2 Corintios 12

I ma Pablo xril ilanik pa wachij xaq i aljinsanik

1Nti kel wi we jun kukoj u'ij, xwiri yin wo'or o uchak kin-ano. Kinb'ij, wach u'anom i Ajwal chwe, wach i wilom pinwach rumal ire, xaq wach u'aljinsam chwe. 2O jun achi, lik weta'am uwach, lik re chik i Cristo. Ire, pa kajlajuj junab' kanoq, xaqte'et xk'am b'i k'a che urox kaj. Yin weta'am taj we x-e uch'akul ru', o we xwi i ranima x-ek, xwi i Dios reta'am. 3Xwiri lik weta'am chi i achi le k'amom b'i chikaj. Weta'am taj we xk'am b'i uch'akul ru', o we xk'am tu b'ik, xwi i Dios reta'am ile. 4I achi le k'amtal b'i che i chom laj k'ijib'al chikaj, pa xuta wi i tzij chi mijun winaq kriqaw ub'ixkil. 5Yin lik kinkoj ni u'ij jun winaq pacha i achi le; xwiri kinlap ti wib' yin, wach i utz kin-an yin. Xwi kinlap ile chi nti in-ij, nti qas incho'ab'. 6Qatzij, we kwaj kinkoj in-ij,#12.6 Rumal wach xewila, lik o usuk' man i achi kinb'ij le, are yin. are ti ch'uj laj tzij kinb'ij, xa are i saq laj tzij. Xwiri yin kwaj ti kinlap wib' man kwaj taj we xa rumal i kinb'ij le kkib'ij ni winaq chi yin mas o in-ij. Xwi kwaj yin to' kinkilo, to' kinkita, te'uri kkib'ij we utz i kintijin chu'ankil. 7Ni'pa i xwilo chila chikaj, lik nim u'ij uchomal. Rumali xpe jun k'ax chwe, pacha jun k'ix o chupam inch'akul; pacha jun utaqon Itzel ku'an k'ax chwe, man keje ile kinkoj ti in-ij ru', wach i xwilo. 8I k'ax le, lik oxmul intz'onom che i Ajwal chi kresaj chwe. 9Xwiri, i Ajwal ub'im chwe: “#12.9 Kwesaj taj.Are o i uchak chawe are i k'axnab'al ink'ux; i incho'ab' mas kuriq uchak chawe are nti acho'ab' yet”; keje ile xub'ij chwe. Rumali kinkikotik man weta'am chi utz we nti qas incho'ab', man keje ile k-aljin ni ucho'ab' i Cristo chwe. 10Rumali kinkikotik, are k-aljinik chi nti qas incho'ab'; xaq kinkikotik, are kinyo'yax kumal i winaq; xaq we o rajwaxik chwe; xaq we o kkitzukuj ch'oj chwij; xaq we kintij i k'ax. Lik kinkikot chuch'ijik ronojel ile rumal i Cristo, man we nti qas incho'ab', are uri kel chwe o mas incho'ab' rumal ire.

I ma Pablo kk'achir chke aj Corinto

11Iwumal yix, yin xinlap wib' kojb'al in-ij. Xa pacha in ch'uj xinlapan iwu', xwiri are te'eq yix kib'ij we utz kintijin yin chu'anik. Yix lik ikojom ki'ij i jub'an apostolab', xwiri ike nim ti ki'ij chwach in-ij yin. Qatzij ile, tupu nti in-ij yin. 12Are xinchakun iwu', lik ru' unimal ink'ux xin-ano, x-aljinsax chiwe chi lik in saqil laj apóstol: Xiwil i nimaq taq il, xaq i nimaq taq anik re i Ajwal, xaq xiwil jub'an chik k'utb'al re chi o i Ajwal wu'. 13Yin junam iwilik xin-ano pacha xin-an chke i jub'an chik jutzob'aj re i Dios. Xwiri, xintz'onoj ti tzuqb'al wib' chiwe yix, xinya ti wib' chiqul. We utz ti ile xin-ano, ¡lik chikuyu inmak!

I ma Pablo kutzijoj tan chik u'enam pa solinik

14Wo'or in yij chik che uroxmul waqan chi kin-e chisolixik; we xinupon iwu', kintz'onoj ti tzuqb'al wib' chiwe. Are yix kixwaj; are ti ub'itaq iwe. Jun qajawxel kutz'onoj ti tzuqb'al rib' chke i ch'utiq; are i qajawxel keutzuq i rak'al. 15Yin lik ronojel ink'ux kink'is ni inpwaq, kink'is ni incho'ab', tob'al iwe yix; keje yin ile chiwe. Xwiri kwil yin we mas nim i k'axnab'al ink'ux chiwe yix, are uri xa mas k-on pich' i k'axnab'al ik'ux yix chwe yin.

16Yix, moqxa kib'ij chi qatzij nti xintz'onoj chiwe, xwiri moqxa o jujun chiwe kkib'ij chi xa saqlej innojb'al chu'ankil ile; xa kintijin chit'orik che i pwaq chi wo'or kojtijin chumolik, moqxa keje ile kib'ij. 17¿Xatab'a o jun intaqom b'i iwu' chi xa t'orb'al iwe ku'ana? Mijun. 18Xinb'ij che i ma Tito chi kixusolij, xaq xintaq b'i jun qachalal chwach i Cristo ru'. Iwonojel yix iweta'am chi i ma Tito mijulaj ix ut'orom. Xaq iweta'am chi xaqjun i qak'ux yoj ru' ire, man xaqjun i kqa'ano.

19Wachalal chwach i Cristo, ronojel i xinb'ij le, moqxa kib'ij yix chi xa tob'al wib' chiwach. Xwiri rumal ti ile xinb'ij, xa are rumal unojb'al i Cristo; lik chwach i Ajwal xinb'ij ile. Wachalal chi kixwaj, ronojel wach i kin-ano, xa are anb'al utz chiwe yix. 20Man kinch'ob' yin, are kinupon iwu', moqxa kixinriqa chi utz ti i'anom, moqxa kixtijin ti chu'anik pacha i kwaj yin chiwe. We keje i'anom ile, xaq kixkikot ti uri yix chwe yin. Kinch'ob' yin, are kinuponik, moqxa to' ch'oj kixtijin chu'anik; moqxa ktitat ipam che iwachi'il xa rumal o u'ij chiwach yix; moqxa to' kipetsaj iwoywal; moqxa kixinriqo xa i jachom b'i iwib' pa taq tzob'ajil. Kinch'ob' yin moqxa kixtijin chunuk'ik tzij chiwach; moqxa kiyo'ya iwib' chiwach; moqxa to' nim ki'an che iwib'; moqxa kixtijin chu'anik pacha to' kich'ob' yix chijujunal. 21Kinch'ob' yin, are kinupon julaj chik iwu', moqxa i Ajwal ku'an tan chik chwe chi kink'ix ni iwumal yix rumal wach i ki'ano. Moqxa ix k'i kino' ni iwumal, rumal imak re ujer chi iwo'tam ti kanoq. Moqxa imayim ti kan u'ankil i ch'am taj, xaq u'ankil i urayijb'al i ch'akul chi utz taj. Moq keje ile kixinriqa kinch'ob' yin.

Currently Selected:

2 Corintios 12: ACHICUB

Highlight

Compare

Copy