कुलुस्सियून 3
3
1येक कारण जब तुम मसीहक दगाड़ मरिनान में भटे ज्यून चीजून की इच्छा करनै रौ, जो परमेश्वर ले तुमून खिन स्वर्ग में राखिना की छै, जा मसीह यो बखत परमेश्वरा का दैन तरफ विराजमान छै। 2संसार का चीजून में नै पर स्वर्गीय चीजून की इच्छा करनै रौ, जो परमेश्वर ले तुमून खिन स्वर्ग में राखिना की छै। 3क्याखिनकि तुम त अपून पापी स्वभाव में मर गैछ्या, और तुमोरो नय्या जीवन मसीह का दगाड़ परमेश्वर में लुकीना को छै। 4जब मसीह, जो तुमून नय्या जीवन दीछो, जब उ यो संसार में वापस आलो, तब तुमूले उक दगाड़ आला और तुम उकी महिमा में भागीदार होला।
पुरानो जीवन और नय्या जीवन
5येक कारण अपून उन कामून छोड़ दी जो तुमार पापी स्वभाव भटे जुड़िनाक छन, जो संसार में छन, मतलब व्यभिचार, अशुद्धता, दुष्कामना, बुरी इच्छा और लोभी जन बना जो मूर्ति पूजा का बराबर छन। 6क्याखिनकि लोग इन बुरा कामून करनान, येक कारण परमेश्वर जरूर इन लोगून कड़ी सजा द्योलो। 7और तुम ले जब इन बुराईन में जीवन बितूछ्या, त तुम ले योई बुरा काम करछ्या। 8लेकिन अब तुम ले इन सबून मतबल गुस्सा, गुस्सा वाला ब्यहार, बैर-भाव, निन्दा और मुँख भटे गाली बकूनो, यो सारा बुरा काम छोड़ दी। 9एक दुसारा थैं झूठ जन बोला, क्याखिनकि तुमून ले अपूनो पुरानो पापी स्वभाव और सारा बुरा कामून छोड़ हैछ। 10और अब तुमले नय्या स्वभाव पा हैछ, यो नय्या स्वभाव ज्यादा है ज्यादा अपून बनून वाला परमेश्वर नियाती हो जाछो और येक कारण उ निकीकैं समझोलो। 11उमें नै त यूनानी और यहूदी का बीच फरक रियो, नै यहूदी का बीच, नै खतना, नै खतना रहित, नै परदेशी, नै जंगली, नै दास और नै गुलाम रियो, केवल मसीह सबून है महान छै, जो हम सबून में रूछो।
12येक कारण परमेश्वर ले तुमून अपून पवित्र लोग हुन खिन चुनिना को छै और तुमून प्रेम करछो, भौत करूणा, और भलाई, और दीनता, और भौत नम्र स्वभाव और खुद में सहन करना की ताकत राँखा। 13और अगर कैसे कैमें दोष लगूना को केले कारण हो, त एक दुसरा की सह ली, और एक दुसरा का अपराध माफ करा; जसा प्रभु ले तुमार अपराध माफ कर्यान, उसीकैं तुमूले करा। 14लेकिन सबून है ठूली बात यो छै, कि आपस में एक दुसरा थैं प्रेम भाव राँखा। इसो करभेरन तुम पुर तरीका ले एकजुट हो जाला। 15उ शान्ति जो मसीह दीछो ऊस अपून दिल में राजा करून दी। क्याखिनकि तुम सबै एक्कै शरीरा का अंग छा और येक कारण तुमून एक दुसरा का दगाड़ शान्ति रून खिन बुलाई ग्योछ और हमेशा परमेश्वरो को धन्यवाद करनै रौ। 16हर बखत तुम मसीह का बचनून का बारिमें सोचनै रौ, ताकि जो कुछ ले करछै और सोचछै, ऊस काबू में राँखा। और भौत समझदारी ले एक दुसरा स सिखा, और सलाह दी, और अपून-अपून मन में धन्यवाद करभेरन परमेश्वर खिन भजन किरतन और आत्मिक गीत गानै रौ। 17तुम बोलून में, या काम में जेके ले करछा सब प्रभु यीशु का नाम ले करा, और उक द्वारा पिता परमेश्वरो को धन्यवाद करा।
मसीह परिवार खिन नियम
18हे घरवालीयो, तुमून अपून घरवाला का अधिकार में रून चैछो क्याखिनकि प्रभु यीशु में विश्वास करून वालान इसो करून ठीक ले छी। 19हे घरवालो तुम अपून घरवाली का दगाड़ प्रेम राँखा, और उनार दगाड़ निको ब्यवहार करा। 20हे नान्तिनो, तुम सब बातुन में अपून-अपून ईजा-बबा हुकमून को पालन करा, क्याखिनकि प्रभु इनी बातुन ले खुश हुछो। 21और हे ईज-बाबो, अपून नान्तिनान बार-बार तंग जन करा, काँई इसो नै हो कि उनोरो दिल टुटी जौ। 22हे दासो, मेरि सलाह यो छै कि तुम सारी बातुन में उन लोगून को हुकमो को पालन करा, जो यो संसार में तुमार अधिकारी छन। उनार नियाती नै, जो आदिमीन खुश करनू खिन इसो करनान, लेकिन परमेश्वरा का डर में और सच्चाई में करा, 23और जेके ले तुम करछा, ऊस पुर दिल ले करा, यो समझभेरन कि लोगून खिन नै लेकिन प्रभु खिन करछा। 24याद राँखा कि प्रभु यीशु मसीह तुमून ईनाम द्योलो, जो यो छै कि उ तुमून आशीषून में हिस्सा द्योलो जिनून उले अपून सब लोगून खिन तैयार करछय। तुम जो मालिक सेवा करून मरेछा उ मसीह छै। 25क्याखिनकि जो बुराई करछो, परमेश्वर ऊस सजा द्याला, परमेश्वर वाँ केको ले पक्षपात नी करोलो।
Currently Selected:
कुलुस्सियून 3: SORNT
Highlight
Share
Copy
Want to have your highlights saved across all your devices? Sign up or sign in
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
