1 Tesalonicenses 1
1
Uya'ik pan rutzil kiwach i qachalal aj Tesalónica
1Yin in ma Pablo, junam ru' i ma Silvano xaq a Timoteo, kqataq b'i jun rutzil iwach, yix chi ix jutzob'aj re i Qaqajaw Dios xaq i Ajwal Jesucristo chila pa tinimit Tesalónica. I Qaqajaw Dios, xaq i Ajwal Jesucristo chkiya ni utzil chomal chiwe, xaq i utz laj olem.
Tioxinik che i Dios
2Lik arewi kqatioxij che i Dios piwi yix iwonojel, are kojlapan ru' Ire, xaq lik kixk'un chqak'ux. 3Lik arewi kixk'un chqak'ux are kojlapan ru' i Qaqajaw Dios, chi yix lik i aljinsam ukub'ib'al ik'ux che i Ajwal ru' wach taq i ki'ano. Xaq i aljinsam ukub'ib'al ik'ux che i Jesucristo are ix o pa k'ax i kiwoy-ej i qajwal Jesucristo, chwach i Qaqajaw Dios. 4Yix, ix wachalal chwach i Cristo, i Dios k'ax kixuna'o, xaq qeta'am chi ix ucha'om. 5Man are yoj xqab'ij utzij i Dios k'ak' chiwe, are ti to' qachi' yoj xb'in i utz laj tzij le, lik o ucho'ab' i Lo'laj Utewal i Dios qu' are xqab'ij chiwe, xaq lik ru' k'iyal taq utz, Rumali, lik xqana qib' che wach xqa'ano, man anb'al re i utz chiwe yix, ile lik iweta'am yix.
6Xaq xi'an yix pacha xiwil chqe yoj, xaq pacha xu'an i Ajwal Jesucristo. Qatzij ile, man are xita wach xqab'ij chiwe, lik kixkikotik xikojo tupu lik xitij i k'ax rumal. I kikotemal le, lik are Lo'laj Utewal i Dios xyaw chiwe. 7Lik utz i xi'ano; xe'eloq chi xaq i jub'an qachalal chila pa Macedonia xaq pa Acaya xkita utzijol wach i utz xi'an yix xaq keje ile xki'an chik ike. 8Rumali chi i utzij i Ajwal ya paxsam chik rumal wach i'anom yix. Xwi ti chila pa Macedonia i Acaya, xaq xpax utzijol chwach ronojel i jyub' ta'aj rumal wach i'anom yix; lik qonojel keta'am chik wach ukub'ib'al ik'ux yix che i Dios, rajwaxik ti chik chi yoj kqab'ij. 9Are ike kkib'ij chqe yoj wach i qak'ulaxik xi'an yix are xixqasolij. Xaq kkib'ij chqe wach ro'taxik kan i tiox xi'ano are xixterej chrij i Dios; kkib'ij chi keje ile xi'ano are xijeq ukojik u'ij i Dios k'aslik, i Dios chi lik saqil. 10Xaq kkib'ij chqe chi yix lik ik'ak'alim chik uk'unik i Jesús chikaj, chi Uk'ojol i Dios chi xaq xuwalijsaj che i kamik; xaq are Ire kojuto ni chwach i nim laj tojpen chi kk'unik.
Currently Selected:
1 Tesalonicenses 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
