प्रेरितून का काम 19
19
इफिसुस नगर में पौलुस
1जब अपुल्लोस कुरिन्थुस नगर में छ्यो, पौलुस पाहाड़ी इलाकान भटे हुनै इफिसुस नगर पुजिछ्य। वाँ ऊस कुछ शिष्य मिल्यान। 2उले उनूनथैं क्योछ, “जब तुमूनले प्रभु में विश्वास करून शुरू करछ्य तो क्या तुमूनले पवित्र आत्मा पाछी?” उनूनले क्योछ, “नै, हम येक बारिमें के नै जाणना।” 3फिर पौलुसले उनूनथैं क्योछ, “त तुमून को तरीका को बपतिस्मा लीछ?” उनूनले क्योछ, की हमून ले उ बपतिस्मा लीछ जो “यहूना दी छ्यो।” 4पौलुसले उनूनथैं क्योछ, “यहूना ले उन लोगून बपतिस्मा दीछ, जिन लोगून ले अपून पापून को पश्चाताप करभेरन परमेश्वरा का तरफ मुड़ ग्या लेकिन उले इस्राएली लोगून थैं क्योछ की उन यीशु में विश्वास राखून जो उको बाद उनवालो छै उ मसीह छै।” 5यो सुणिभेरन उनूनले प्रभु यीशुक नामेंले बपतिस्मा लीछ। 6जब पौलुसले उनूनमें हात राँखछ्य, तब उनूनमें पवित्र आत्मा उतरछ्य, जेले उन अलग-अलग भाषा में बोलून और भविष्यबाणी करन लाग्यान। 7इन लगभग बारह आदिमी छ्या।
8येक बाद पौलुस तीन मैंन तलक हिम्मतले यहूदी सभाघर में जाभेरन यहूदी लोगून परमेश्वरा का राज्य को बारिमें प्रचार करछ्यो और उनून समझूनै रूछो। 9लेकिन उनूनमें भटे थ्वाड़ा लोग भौते जिद्दी छ्या और उनूनले इन बातुन में केले विश्वास नै कर्यो, और यहूदी सभाघर में सबून का सामुनि प्रभु की शिक्षाक खिलाफ में बोलून लाग्यान। येक कारण पौलुसै ले इनून छोड़ दीछ और विश्वासीन अपून दगाड़ लिग्योछ, और हर रोज परमेश्वरे की वचन की शिक्षा तुरन्नुसा का स्कूल में दीन लागछ्य। 10उले यो काम द्वी साल तलक इसीकैं लगातार करछ्य, आसिया प्रदेशा का सब रूनवाला क्या यहूदी क्या यूनानी सबून ले परमेश्वरो को बचन सुणछ्य।
11परमेश्वर ले पौलुसा का जरियाले चमत्कारक भौत अद्धभुत काम कर्यान। 12याँ तलक कि अगर कोई बिमार आदिमी पौलुस को रूमाल या तौलिया स ले छू लीछ्या, तब उन अपूनी बिमारी भटे चंगा हो जाछ्या। और लोगून में भटे भूत ले निकल जाछ्या।
13लेकिन झाड़-फुक करूनवाला कुछ यहूदी जो इथकैं-उथकैं घुमनै रूछ्या, और भूत लगिनाका लोगून में प्रभु यीशुक नामले यो कैभेरन कोशिश करून लाग्यान, “मैं तुमून यीशु की कसम दिलुछूँ यो आदिमी भटे भ्यार निकल जा जैको प्रचार पौलुस करछो।” 14और स्विकवा नामोको एक यहूदी प्रधान याजक का सात च्याला छै, जो इसो करछ्या।
15लेकिन भुतले उनूनथैं क्योछ, “मैं यीशुस जाणछूँ, और पौलुस स ले पछ्याणनू, लेकिन तुम को छा?” 16यो कैभेरन उ आदिमी जैमे भूत छ्यो, उ सबून जै लागछ्यो। उले इनेरि इसी हालत करि दीछ, कि उन सब नंगा और घायल है भेरन वाँ भटे भाजि ग्या।
17यो बात वाँक सब लोगून पत्तो चल ग्यो, और इफिसुस शैहरक यहूदी और यूनानी, सबून में डर छा ग्यो, और प्रभु यीशु की महिमा हुन लागछी। 18जिनूनले विश्वास करि राखछ्यो, उनूनमें भटे भौत लोगून ले आभेरन अपून बुर कामून खुलेआम मानछै। 19भौत जादू-टोना करून वालान ले अपून जादू-टोनाकी सबे किताब जाम करभेरन आग लगा दीछ। उन जालाईना की किताबून की कीमती पचास हजार चाँदी का सिक्का का बाराबर छ्या। 20इसीकैं वाँ परमेश्वरो को बचन तेजी ले फैलनै और उक असर लै बढ़नै ग्यो। 21इन सब बातुन का बाद पौलुसले मकिदुनिया और अखया प्रदेशा का बॉट भटे यरूशलम शैहर में जान को फैसला करछ्य। “उले क्योछ, यरूशलम शैहरा का बाद म्येरो रोम शैहर में जान होलो।” 22उले अपून दगड़ियान में भटे तीमुथियुस और इरास्तुसैस मकिदुनिया प्रदेश अपून है अघिल भेज दीछ, और खुद थ्वाड़ा दिनून तक इफिसुस नगर में र्योछ।
