Looma 7
7
Mukristo aka bunyanga ŋa busu bu Mikele
1Baana ba ngu, benu laamiikwayaaba ti mikele mili na matwala ŋa yulu a muutu ndulu ŋa nde akini monyi, mu toni ati benu laayaba Mikele. 2Ni mu buuna, Mikele mibaamwese ti mukaasu wu baakwele akangama na mulumi a nde, bu mulumi akini monyi. Ka tso mulumi kwidi, mukaasu ka bunyanga ŋa busu bu mukele wu kapfuuta nde na mulumi. 3Tso ŋa mulumi a nde akini monyi, nde aba mukadi a bahala likima, nde sa aba mukasu mayamba. Ka tso mulumi a nde kwidi, nde ka bunyanga ŋa busu bu mukele. Na nde uba mukadi a bahala likima, hwavele uba mukasu mayamba. 4Ni bumosi kaka benu baana ba ngu a me, benu lamiikwa ŋa busu bu Mikele bu lili itwadi na nyutu a Kristo. Ka bunuubu benu laaka ba muutu mukima, nde wuuna wu asuuhi ŋa hati la babaakwa, mana bisu a benu libutaani mbutu yimbwe ŋa busu bwa Nzambi. 5Eye, ŋa bisu laaba hutso lituma li imuutu, manzaala ma mabi ma Mikele myakatuma, maakabaasala mutso linyutu la bisu loosi, mana bisu lisala bisalu bi byubita bisu hu lipfu. 6Ka bunuubu, bisu a benu lika bunyanga ŋa busu bu Mikele, mu toni ati, bisu lili we babaakwa ŋa busu bu Mikele mi myakakotese bisu mu buviha. Mana bisu lisalila Nzambi hutso lituma li linyatihi li Livupu. Ka a husaali hutso lituma la tsikulu li mikele mibaasonehe ve.
Matwala ma lisumu na ma Mikele
7Buuna, hima luleelaani ti Mikele ni lisumu? Naana ubila ve! Ka Mikele ni mimyayabisi me lisumu ni hima. Mumbuli, me a hakiinzaaba linyungi ve, tso Mikele a myaleeli ve ti: «We a hanyungala ve#Pal 20.17; Pfu 5.21.» 8Ka bu lisumu lasiingama mu Mikele, lo libaabutala me manzaala moosi mamabi. Ni mu buuna, hwavele Mikele, lisumu la miikwa. 9Mu tangu a tsikulu, hwavele Mikele, me ambeedi monyi. Ka bu Mikele myayamonehele, lisumu li miibwebaha monyi, 10na me amiikwa. Na ma maayiila me, ni ti tumili yi yikiibita hu monyi, yabita me hu lipfu. 11Mu toni ati lisumu lasiingama mu tumili: lisumu laasoho me na laaduba me.
12Ni mu buuna, Mikele myomo mili mya ngidi, na tumili yili ya ngidi, ya tsiitsa na yi mbwe. 13Buni? Tumili yi yili yimbwe yimiikituha toni lipfu la me? Naana! Ni lisumu lili toni lipfu la me, mu usalila ma mabwe. Ni mu buuna, Mikele myasa ti bisu liyaaba buni lisumu laafulala bisiha byosi mu bubi.
14Eye, bisu liyaabi ti Mikele ubaamata mu Livupu la Nzambi.
Mudiingu wa hutso mutima
Ka me, me ndi muutu wu akolo wu baamiisumbasa we muviha mu lisumu.
15Me a humbaatsikaha ma me ndi mu upanga ve. Mambu ma me umbaatondo, me a mbaatsalila mo ve, ka mambu ma me ambele, ni maana ma me umbaapanga. 16Tso me umbaapanga mambu ma me apeletondo, buuna me ndi mu utsiinga ti Mikele mili mi mibwe. 17Bunuubu, a ni me ndi mu upanga buuna ve, ka ni lisumu li lili mu me lili mu utuma me.
18Ka me nzaabi ti, mambu ma mabwe mali mu imuutu hya me hi hyaakolo hiniihi. Eye, me na nzala uvanga mambu ma mabwe, ka me a handi na mifudi mi ukuhasa mo ve. 19Eye, me a hambaapanga mambu ma mabwe ma me umbaatondo ve, ka me umbaapanga mambu ma mabi ma me apeletondo. 20Tso me paangi ma me apeletondo, a me ndi mu upanga buuna ve, ka ni lisumu li lili mu me, lili mu utuma me.
21Me miitsikaha bunuubu: ŋa mbuha yi me tondi uvanga mambu ma mabwe, me ubaavanga ndulu mambu ma mabi. 22Hutso matsimi ma mutima a me, me ndi na kinya mu matumili ma Nzambi. 23Ka me ndi mu umono hutso linyutu la me, tumili kima yi yibaalwanisa tumili yi buyedi bwa me bubaasilasa. Yo yili mu ukitusa me kondaayi mukele lisumu wu li mu me. 24Me ndi mu lingebe! Na uyobolo me mu linyutu mo liniili, li lili mu ubita me hu lipfu? 25Lifutalaani matondo huli Nzambi mu Yisu Kristo Pfumu a bisu!
Mu ukuka, mu buyedi bwa a me, me hutsina lituma li Mikele mya Nzambi me ndi, ka mu ikolili hi imuutu hya me, me ndi muviha mukele lisumu.
