chiwe lik kita ni ub'e ronojel wach kraj ire chiwe, xaq kuya ni i nojb'al, xaq kuk'ut ni chiwe wach kuch'ob' ire. 10Keje ile, ki'an ni che iwib' pacha kmajaw chiwe yix chi ix re chik i Ajwal. Keje ile, lik kkikot ire iwu', xaq ru' ronojel i ki'ano. Lik k'iyal i utz kriqtaj che ichak, xaq lik kiwetamaj ni unojb'al i Dios. 11I ucho'ab' i Dios, lik nim, lik chom. Kqatz'onoj che chi ru' i nim laj ucho'ab' le kukowirsaj ni icho'ab', keje ile kich'ij na wach taq i kik'ulmaj. Lik ksach ti uri unimal ik'ux, xaq ronojel i kikotemal lik kisach taj, 12xaq chitioxij che i Ta ru' kikotemal, man Ire uk'utum chiwe yix wach uk'amik i kuxtab'al re i saq chi kuya ni chke i winaq chi je elsam re i Dios. 13I Dios oj resam pu'ab' i equmal, xojuk'am b'i ipa krajawin wi Uk'ojol chi are i Cristo chi k'ax kuna'o. 14Rumal ukamik ire, ya tojtajnaq chik i qelb'al chisaq; xe'eloq chi kuytajnaq chik ni'pa i qamak.

15I Dios, lik iltal ti uwach, xwiri x-iltaj uwach che Uk'ojol; chi are i Cristo, chi lik xa jun olik xaq lik ax o wi chkiwach konojel ni'pa taq i olik, 16rumal Ire i Dios xu'an ronojel i o chikaj, xaq ronojel i o chwach ulew. Are ire xuyijb'a ronojel ni'pa i k-iltajik, xaq ronojel ni'pa i k-iltaj taj; xaq ni'pa taq i je tewalil chi pacha je atol tzij. Ronojel ni'pa i olik are ire anawnaq xaq lik re Ire. 17I Cristo, ax o wi chwach ronojel ni'pa i olik; are ire kok'aw pusuk' ronojel i olik. 18Xaq xwi ta la ile, are Ire qawi qajolom yoj chi oj jutzob'aj re i Dios, xaq yoj oj pacha uch'akul Ire, chi ajya'ol re uk'aslemal i jutzob'aj le, man are i nab'e chi xwalij che i kamik. Keje ile antal che man ke'eloq chi ire o puwi ronojel ni'pa i olik. 19Keje ile xu'an i Ta chikaj man xraj Ire chi che Uk'ojol kriqtaj wi ronojel i lo'laj cho'ab'. 20Xaq xraj chi Uk'ojol le lik keuchomarsaj konojel i winaq ru' i Ta, ronojel i olik, we aj chikaj, xaq we aj chwach ulew. Are ukik'el i Cristo chi xro'taj chwach i krus ile are i chomarsab'al ke xu'ano.

I utz chi xuya ukamik i Ajwal Jesucristo

21Yix ujer lik ix aj naj te'eq, xaq ix ajch'oj te'eq chwach i Dios piwanima, rumal i utz taj chi ki'an te'eq. 22Xwiri wo'or lik ix uchomarsam chik ru' Ire, rumal ukamik Uk'ojol, are xk'un chi chwach i jyub' ta'aj. Keje ile xu'ano man kixel yix lik chom ik'ux, ch'am ix olik, lik nti chik mak atzalal chiwij are kixuya i Cristo chwach i Dios. 23Keje ile kel chiwe, xwiri we kimayij ti ukub'ib'al ik'ux che i Cristo, we lik ix jikil che, xaq we kb'a'krij ti ik'ux che i roy-exik i utz chi kpe ni piwi. I utz laj tzij k'ak' re i Dios chi ya itom chik, are i tzij chi wo'or ktijin ub'ixkil ronojel uwach i jyub' ta'aj; i yin in ma Pablo xaq in ajb'il re.

I ma Pablo ajchak chkij i jutzob'aj re i Cristo

24Yin, wo'or, uyej kutij inch'akul anb'al utz chiwe yix. Xwiri kinkikot rumal, man keje ile kintijin chuto'ik i Cristo ru' wach taq i uyej k'a kraj tob'al ke i je jutzob'aj re i Dios, chi are uch'akul i Cristo. 25I Dios u'anom chwe chi in rajchak chkij i jutzob'aj chi je re chik i Cristo, anb'al utz chiwe yix uya'om chinqul chi kinpaxsaj ronojel utzij. 26I usuk' i tzij le uwam te uwach ujer; keje u'anom li ile k'iyal junab', lik k'a chuxeb'al loq. Xwiri, wo'or i Dios u'aljinsam usuk' chke i je re Ire. 27Keje ile u'anom i Dios man xraj ku'aljinsaj na wach i nim laj utz uch'ob'om chiwe yix chi ix ti aj Judío winaq. I usuk' i xinb'ij le are iri: Chi i Cristo o piwanima yix, rumal uri, kiwil ni nim laj chomal chi iwoy-em.

28Yoj kqapaxsaj utzijol i Cristo. Keqapixb'aj konojel i winaq, xaq kqak'ut chke chi lik rajwaxik kkita ni ub'e. Keje ile kqa'ano anb'al re chke chi lik je suk'ul pkik'ux chwach i Jesucristo. 29Rumali, lik kinchakunik, lik kinya incho'ab' chu'ankil, lik are incho'ab' chi yatal chwe rumal i Cristo chu'ankil inchak.

Currently Selected:

Colosenses 1: ACHICUB

Highlight

Compare

Copy