Looma 13

Batumi bali mu usalila Nzambi

1Pasi muutu afwana uba hutsina lituma li baabyalisa. Mu toni ati, pasi lituma ubaamata huli Nzambi. Ni Nzambi ubaabyalisa batumi boosi. 2Ni mu buuna, woosi wu ubaabisala lituma, nde li mu ubisala lituma la Nzambi. Ba bali mu utelemene lituma, bo bali mu uteele tsuundusu ŋa yulu a bo mwakulu. 3Bunuubu, ba bali mu uvanga ma mabwe, utwala ubata boomo bu banzonzi ve, ka ni ba bali mu uvanga mamabi. Ka tso we a tondi uba na boomo bu batumi ve, buuna vanga ma mabwe. Lituma sa lisilasa we. 4Ka lituma lili mu usalila Nzambi mu libwe la we. Ka tso we li mu uvanga li libi, ba na boomo. Mu toni ati, a mu pu batumi bali na matwala ma usyembe ve. Lituma lili mu usalila Nzambi, mu umwese kesi a lo huli muutu wu li mu uvanga bubi. 5Ni mu buuna, hwafwana mu uba hutsina lituma li batumi, a ndulu mu ubata kesi a Nzambi ve, ka na mu toni a tumili yi yili mu umata mu mutima.

6Ni mu buuna kaka, benu libaafuta limandu. Mu toni ati bakambi ba limandu bali hutsina lituma la Nzambi mu uvangimasa bu hwafwana iteesi mohiina. 7Futalaani huli pasi muutu hi hyahwama na nde: futaani limandu huli wu benu laafwana ufuta lo, na makesili makima ma lituma libaakamba, huli wu benu laafwana ufuta mo, muyusu huli wu benu laafwana uva muyusu, likiinzu huli wu benu laafwana uva likiinzu#Mat 22.17-21; Mlk 12.17; Luk 20.25.

Litondo li munawe

8A liba na mukanu a muutu ve, tso a ni mu utondosono benu na benu ve. Mu toni ati wu li na litondo mu bana li mu ukuhasa Mikele we bu hwafwana. 9Ni mu buuna, Mikele momiini: «A hasa mayamba ve, a haduba ve, a hayiba ve, a hasa linyungi ve», na mina myosi, myakukama mu mukuma mumosi ni wunuwu: «Tondo munawe we we mwakulu#Mba 20.13-17; Pfu 5.17-21; Lev 19.18 .» 10Wu ubaatondo, a habaasa li libi tso limosi huli munande ve. Ni mu buuna, litondo li munande ni ukuhasa hu Mikele myosi.

Uvangama mu nziili a Kristo

11Bu benu liyaabi mu ki tangu bisu a benu laaka, yiniyi ka ni tangu huli benu mu usuuha hutso a tolo. Nziili a Yisu#13.11 Nziili a Yisu Liina ni liyobolo li boosi bali mu ukeele. yaamiifula bebele, na ŋa bisu a benu laasidyani imiinu. 12Butsuhu bwaka lala, busi sa bukya. Nyaha litiimbaani mavanga ma bisu ma piipidi, na lilwataani bilwanili bi liyalala. 13Lidyataani mu mbiili yi yasungama, we bu hwafwana mu udyata ŋa nyangu. Linyahaani mikuungi mi udya, malaangi, bumbembo tso mbiili yimbi, mitsotso tso nyengi. 14Lwataani mbiili a Pfumu Yisu Kristo. A liduukala mbiili yi imuutu, mu uywatisa mapeyu ma nde ma mabi ve.

Currently Selected:

Looma 13: TSA

Highlight

Copy