Mataayi 27

Yisu bamiibita huli Pilaato

Mlk 15.1; Luk 23.1-2; Yow 18.28-32

1Ŋa tsumba a ngwali, bakuutu ba bangaanga ba Nzambi boosi na mikukunyungu mya buli li Bayudaayo, baakutili Yisu pfuundu mu uduba nde. 2Bu baatumi uhwenye nde mikudu, bo baabiti nde na baayehuli nde huli Pilaato, pfumu itaanzi.

Lipfu la Yuda

Mav 1.18-19

3Buuna, Yuda wu ayehuli nde, ayuha ti Yisu miiyaka tsyembili yi lipfu, anyongi na ayafutala maku matatu ma makuta ma mbongo ma nde haavoli, huli bakuutu ba bangaanga ba Nzambi na huli mikukunyungu. 4Nde aleeli huli bo: «Me miitsa lisumu mu uyeholo muutu wu avele na tooni!» Ka bo baafutili nde: «Maana a matali bisu ve! Liina dyambu la we!» 5Titswene, Yuda abumi mbongo mu nzo a Nzambi, ayeni na ayaleleme.

6Bakuutu ba bangaanga ba Nzambi baatoli mbongo na baaleeli: «Mukele a bisu a hali mu uva bisu muswa mu usuusa mbongo mo yiina mutso iswehili hya mu nzo a Nzambi ve. Mu tooni ati, yo yili kaluha yi makila#27.6 kaluha yi makila mbongo yi bubaabaha mu uduba muutu..» 7Hu mbisa uyuhasana mu mbongo mo yiina, bo baasuumbi ngundu yi muyuhi madiiha, mu usa mapeembe ma byenyi#Zak 11.12-13. 8Ni mu buuna, bali mu uteele ngundu mo yiina natee lolo yiniiyi, «ngundu yi makila». 9Buuna, ma mumbihuli Yelemiya haayabisi maayelimini: «Bo baavoli maku matatu ma makuta ma mbongo. Liina ni lifunu li baana ba Isereli baakesi mu nde. 10Na baasalili yo mu usuumba ngundu yi muyuhi madiiha, we bu Pfumu haatumi me#Yel 18.2-3; 19.1-2; 32.6-15.»

Pilaato miiva byuhu huli Yisu

Mlk 15.2-5; Luk 23.3-5; Yow 18.33-38

11Baabiti Yisu ŋa busu bwa pfumu itaanzi, wu aviidi nde byuhu: «We ni mutumi Bayudaayo?» Yisu afutili: «We miileele lo.» 12Titswene, ŋa bakuutu ba bangaanga ba Nzambi na mikukunyungu baakesi nde mu matooni ma malahi, nde a haafutili dyambu ve. 13Buuna, Pilaato abwefuula nde: «We a hafutili isiha ve? We li mu uyuha matooni moosi ma bali mu ukese we?» 14Ka Yisu a haafutili nde mvutu tso mosi ve. Ni mu buuna, pfumu itaanzi haakimuhi.

Yisu miiyaka tsyembili yi lipfu

Mlk 15.6-15; Luk 23.13-25; Yow 18.39–19.16

15Mu pasi mukungi a Paake, pfumu akanyahula ikondaayi imosi, hi koonge yaakavondo. 16Kaahu, hwaaba na bahala limosi li laaba laayabahana, nduhi [Yisu] Barabasi#27.16 [Yisu] Barabasi mihanda mikima myavusahana nduhi ya Yisu.. 17Buuna, Pilaato afuuli huli koonge a baatu: «Na benu litoondi ti me nyahulala benu, [Yisu] Barabasi vo ti Yisu wu bubaateele Masiya?» 18Pilaato aba ayaaba bubwe-bubwe ti bo baayehuli nde Yisu, mu nyengi. 19Bu Pilaato haaba haatsahala mu nzo a tsundusu, mukadi a nde atsindihi nde iluumbi mu uleele: «A haakoto mu dyambu la bahala mo liniili li laasungama. Mu tooni ati, butsuhu mo bunuubu me moni pasi yindahi mu ndoosi mu tooni a nde.»

20Bakuutu ba bangaanga ba Nzambi na mikukunyungu, baatumbisi koonge a baatu mu uvondo linyahula la Barabasi na ndubili a Yisu. 21Pfumu itaanzi abwefuula bo ti: «Na, mu bo baboole benu litoondi ti me nyahula?» Bo baafutili: «Barabasi!» 22Pilaato aleeli bo: «Ka hima me utsa mu Yisu wu bali mu uteele Masiya?» Bo boosi baafutili: «Komene nde ŋa kuruwa!» 23Pilaato afuuli: «Ka ki dyambu lilibi nde haasa?» Na bo baabwesinzafulaha: «Komene nde ŋa kuruwa!»

