Hechos 24

Tob'al rib' ma Pablo chwach i ma Félix

1Jo'ob' ij rik'awik ile, i ma Ananías chi atz laj rajpatan i Dios, xupon pa Cesarea junam ku' jujun uwi ujolom ke aj Judío kachi'ilam b'i ma Tértulo chi ajkojol kitzij i winaq chwach i atb'al tzij, ike xeupon chukojik umak ma Pablo chwach i ma Félix chi aj-ok'al utzam i jalajuj taq tinimit. 2Are xkik'am li ma Pablo chkiwach chila i pa kimolom wi kib', i ma Tértulo xujeq ukojik umak, xub'ij che ma Félix:

—Mantiox chawe, nim laj aj-ok'al utzam jalajuj taq tinimit, man o chomb'al ib' chqaxol xaq mantiox che ano'oj chi lik a'anom nimaq taq b'iroxik pqatinimit elsab'al qe chisaq. 3Ronojel ile kya' chqe xaipa oj o wi, rumali lik kqatioxij chawe ru' ronojel qak'ux, nim laj winaq ma Félix. 4Xwiri kwaj ti katinb'ay mas, xwi kintz'onoj jun utzil chawe chi chojata ni jub'i'. 5I achi le lik xa ch'oj kutzukuj chqaxol, lik chwach ronojel i jyub' ta'aj, ktijin chpetsaxik ch'oj chkixol aj Judío xaq are ire ajk'amol utzam chke i jutzob'aj winaq chi “aj nazareno”#24.5 Kib'i i winaq yatalik chi je kojonnaq che i Dios, man je teren chrij i Jesús chi aj Nazaret.. 6Xwi ta la ile, xaq xraj uqajsaxik u'ij i rachoch i Dios; rumali yoj xqachapo xqamin prexil. 7#24.7 Chupam i nab'e taq uwuj i Dios kriqtaj ti i versículo ri. Iri xu'on panoq te'uri xkiya ru': Xwiri ma Lisias chi aj-ok'al utzam chke i achiyab' chi je yij che i ch'oj, xumin rib' xaq lik pa ch'oj xresaj b'i pqa'ab'. 8Utz we yet katz'onoj che, man keje ile kawetamaj ni ronojel wach usuk' ile.

9I aj Judío chi je o chila, xkilo xaq xkisaqij chi ronojel ile lik qatzij. 10Are uri i aj-ok'al utzam i jalajuj taq tinimit xuk'ut ru' u'ab' che ma Pablo chi chch'awoq. Are uri ma Pablo xub'ij:

—Lik ru' jun nim laj ink'ux, kinb'ij intzij chawe re tob'al wib', man yin weta'am chi k'iyal chik junab' at o pa atb'al tzij pkiwi i winaq re i tinimiti. 11Yet, nim laj winaq, utz kattak'i ni praqan, yin k'ate kab'lajuj ij iri wuponik pa Jerusalén chukojik u'ij i Dios. 12Mijun in uriqom we kintijin taq chu'anik ch'oj ru' jun chik winaq xaq mitene kintijin taq chi ch'oqowik ku' i winaq prachoch i Dios, mitene pa taq ja re molb'al ib' ke i judío xaq mitene pa jalajuj taq k'ijib'al re i tinimit. 13I winaqi ketiki ti chu'aljinsaxik we qatzij in-anom taq inmak pacha kkib'ij. 14Xwiri lik kinsaqij iri, chi lik qatzij yin kin-an inpatan chrij i Dios, chi are ki-Dios inqajaw inchuch, chrij pacha kub'ij i k'ak' b'e chi kkib'ij taq ike chi utz taj, xwiri, yin kinkojon che ronojel ni'pa i tz'ib'tal kan chupam i wuj re ujer atb'al tzij, kumal i je profeta. 15Yin o ukub'ib'al ink'ux che i Dios, keje pacha ike, chi are i roy-exik che i Dios chi i kamnaq kewalij che i kamik, ni'pa i je utz xaq ni'pa i je utz taj. 16Rumali yin lik kinkoch'ij wib' chu'anik ch'am che ink'ux chwach i Dios xaq chkiwach i winaq.

17Chrijil chik k'iyal junab' are xinupon pa jalajuj taq tinimit; te'uri xintzalij chali pintinimit Jerusalén chkito'ik i nib'a'ib' xaq chusujuxik insipon chwach i Dios. 18Yin are kintijin chu'anik ile, chrijil chik u'anik ch'am che wib' chrij pacha i rawasil chi kqa'an yoj oj aj Judío; are uri jujun aj Judío chi je aj pa tinimit Asia xinkiriq chila prachoch i Dios, i je are ike xe'anaw i ch'oqowik, tupu lik ne te k'i i winaq je o chila. 19Je are ike le kmajaw chke chi kek'un chukojik inmak chawach, we lik qatzij o inmak kkib'ij. 20We ntaj, chkib'ij i je o waral, wach inmak xkiriqo are in o chila chkiwach i jutz'ob'aj unimaqil chi kki'at tzij pkitinimit aj Judío. 21Moqxa are inmak iri xin-ano, chi lik ko xinb'ij i tziji chkiwach: Wo'or kixtijin chu'anik i atb'al tzij pinwi xa rumal kinkojo chi i kamnaq kewalij che i kamik.

22I ma Félix lik reta'am wach usuk' i K'ak' B'e, rumali xuch'aqb'a u'anik i atb'al tzij xaq xub'ij:

—Are kk'un ma Lisias chi atz laj aj-ok'al utzam chke i achiyab' chi je yij che i ch'oj aj Roma, kwetamaj usuk' ich'oj yix le —xcha.

23Are uri ma Félix xutaq ub'ixkil che i kaj-atzil i achiyab' chi je yij che i ch'oj aj Roma chi chutz'apij chik ma Pablo prexil, xwiri xaq xub'ij che chi ki'atij ti che jujun b'iroxik chi kraj k-ono xaq we ksolix taq kumal i ramiy.

24Are xik'aw keb' oxib' ij, xupon chik ma Félix junam ru' i rixoqil chi ati Drusila, ire aj Judío. Are uri xutaq usik'ixik ma Pablo, xaq xuta che wach taq kulap chrij i kojonik che i Jesucristo. 25Xwiri are xuta chi ma Pablo xok che i lapanik chrij jun k'aslemal suk'ulik, xaq wach ujek'ik rib' ku'an chwach i utz taj che uk'aslemal, xaq xlapan chrij u'atb'al tzij i Dios chi ku'an pa k'isb'al ij; are uri i ma Félix le lik xuxij rib' che wach i xuta, i xub'ij che:

—Jat, k'a te katinsik'ij tan chik are k-antaj wumal —xcha.

26Xwiri i ma Félix, roy-em te'eq chi ma Pablo kusujuj pwaq che elsab'al b'i re prexil; rumali lik k'iyalmul xusik'ij re klapan ru'. 27Keb' junab' chik xik'awik chi ma Félix aj-ok'al utzam i jalajuj taq tinimit; te'uri xel che upatan, xok i ma Porcio Festo puk'exel. Xwiri i ma Félix kraj chi lik utz kkanaj chkiwach i aj Judío, rumali chi are xel che upatan xukanaj kan ma Pablo prexil.

Currently Selected:

Hechos 24: ACHICUB

Highlight

Copy