गलातियों 4
4
1मैं उदारण दीभेरन यो समझूछूँ, कि च्योलो अपून बबा की जैजाद को मालिक हुछो, लेकिन जब तक उ नानो बच्चाई छै, तब तक उमें और एक दास के फरक नै हुनो। उको ऐल तक येमें अधिकार नाहातिन हालाँकि उ, उ सब चीजून को मालिक बनोलो जो उक बबा को छै। 2जब तक बबा का द्वारा तय करिना को बखत नै ऊँनो, तब तक उ च्योलो ईजा-बबा और देखभाल करूनवाला का अधिकार का अधीन रूछो। 3उसीकैं, जब मसीह का द्वारा हमून छुड़ून है पैलि हम नानतिनान का नियाती छ्या, तब हम यो संसार का कुछ रीति-रिवाजून को पालन गुलामून की नियाती करछ्या। 4लेकिन जब सही बखत आछ जैकी योजना परमेश्वर ले बनाईना छी, त परमेश्वर ले खुद अपून च्याला का यो संसार में भेजछ्य, और उले आदिमी रूप में जन्म लीछ। उ एक यहूदी परिवार में पैद भ्योछ और मूसा का नियम-कानून का पालन करछ्यो। 5ताकि उ हमून आजाद कर सकौ, जो मूसा का नियम-कानून का अधीन जीवन जीनै रूछ्या, और उले हमून अपून नान्तिनान का रूप में गोद ली लीछ। 6क्याखिनकि हम उक बच्चा छा येक कारण परमेश्वर ले अपून च्याला का आत्मा स हमार दिलून में भेजभेरन, जो परमेश्वर स “हे अब्बा! हे बबा!” कैभेरन ध्द्यूनू। 7येक कारण अब तुम गुलाम नाहातिन, लेकिन परमेश्वर के नान्तिना छा। और अगर तुम परमेश्वरा का नान्तिना छा, त तुमून उ सब कुछ मिलोलो जो परमेश्वर ले अपून नान्तिनान दीना को वादा करिना को छै।
विश्वासीन की मण्डली खिन पौलुस की चिन्ता
8जब तुम परमेश्वरे स नी जाण छ्या, उ बखत तुम उन चीजून का गुलाम छ्या, जो परमेश्वर नाहातिन। 9लेकिन अब त तुमोरो रिश्ता परमेश्वरा का दगाड़ बन ग्योछ, मैंस यो कुंन चैछो कि परमेश्वर ले यो रिश्ता की शुरूवाद तुमार दगाड़ कर हालछ्य, त तुम उन कमजोर और बेकार शिक्षान का गुलाम बनून खिन क्याखिन वापस जान मरैछा? क्या तुम दुबारा फिर उनार गुलाम बनून चाछा? 10मैं यो सुणून मरयूँ कि, तुम जो गैर-यहूदी विश्वासी छा, यहूदी लोगून का खास दिनून में, मैंनान का, मौसमून का और सालून का त्यारून यो सोचभेरन मनूछा कि परमेश्वर इनूनले खुश हुछो। 11जो कुछ तुम करून मरेछा उक कारण मैंस डर छै, काँई इसो नै हो कि जो-जो मेहनत मैंले तुमून खिन करिना की छै उ बेकार नै होज्यौ।
12हे म्यारा विश्वासी भाईयों, मैं तुमूनथैं बिनती करछूँ, कि अपूनास नियम-कानून भटे आजाद करा, जसीकैं मैंले करछ्य। क्याखिनकि मैं नियम-कानून भटे उसीकैं आजाद हो गयूँ जसीकैं तुम गैर-यहूदी आजाद भैछा, तुमूनले निकी देखभाल करछय। 13लेकिन तुमून याद होलो, यो एक बिमारी का कारण छ्यो कि मैं पैलि बार तुमार पास सुसमाचारो को प्रचार करून खिन आयू। 14क्याखिनकि मैं बिमार छ्यूँ, और मेरि बिमारी को कारण तुम भौत परेशानी में छ्या। लेकिन फिरले तुमूले मैंखिन नफरत नै करि और नै मैंस दूर करछ्य। लेकिन तुमूले म्योरो आदर और निकी देखभाल करछ्य, यो इसो छ्यो जसीकैं कि तुम परमेश्वरा का स्वर्गदूत को या यीशु मसीह का आदर करछा। 15तो तुमेरि उ खुशी अब काँ गै? मैं सच्ची में यो कै सकछूँ कि तुम मैंखिन कैले कर सकछ्या; अगर हो सकनो त तुम अपून आँखान ले निकालभेरन मैं दी दीना। 16त क्या तुम थैं सच बोलना का कारण मैं तुमोरो दुशमन हो गयूँ? 17उन लोग जो यहूदी नियम-कानून में जोर दीनान, उन तुमून अपून दल में शामिल करून खिन पुरी कोशिश करनै रूनान, लेकिन भल मक्शद खिन नै; उनोरो मक्शद त तुमून मैं भटे अलग करना को छै ताकि तुम उनार शिष्य बन जा। 18हमेशा निका मक्शद खिन जल्दी बाजी करून ठीक नै हुनो, केवल उ बखत तक नै जब तक मैं तुमार दगाड़ रूछूँ।