24Bu Pilaato haamoni ti nde a huubwetwala usa pasi isiha ve, na bu muyungu haafulili, nde avoli mamba, aswaahi myoho mya nde ŋa busu bwa koonge a baatu. Nde aleeli: «Lipfu la muutu mo wunuuwu a lili mu utala me ve! Lo lili dyambu la benu!» 25Koonge yoosi yaafutili: «Nyaha pepo yi lipfu la nde yibwa ŋa yulu a bisu, na ŋa yulu a baana ba bisu!» 26Buuna Pilaato anyahuli bo Barabasi. Nde amana utuma ufwinza Yisu bikooti, nde ayehuli nde mana bayakomene nde ŋa kuruwa.

Masadaadu mali mu ukwede Yisu

Mlk 15.16-20; Yow 19.2-3

27Masadaadu ma pfumu itaanzi maabiti Yisu hu ibaanga hya nde. Mo moosi maadiingi Yisu. 28Mo maaduuli nde bikutu, na maalwatisi nde libita li libeenge. 29Titswene, mo maavaangi ibudu hi matsyende, hi mo maasuusi ŋa yulu mutswe a nde. Mo maasuusili nde litsootso ŋa hooho hwa nde hwa mbahala. Hu mbisa, mo maatsokimi ŋa busu bwa nde, na maakakwede nde, na ubaaleele: «Bwehe, mutumi Bayudaayo!» 30Mo maakatuula nde maate. Mo maakavolo litsootso mo liina na ubaatete nde lo mu mutswe. 31Bu mo maamani ukwede nde, mo maaduuli nde libita li libeenge, maalwatisi nde bikutu bya nde. Titswene, maabiti nde mu uyakomene nde ŋa kuruwa.

Yisu bamiikomene ŋa kuruwa

Mlk 15.21-28; Luk 23.26-43; Yow 19.16-24

32Mu palili a mu musyenge, masadaadu maabwani na bahala limosi, musi Kilene, nduhi a nde Simoni. Mo maakwihisi nde kuruwa a Yisu. 33Mo maatoodi ŋa mbuha yi bubaateele Ngolongota, mbindulili ti: «Mbuha yi Ibanga hi Mutswe». 34Huuna, mo maaviidi Yisu vinye yi baapfuuta na bya kali bahaa#Mkg 69.22. Yisu abiimbi, ka a haatoondi unywa ve.

35Masadaadu maakomini nde ŋa kuruwa, na maakabisini bikutu bya nde hu mbisa uta ngodo mu byo. 36Titswene, mo maatsahili ŋaana mu ukeelese nde. 37Ŋa yulu a kuruwa a nde, baabandihi itini hya baya. Mu baya mo liina, mo maasonihi tooni ya tsyembili a nde yiniiyi: «Wunuuwu ni Yisu, mutumi Bayudaayo.» 38Masadaadu maakomini kaka baataani boole ŋa kuruwa ŋa pedu a Yisu: mumosi ŋa mbahala a nde, wuna ŋa kaasu.

39Bapyohi-nzila baakatuha nde na ubaanyingasa mitswe#Mkg 22.8 mya bo. 40Bo baakaleele: «We wu utsala nzo a Nzambi na wu ubwetuunga yo mu bilumbu bitatu, yoboho we mwakulu tso we li Mwana a Nzambi, na sutaha mu kuruwa!» 41Bumosi kaka, bakuutu ba bangaanga ba Nzambi, milongisi mi Mikele na mikukunyungu, baakakwede nde na ubaaleele: 42«Nde afuuhisi baatu bakima, ka nde a huutwala ufuuhasa nde mwakulu ve! Nde ni mutumi Isereli? Buunubu, nde ni asutaha mu kuruwa! Buuna bisu luusa imiinu mu nde. 43Nde amiisa hiitu mu Nzambi, na ubaaleele: “Me ndi Mwana a Nzambi.” Tso Nzambi atondo nde, nyaha nde afuuhasa nde mu taangu mo yiniiyi#Mkg 22.9!» 44Baataani ba baakomini itwadi na Yisu ŋa kuruwa, baakatuha kaka nde pila mosi.

