Mataayi 9

Yisu miibeeloso ikata

Mlk 2.1-12; Luk 5.17-26

1Yisu akoti mutso a bootehe, abwesabuha dyanga, na afutihi hu musyenge#9.1 Mlk 2.1, Ŋaaniŋa ni Kapernahumi li mu umonehele we musyenge a Yisu. Utala kaka mu Mty 4.13. a nde. 2Baabehili nde ikata hi hyaba hyalambama ŋa mubabangu#9.2 mubabangu ibitili hi mubeedu buuve hya mvumbi.. Yisu amono imiinu hya bo, ni uleele huli ikata: «Hwada, mwana a me, masumu ma we bamiinyahula!» 3Ni buuna, milongisi mi Mikele mikima myalelisini: «Muutu mo wunuuwu miisafula Nzambi#Lev 24.16!» 4Yisu ayaabi matsimi ma bo, na nde aleeli: «Mu hima benu lili na matsimi mo ma mabi maniima? 5Hima hyafulala ulenge mu uleele: “Masumu ma we bamiinyahula”, buuve mu uleele: “teleme na takula”? 6Ka me tondi ti benu liyaaba liniili: Mwana a Muutu li na matwala mu unyahula masumu ŋa toto.» Buuna, nde aleeli huli ikata: «Teleme, volo mubabangu a we na futaha hu nzo a we!»

7Muutu mo atelimi na ayeni hu nzo a nde. 8Bu makonge ma baatu maamoni buuna, mo maaluuli mu boomo na maayusi Nzambi bu haaviidi matwala ma bunuubu huli baatu.

Yisu miiteele Mataayi na miidya na ba baasumaha

Mlk 2.13-22; Luk 5.27-32

9Bu Yisu hamati ŋaana, nde amoni bahala limosi nduhi Mataayi, laatsahala mu nzo isalu yi bakaambi ba limandu. Yisu aleeli nde: «Duukala me!» Mataayi atelimi na aduukili nde. 10Hu mbisa, bu Yisu haaba ŋa metse mu udya hu nzo Mataayi, bakaambi ba limandu ba balahi na baatu ba baasumaha, baayatsahala ŋa metse na Yisu na bayihi ba nde. 11Bafarisi bamono buuna, ni uleele bayihi ba Yisu: «Mu hima Mulongisi a benu ali mu udya na bakaambi ba limandu na baatu ba baasumaha?» 12Bu Yisu haayuhi ma bo baaleeli, nde akaali: «Babeedu ni basahi bangaanga, a batsiitsa ve. 13Yenaani yayihaani mbindulili a mambu mo maniima: “Me ndi mu utondo kwili lingebe, ka a piili bungodu#Ose 6.6 ve.” Mu tooni ati, Me a hanzandanda batsiitsa ve, ka me anzandanda ba baasumaha.»

Yisu ŋa busu bwa ndiili ikaandi

Mlk 2.18-22; Luk 5.33-39

14Titswene bayihi ba Yowani mutondihi baayasusaha huli Yisu na uleele nde: «Mu hima bisu na Bafarisi libaadya ikaandi taangu yoosi, ka bayihi ba we a bubaadya hyo ve?» 15Yisu ni ufutala bo: «Benu litsimi ti baatu ba baalanda hu mukungi a kwele, utwala uba mu lingebe bu mulumi akini ŋa hati la bo? Ka mu bilumbu bya hu busu taangu yili, yi buumasa bo mulumi, na buuna bo sa badya ikaandi.

16A hu li na muutu wu ubaalondo ikutu hi ikulu mu ireende hya tsanda yi nyatihi ve. Kini, ireende hi inyatihi hyubwekasula tsanda yikulu. Buuna, vulu luubwefulala bunene. 17A bubaasyeholo malamu ma tsohele mutso mirumbu mi mikulu ve, kini malamu ma tsohele muubula mirumbu. Buuna, na malamu, na mirumbu, byosi byunyambahana. Ka baafwana usyeholo malamu ma tsohele mutso mirumbu mi minyatihi, mu tooni uswehe mo bubwe.»