Currently Selected:
Looma 7: TSA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
Looma 7
7
Mukristo aka bunyanga ŋa busu bu Mikele
1Baana ba ngu, benu laamiikwayaaba ti mikele mili na matwala ŋa yulu a muutu ndulu ŋa nde akini monyi, mu toni ati benu laayaba Mikele. 2Ni mu buuna, Mikele mibaamwese ti mukaasu wu baakwele akangama na mulumi a nde, bu mulumi akini monyi. Ka tso mulumi kwidi, mukaasu ka bunyanga ŋa busu bu mukele wu kapfuuta nde na mulumi. 3Tso ŋa mulumi a nde akini monyi, nde aba mukadi a bahala likima, nde sa aba mukasu mayamba. Ka tso mulumi a nde kwidi, nde ka bunyanga ŋa busu bu mukele. Na nde uba mukadi a bahala likima, hwavele uba mukasu mayamba. 4Ni bumosi kaka benu baana ba ngu a me, benu lamiikwa ŋa busu bu Mikele bu lili itwadi na nyutu a Kristo. Ka bunuubu benu laaka ba muutu mukima, nde wuuna wu asuuhi ŋa hati la babaakwa, mana bisu a benu libutaani mbutu yimbwe ŋa busu bwa Nzambi. 5Eye, ŋa bisu laaba hutso lituma li imuutu, manzaala ma mabi ma Mikele myakatuma, maakabaasala mutso linyutu la bisu loosi, mana bisu lisala bisalu bi byubita bisu hu lipfu. 6Ka bunuubu, bisu a benu lika bunyanga ŋa busu bu Mikele, mu toni ati, bisu lili we babaakwa ŋa busu bu Mikele mi myakakotese bisu mu buviha. Mana bisu lisalila Nzambi hutso lituma li linyatihi li Livupu. Ka a husaali hutso lituma la tsikulu li mikele mibaasonehe ve.
Matwala ma lisumu na ma Mikele
7Buuna, hima luleelaani ti Mikele ni lisumu? Naana ubila ve! Ka Mikele ni mimyayabisi me lisumu ni hima. Mumbuli, me a hakiinzaaba linyungi ve, tso Mikele a myaleeli ve ti: «We a hanyungala ve#Pal 20.17; Pfu 5.21.» 8Ka bu lisumu lasiingama mu Mikele, lo libaabutala me manzaala moosi mamabi. Ni mu buuna, hwavele Mikele, lisumu la miikwa. 9Mu tangu a tsikulu, hwavele Mikele, me ambeedi monyi. Ka bu Mikele myayamonehele, lisumu li miibwebaha monyi, 10na me amiikwa. Na ma maayiila me, ni ti tumili yi yikiibita hu monyi, yabita me hu lipfu. 11Mu toni ati lisumu lasiingama mu tumili: lisumu laasoho me na laaduba me.
12Ni mu buuna, Mikele myomo mili mya ngidi, na tumili yili ya ngidi, ya tsiitsa na yi mbwe. 13Buni? Tumili yi yili yimbwe yimiikituha toni lipfu la me? Naana! Ni lisumu lili toni lipfu la me, mu usalila ma mabwe. Ni mu buuna, Mikele myasa ti bisu liyaaba buni lisumu laafulala bisiha byosi mu bubi.
14Eye, bisu liyaabi ti Mikele ubaamata mu Livupu la Nzambi.
Mudiingu wa hutso mutima
Ka me, me ndi muutu wu akolo wu baamiisumbasa we muviha mu lisumu.
15Me a humbaatsikaha ma me ndi mu upanga ve. Mambu ma me umbaatondo, me a mbaatsalila mo ve, ka mambu ma me ambele, ni maana ma me umbaapanga. 16Tso me umbaapanga mambu ma me apeletondo, buuna me ndi mu utsiinga ti Mikele mili mi mibwe. 17Bunuubu, a ni me ndi mu upanga buuna ve, ka ni lisumu li lili mu me lili mu utuma me.
18Ka me nzaabi ti, mambu ma mabwe mali mu imuutu hya me hi hyaakolo hiniihi. Eye, me na nzala uvanga mambu ma mabwe, ka me a handi na mifudi mi ukuhasa mo ve. 19Eye, me a hambaapanga mambu ma mabwe ma me umbaatondo ve, ka me umbaapanga mambu ma mabi ma me apeletondo. 20Tso me paangi ma me apeletondo, a me ndi mu upanga buuna ve, ka ni lisumu li lili mu me, lili mu utuma me.
21Me miitsikaha bunuubu: ŋa mbuha yi me tondi uvanga mambu ma mabwe, me ubaavanga ndulu mambu ma mabi. 22Hutso matsimi ma mutima a me, me ndi na kinya mu matumili ma Nzambi. 23Ka me ndi mu umono hutso linyutu la me, tumili kima yi yibaalwanisa tumili yi buyedi bwa me bubaasilasa. Yo yili mu ukitusa me kondaayi mukele lisumu wu li mu me. 24Me ndi mu lingebe! Na uyobolo me mu linyutu mo liniili, li lili mu ubita me hu lipfu? 25Lifutalaani matondo huli Nzambi mu Yisu Kristo Pfumu a bisu!
Mu ukuka, mu buyedi bwa a me, me hutsina lituma li Mikele mya Nzambi me ndi, ka mu ikolili hi imuutu hya me, me ndi muviha mukele lisumu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.