Lipfu la Yisu

Mlk 15.33-41; Luk 23.44-49; Yow 19.28-30

45Umata mwangulu natee ngunga yi matatu ya hu mbisa a mwangulu, piipidi yaabwiidi mu tsi yoosi. 46Bebele na ngunga yi matatu ya hu mbisa a mwangulu, Yisu afulihi mu ndaha yi mifudi: «Eli, Eli, lema sabakatani?» Mbindulili ni ti: «Nzambi a me, Nzambi a me, tooni ma we siisi me siha#Mkg 22.2 ?» 47Bamosi mu ba baabeedi ŋaana, baayuhi nde na baakafulaha: «Nde mumbihuli Eliya ali mu uteele!» 48Mumosi mu bo ayeni tiinu mu uyavolo mukamuna, abwadihi nde mu vinye a nganyi, akatisi nde ŋa tsoso litsootso. Titswene, nde alabili Yisu mukamuna, mana nde aviva vinye#Mkg 69.22. 49Ka bakima baaleeli: «Keelaani limonwaani tso Eliya uyaafuuhasa nde!»

50Yisu abwefulaha ileele hi mifudi, na amani muvumu. 51Ndulu mu taangu mo yiina, nguumbu ya mbuha ya Ngidi#Pal 26.31-33, yaakasuhi mu bibadi byole, umata hu yulu natee hu tsina. Toto yaanyingimi, mamanya maapasihi, 52mangila maadibumi, na manyutu ma baatu ba balahi ba baakwiidi, ba baaba baakangama mu Nzambi, maasuuhi mu babaakwa. 53Bo baapali mu mangila, na hu mbisa a tsuuhili a Yisu mu babaakwa, bo baakoti hu Yeruselemi, musyenge a ngidi, hu baatu ba balahi baamoni bo.

54Bu masadaadu ma maakakeelese Yisu, na mukuutu a mo baamoni toto mu unyingama na moosi ma maabwiidi, bo baamoni boomo bu bulahi. Bo baaleeli: «Mbuli, wunuuwu beedi Mwana a Nzambi!» 55Bakaasu ba balahi baaba ŋaana na baakatala hu lilalala. Bo baakaduukala Yisu umata hu Ngalili#27.55 umata hu Ngalili ni ti, umata mbandihili isalu hya Yisu., mu ubaakumbasa nde. 56Ŋa hati la bo, hwaba na Mariya musi Magadala, Mariya ngu wa Yaki na Yosefi, na ngu wa baana ba Zebedayi.

Nyutu a Yisu bamiisuusa mu ngila

Mlk 15.42-47; Luk 23.50-56; Yow 19.38-42

57Tsitsaha bu yaatoodi, hwayidi isina imosi musi Arimate#27.57 Arimate musyenge wu li bebele na Yeruselemi hu Noode ya Wesete, mu biveve bi mataka maku matatu na bitaanu., nduhi Yosefi. Hyo kaka hyaaba muyihi a Yisu. 58Hyo hyayamono Pilaato na hyavondi nde nyutu a Yisu. Buuna, Pilaato atumi mu uva nyutu a Yisu huli Yosefi. 59Yosefi avoli nyutu ya Yisu, afuungili yo lileeso la liino li linyatihi, 60na nde asuusi yo mu ngila a nde yi nde haatumisi uvaha hutso a manya li linene. Titswene, nde abungimisi manya likima mu udibuha munywa a ngila, na nde ayeni. 61Mariya musi Magadala na Mariya makima, baaba ŋaana, baatsahala ŋa masungimini ma ngila.

Keelisili a ngila a Yisu

62Mu ilumbu hi hyaduukili pangimini a saba, bakuutu ba bangaanga ba Nzambi na Bafarisi, baayeni mu itwadi huli Pilaato. 63Bo baaleeli: «Pfumu, bisu likini mu uyibuhala moonyi ti iyahudi mo hiniihi, ŋa hyo hyabeedi kini moonyi, hyaleeli ti: “Hu mbisa bilumbu bitatu, me tsa tsuuha.” 64Ni mu buuna, tumasa bayakeelese ngila a nde natee mu ilumbu hi bitatu. Tso a buuna ve, kini bayihi ba nde buuyayiba nyutu a nde na uleele: “Nde miisuuha mu babakwa.” Mapfuta mo maana kini muuvyohelele iteesi na matsomi.» 65Pilaato aleeli bo: «Monwaani masadaadu ma muukeelese ngila. Yenaani yakeelesaaani yo we bu hu li matsimi ma benu.» 66Bo baayeni mu uyavangimasa keelisili a ngila. Bo baasiidi iliimbu mu manya li idibuhu hya ngila, na baasuusi bakeedi.

Currently Selected:

Mataayi 27: TSA

Highlight

Copy

Compare