2 Corintios 6
6
1Yoj chi oj rajchak i Dios, lik kqab'ij chiwe chi lik mixutuj i nim laj rutzil uk'ux i Dios chi uk'utum chik chiwe. 2Chk'un chik'ux wach kub'ij uwuj i Dios chi tz'ib'tal kanoq:
“Are kuriq i ij re i utzil chomal, xatinta;
are kuriq i ij elsab'al awe chisaq, lik xatinto.”#6.2 Keje ile tz'ib'tal kanoq: Isaías 49.8.
Rumali kqab'ij chiwe, are i ij iri wo'or re i elb'al iwe chisaq.
K'amb'al pamaj i tzob'aj chi je teren chrij i ma Pablo
3Lik kqaj taj we o taq jun kojulap ru' i qachak, rumali chi yoj lik kqakoch'ij qib' chu'anik i utz. 4Ru' ni'pa i kqa'ano kqak'utu chi oj rajchak i Dios. Ru' unimal qak'ux qach'ijom ni'pa i uyej petnaq pqawi, ni'pa i k'ax xaq ni'pa i rajwaxik chqe. 5Qatijom qalo'xik, qatijom i prexil; qatijom i kech'oqow chqij; qatijom i k'ax laj taq chak; qach'ijom waram; qatijom numik. 6Xaq lik kqak'ut ru' qak'aslemal chi lik oj ch'am. Xaq k-aljinik, man lik qeta'am i saq laj tzij re i Dios, xaq o unimal qak'ux, xaq lik oj utz chke i winaq. K-aljinik chi oj rajchak i Dios man i Lo'laj Utewal Ire oj rok'am; xaq k-aljinik man o i k'axnab'al qak'ux lik saqil. 7Xaq kqa'aljinsaj chi oj rajchak i Dios man kqapaxsaj i tzij chi lik saq laj tzij; xaq are kojik'aw chupam i jalajuj taq k'ax lik kqach'ijo, xaq kqato qib' man kqa'an i utz xaq kqab'ij i saq laj tzij. 8Olik koksax qa'ij; olik xa kqajsax qa'ij. O i utz kech'aw chqij, xaq je o i k'ax kech'aw chqij. Tupu kqab'ij i saq laj tzij xwiri kkib'ij chqe chi oj t'oronel. 9Olik kki'an chqe pacha keta'am ti qawach, tupu lik etamam qawach. Olik kqatij i kamik, xwiri kojkam taj. Olik mas kqatij qalo'xik, xwiri oj kikamsam taj. 10Tupu kojb'isonik, kqasach ti qakikotemal. Tupu oj nib'a', je k'i kqa'an b'eyom chke. Tupu nti ub'itaq qe, lik qe yoj ronojel ni'pa i olik.
11Ix qachalal chwach i Cristo chila pa Corinto, qasaqim chik ronojel i qanojb'al chiwe; lik nti quwam uwach chiwe. 12Yoj lik k'ax kixqana'o, xwiri yix lik keje ti k'axnab'al ik'ux ile chqe yoj. 13Wo'or kinb'ij chiwe, pacha taq in iqajaw: Xaqjun uk'axna'ik qib' chqa'ana; chqakub'a qak'ux chqawach.
Ujek'ik qib' che i utz taj
14Wachalal, mijunamsaj iwach ku' i ne te re i Cristo; mi'an iwe pacha kki'an ike,#6.14 Moqxa kel chiwe pacha k-on jun kaway ru' jun b'oyex, kachi'il ti kib' ke'ok pa yuku. Deuteronomio. 7.3; 22.10. Mi'an keje ile, man i utz nti re che i utz taj; xaq i saq nti re che i equm. 15Xaq i Cristo, nti re che Itzel; xaq i jun chi kukoj i Cristo, nti re che i jun chi kukoj taj. 16Xaq i rachoch i Dios, nti re chke i tiox chi xaril je antalik. Man yix ix rachoch chik i Dios k'aslik. Qeta'am ile, man keje iri kub'ij utzij i Dios chi tz'ib'tal kanoq:
“Yin kinjeqi ni ku'; kinb'in ni chkixol; (Kin-an pacha je wachoch chke).
Ke'eloq chi Yin in Dios chke ike,
xaq ike je intinimit Yin.”#6.16 Keje ile tz'ib'talik: Levítico 26.12; Jeremías 32.38; Ezequiel 37.27.
17Xaq tz'ib'tal kan chupam uwuj i Dios:
“Chixel chkixol i je aj-anol utz taj;
miwachi'ilaj iwib' ku'. Mi'an i utz taj
Man keje ile Yin kixink'ulaj ni uri wu'.
18Yin ut kin-el chiwe yix in Iqajaw,
xaq yix kix-el chwe yin, ix inmi'al walk'uwal.
Keje ile kub'ij i Ajwal chi ronojel ktiki che.”
Currently Selected:
2 Corintios 6: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