Yisu miibeeloso mukaasu na miisuula nuumba mu lipfu

Mlk 5.21-43; Luk 8.40-56

18Bu Yisu haakaleele bo mambu mo maana, mukuutu Bayudaayo mumosi ayidi, ayakongemene ŋa busu bwa Yisu, na ayayiini: «Mwana a me wu mukaasu miimana muvumu. Yaanga yaasuusala nde kaka la we, mana nde aba moonyi!»

19Yisu atelimi, na aduukili nde na bayihi ba nde. 20Mukaasu mumosi wu makila maakapuuha umata bilima kuumi na byole, ayaasusaha hu mbisa a Yisu na abeembi tsoso ikutu hya nde. 21Mu tooni ati, nde akatsima hutso mutima a nde: «Tso me mbeembi ndulu ikutu hya nde, me tsa mbeeloho.» 22Yisu akinguha, na amono nde, nde ni uleele: «Hwada mwana a me wu mukaasu, imiinu hya we hi miiyobolo we.» Masulubete, mukaasu abeeluhi. 23Bu Yisu hayato hu nzo a mukuutu Bayudaayo, nde amoni basihi ba mavetso baaba baamiivangama mu ndiihili, na koonge a baatu ba baaba mu muyunga. 24Nde aleeli bo: «Palaani, mu tooni ati nuumba mukaasu a haakwa ve, nde tolo ali.» Ka baatu baakakwede nde. 25Bu Yisu hakoti mutso a nzo, nde abingi koonge a baatu yi yaaba muuna. Nde akaangi nuumba mu kaka, na nuumba atelimi. 26Tsangu yaatsamuhi mu itaanzi mo hiina hyoosi.

Yisu miibeeloso binzimana byole

27Bu Yisu hamati ŋaana, binzimana byole byakaduukala nde na ubaafulaha: «Kwila bisu lingebe, Mwana a Davidi!»

28Bu Yisu hayato ŋa nzo, binzimana byayasusaha huli nde. Na Yisu afuuli byo: «Benu lili na imiinu ti me utwala uvanga buuna?» Byo byafutili nde: «Eye, Pfumu.» 29Buuna Yisu abeembi miisu mya byo na aleeli: «Nyaha buba we bu hu li imiinu hya benu!» 30Na miisu mya byo myadibumi. Yisu akebisi byo bunuubu: «Kelaani, muutu tso mumosi a hayaaba mambu mo maniima.» 31Ka byo byayatsala tsangu a Yesu mu itaanzi mo hiina hyoosi.

Yisu miibeeloso iduka

32Bu bo baatelimi mu uyene, baatu baabehili Yisu muutu mumosi wu aba iduka, mu tooni ati, nde aba na livupu la tengo. 33Bu Yisu habingi tengo, iduka hyatoyi. Baatu baakimuhi na baakaleele: «Bisu kini a laamoni dyambu la pila yiniiyi mu Isereli ve!» 34Ka Bafarisi baakaleele: «Ni mukuutu matengo li mu uva nde matwala ma ubinga matengo mo maniima!»

Yisu miimonele baatu lingebe

35Yisu akataangila misyenge myosi na mala. Nde akalongese mu manzo ma bo ma lisambulu li Bayudaayo. Nde akayabisa Musamu wu Mubwe wu Ipfumu hi mayulu. Nde akabeeloso mabeedu moosi na bipiha byosi.

36Nde aluuli mu lingebe, bu nde hamoni makonge ma baatu, ba baaba baamiikolo, na ba hiitu hyaba hyamiifwa, we mameme ma maavele a keedi. 37Buuna, nde aleeli huli bayihi ba nde: «Isalu hi utsonzehe mbutu a mu ngundu hili hiinene, ka basali bali ba bakeehe#9.37 Maniima mali mu uleele ti, baatu baamiivangama mu usa imiinu mu Yisu. Ka baatu a bali ba banzuhisini mu ubita bo hu Ipfumu ve.. 38Ni mu buuna, vondwaani pfumu isalu hi utsonzehe mbutu, mana nde abwetsindaha basali mu ngundu a nde.»

Currently Selected:

Mataayi 9: TSA

Highlight

Copy

Compare