इफिसुस में उपद्रव
23उ बखत इफसुस नगर में पौलुसाक द्वारा प्रभुक बाटा की शिक्षा दिनाक कारण लोगून में भौत दंगा होग्यो। 24वाँ देमेत्रियुस नामोको एक सुनार छ्यो, जो अरतिमिस देबी की मन्दिर की चाँदी की मूर्ति बनू छ्यो और उक यो ब्यापार ले कारीगरून भौत फैद हुन मरेछ्यो। 25देमेत्रियुस ले इनून और इसा काम करूनवाला कारीगरून जाम करभेरन क्योछ, “हे भाईयों तुम सब जाणछा कि यो काम ले हमरि कतुक ज्यादा आमदनी हुंछी। 26लेकिन तुमूले देख-सुणन मरैछा, कि उ पौलुसले केवल इफिसुस शैहर मेंई नै लेकिन आसिया प्रदेशा का सब गौंन का लोगून समझाछ और भरमा रैछ, कि हात ले बनाईनाक मूर्ति में ईश्वर नाहातिन। 27और अब केवल यो बातोको डर नै कि हमार यो कारोबार को मान-सम्मान जानै रौलो, बल्कि यो महान देबी अरतिमिस मन्दिर की शोभा खतम हो जालि। जो देबी की पुज आसिया प्रदेश और पुरो संसार करछो, उको नामो निशान मिट जालो!”
28यो सब बात सुणिभेरन लोगून रीस आगै, और उन जोर-जोरले कुन लाग्यान “इफिसियून की अरतिमिस देवी महान छै।” 29यो बात ले पुर नगर में हड़-बड़ाहट मचि गै। उन पौलुसक दगड़िया गयुस और अरिस्तर्खुस, मकिदुनिया प्रदेशा का रूनवाला जो पौलुसाक दगाड़ यात्रा में छ्या, पकड़ लीछ, और एक दगाड़ होभेरन रंगशाला में भाग ग्या। 30जब पौलुस भितर जाभेरन लोगून थैं बात करून चाछ्यो, लेकिन शिष्यून ले ऊस नै जान दीयो। 31आसिया प्रदेशा का हाकिमून में भटे ले उक मित्रून ले उक पास संदेश भेजछ्य और बिनती करछ्य, कि रंगशालाक भितर जाभेरन अपूनी जान स खतरा में नै डालून चैनो। 32उ सभा का भितर, सब लोग चिल्लान मरेछ्या कोई एक चीज खिन कोई दुसरी चीज खिन और कुछ लोगून पत्तो ले नी छ्यो हम किलै आरयाँ। 33तब थ्वाड़ा यहूदी लोगून ले सिकन्दर समझा भेरन भीड़ में अघिल कर दीछ। सिकंदरले अपून हात ले ईशार करभेरन लोगून का सामुनि बात करून चाछ। 34लेकिन जब उनूनले जाण लीछ कि उ यहूदी छै और उन यो ले जाणछ्या कि यहूदी लोग, मसीह लोगून की नियाती मूर्ति पूजा नै करना। त उनूनले उ बात स अनसुणी करभेरन द्वी घण्टा तक जोर-जोरले नारा लगूनै रियान, “इफिसियून की अरतिमिस देवी महान छै।”
35तब उ नगराक मंत्री ले भीड़ स शांत करभेरन क्योछ, पुर संसारा का लोग जाणनाकि “हे इफसुस शैहरा का लोग महान देबी अरतिमिस का मंदिरे की देख-रैख करून मर्यान और उकी मूर्ति आकाश भटे खितीनाकी छी। 36येक कारण क्या यो बात सांचि छी, तुमून शांत है जान चैछ्यो और बिना सोच-समझभेरन केले जन चैनो। 37तुम जिनून पकड़ भेरन याँ ल्या रैछा, उनूनले नै त मंदिरे स अशुद्ध और नै हमरि देवी की बुराई करछ्य। 38येक कारण अगर देमेत्रियुस और उक दगाड़क कारीगरून कैका खिलाफ शिकायत हो, तब येक खिन अदालत में जा सकनान, और वाँ उनोरो मुकदमा का फैसला करून खिन लोग छन, और उन उनार सामुनि अपून आरोप पेश कर सकनान। 39लेकिन अगर तुम के और बात का बारिमें जाणून चाँछ्या तब स्याना पंचूनकी सभा में फैसला करि जौ। 40मैंस डर छै की राज्यपाल पुर हंगामा का बारिमें सुणोलो की हम रोमी सरकार का खिलाफ बिरोध करना की कोशिश करूमर्या यो कारण ले हमून में दोष लागाई जाना को डर छै क्याखिनकि हम येक कोई ले ठीक-ठीक कारण नै बता सकना।” 41यो सब कैभेरन उले सब लोगून वाँ भटे भेजि दीछ।
Currently Selected:
प्रेरितून का काम 19: SORNT
Highlight
Share
Copy
Want to have your highlights saved across all your devices? Sign up or sign in
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
