1 थिस्सलुनीकियों 5
5
1हे म्यारा विश्वासी भाईयों, तुमून यो बतूना की जरूरत नाहातिन कि प्रभु यीशु कब दुबारा आलो। 2क्याखिन तुम खुद निकीकैं जाणछा, कि जसीकैं रात में चोर अचानक उछो, उसीकैं प्रभु यीशु ले दुबारा उनाको दिन होलो। 3जब सब लोग कौला, “अब त के डर बात नाहातिन, सब ठीक छै,” तब अचानक उनूनमें मुसीबत आ पड़ोलो, जसीकैं एक गर्भवती स्यैनिस नान्तिन हुना की पीड़ अचानक शुरू हुछी, उसीकैं उन उ ठूली मुसीबत भटे कसा तरीका ले नी बच सकाला। 4पर हे म्यारा विश्वासी भाईयों, तुम अन्यारो में नाहतिना कि प्रभु यीशु को दुबारा उनाको दिन तुमून में चोर का नियाती अचानक आ पड़ौ। 5क्याखिनकि तुम सब उज्याला की और दिनेकी सन्तान छा, और हम नै त राता का छा नै अन्यारा का सन्तान छा। 6येक कारण प्रभु यीशु में विश्वास नै करन्यावाला लोगून की नियाती पड़ीना का नै रूँन, बल्कि जागनै और सर्तक रया। 7क्याखिनकि जो पड़नान, उन रात कै पड़नान, और जो नशा करनान, उन रात मेंई करनान। 8पर हम जो दिना सन्तान छा, येक कारण हमून अपूना में काबू राँखून चैछो। विश्वास और प्रेम हमरि रक्षा करनान, जसीकैं कवच एक सिपाई रक्षा करछो। और मुक्ति एक इसी आश की उ टोप छै जो उनवाला अनन्त दण्ड भटे बचूछो। 9क्याखिनकि परमेश्वरले हमून येक कारण नै चुन रैछ अपून क्रोध ले हमून सजा दे, बल्कि हमून येक कारण चुन रैछ कि हम अपून प्रभु यीशु मसीह की जरियाले मुक्ति पा सका। 10उ हमून खिन येक कारण मरछ्य कि चाहे हम ज्यून रूँ या मरज्यू, जब प्रभु यीशु मसीह वापस आलो तब हम सब मिलभेरन उनार दगाड़ हमेशा ज्यून रै सका। 11येक कारण एक-दुसरा स हौंसला दी और एक-दुसरा स विश्वास में मजबूत हुन खिन मद्दत करा, जसीकैं तुम यो बखत करछा ले।
विश्वासीन की मण्डली स उपदेश
12हे म्यारा विश्वासी भाईयों, हम तुमूनथैं बिनती करनू, कि जो तुमून खिन कड़ी मेहनत करनान, प्रभु में तुमार अगुवा छन, और तुमून शिक्षा दीनान, उनोरो आदर करा। 13और जो काम तुमून खिन करनान येक कारण उनेरि इज्जत करा, और एक दुसरा का दगाड़ मेल-मिलाप ले रौ।
14हे म्यारा विश्वासी भाईयों, हम तुमून समझुनू कि जो आलसी छन उनून चेतावनी दी, और जो लोग डरफोक छन उनून हिम्मत दीया, और जो विश्वास में कमजोर छन उनेरि मद्दत करा, और सबून का दगाड़ धीरज ले बर्ताव करा। 15ध्यान राँखा, कि तुम बुराईन का बदला बुराई जन करा; पर हरेक विश्वासीन और सब लोगून खिन हमेशा भलाई काम करून तैयार रौ। 16हमेशा खुश रौ, 17और लगातार प्रार्थना में लाग रौ। 18हरेक हालात में परमेश्वरो को धन्यवाद करा, क्याखिनकि मसीह यीशु में तुमून खिन परमेश्वर की यो इच्छा छै। 19तुम अपून जीवन में पवित्र आत्मा स काम करून है जन रोका। 20परमेश्वरा का लोगून का द्वारा होईना की भविष्यवाणीन सुणभेरन अनादर जन करा। 21लेकिन हरेक बात की परख करा यो जाणून खिन कि उ परमेश्वरा का तरफ भटे छी या नाहातिन, जो निका बात छन उन बातुन ग्रहण करा। 22हर प्रकारा बुराई भटे दूर रया।
आशीर्वाद
23परमेश्वर जो शान्ति दीछो, खुद तुमून पुर तरीका ले पवित्र करोलो; और तुमेरि आत्मा, प्राण और शरीर स हमार प्रभु यीशु मसीह का वापस उन तलक पुर तरीका ले निर्दोष और सभाल भेरन राँखोलो। 24तुमोरो बुलून वालो विश्वासयोग्य छै, क्याखिनकि उ तुमून पवित्र हुन खिन बुलूछो, और उ तुमून पवित्र हुन खिन योग्य ले बनालो।
25हे म्यारा विश्वासी भाईयों, हमून खिन ले प्रार्थना करा 26और सब विश्वासी साफ मन ले गला लगाभेरन नमस्कार करा।
27मैं प्रभु का नामले हुकुम दीछूँ, कि यो चिठ्ठी सब विश्वासी भाईन पढ़भेरन सुणाई जौ।
28मैं प्रार्थना करछूँ, कि हमार प्रभु यीशु मसीह को अनुग्रह हमेशा तुमून में हुनै रौ।
Currently Selected:
1 थिस्सलुनीकियों 5: SORNT
Highlight
Share
Copy
Want to have your highlights saved across all your devices? Sign up or sign in
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