19हे म्यारा विश्वासी भाईयो, जसा तरीका एक स्यैनि नानतिना स जन्म दीन बखत तखलीफ महसूस करछी, उसीकैं मैं एक बार फिर तुमून खिन तखलीफ महसूस करून मरयूँ। मैं यो तखलीफ तब तक रूलो जब तक तुम मसीह का विश्वास में मजबूत नै हो जाना। 20मैं चाछूँ, कि अब तुमार दगाड़ रू, ताकि मैं तुमूनथैं नम्र तरीका ले बात कर सकूँ। क्याखिनकि मेरि समझ में नै ऊँनो कि मैं तुमूनथैं कि कुँ।
सारा और हाजिरा को उदारण
21और तुम, जो मूसा का नियम-कानून का अधीन हुना चाछा, मेरि बात सुणा। मैं तुमून बतुलो कि मूसा का नियम-कानून की किताब में कि लिखीना को छै। 22पवित्रशास्त्र में यो लिखीना को छै कि, अब्राहम का द्वी च्याला छ्या। उको एक बच्चा को जन्म हाजिरा भटे भ्योछ, जो एक दासी छी। और दुसारा बच्चा को जन्म सारा भटे भ्योछ, जो उकी घरवाली छी। 23दासी को च्योलो, आदिमी का इच्छा का अनुसार एक साधारण बच्चा का नियाती पैद भ्योछ। लेकिन उ बच्चा जो उकी घरवाली भटे पैद भ्योछ, उ अब्राहम का दगाड़ परमेश्वरो को वादा का अनुसार भ्योछ।
24इन द्वीवै स्यैनि की तुलना द्वी वादान भटे करि जा सकछी। उ वादा जो परमेश्वर ले इस्राएल का लोगून का दगाड़ सीनै पहाड़ में करिना को छ्यो, उ दासी हाजिरा की नियाती छी। उ उन बच्चान जन्म दीछी जो गुलाम बननान। 25हाजिरा सीनै पहाड़ स देखूछी जो अरब देश में छै। उ आज क यरूशलम शैहरा का नियाती छै जो अपूना बच्चान सहित गुलाम छन। 26लेकिन सारा की तुलना उ यरूशलम शैहर भटे करि जा सकछी जो स्वर्ग में छै। साराई छै जो अब हमून खिन एक ईजा की नियाती छै क्याखिनकि उ एक दासी नी छी, और हम मूसा का नियम-कानून को पालन करून भटे आजाद छा। 27क्याखिनकि पवित्रशास्त्र में लिखीना को छै,
“हे स्यैनियों तुम जिनारा कभै नान्तिना भ्याई नै
और जिनुले नान्तिना जन्म दीना की पीड़ स कभै महसूस नै कर्यो,
खुश हो, और जोर-जोरले जय-जैकार करा,
क्याखिनकि त्यागीना की स्यैनि की सन्तान सुहागन स्यैनि की सन्तान भटे ले ज्यादा छन।”
28हे म्यारा विश्वासी भाईयों, हम इसहाक का नियाती छा, क्याखिनकि हम परमेश्वरा का वादा का अनुसार पैद भ्या, और परमेश्वरा का सन्तान बन ग्यान। 29लेकिन अब तुमून उन लोगून का द्वारा सताई जान मरछा जो चानान कि तुम मूसा का नियम-कानून को पालन करा, उसीकैं जसीकैं इश्माएल उ नान्तिनो जो आदिमी का योजना का अनुसार पैद भ्योछ उले इसहाक स सताछ।
30लेकिन येक बारिमें पवित्रशास्त्र कि कुंछो? “दासी और उको च्याला स दूर भेज दी, क्याखिनकि दासी को च्योलो बबा की जायजात को हक्कदार नै हुन चैनो, बबा का जायजात को हक्कदार उई च्याला स हुन चैछो, जो उई घरवाली भटे पैद भ्योछ।” 31येक कारण हे म्यारा विश्वासी भाईयों, हम दासी स्यैनि का नन्तिना नाहातिन, जिनून मूसा का नियम-कानून को पालन करना की जरूरत छै। लेकिन हम उ स्यैनि का नन्तिना छा, जो बबा की घरवाली छै और अपून विश्वास का कारण परमेश्वर स ग्रहणयोग्य छन।
Currently Selected:
गलातियों 4: SORNT
Highlight
Share
Copy
Want to have your highlights saved across all your devices? Sign up or sign in
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
