Mataayi 21

Kotili a Yisu hu Yeruselemi

Mlk 11.1-10; Luk 19.18-44; Yow 12.12-19

1Bu bo baaba bebele a Yeruselemi, na bo baatoodi ŋa Betefaze#21.1 Betefaze bula bu buli hu Esete isyelo hi miti mya olive, mu litangu li bakilometere hoole mu uto hu Yeruselemi; isyelo hi miti mya olive ni ikuundala hi hili hu Esete a Yeruselemi; ŋa hati hu li na mbeenge a Kederoni., hu tsyelo isyelo hi miti mya olive, Yisu atsindihi bayihi boole, 2na aleeli bo: «Yenaani hu bula bu buli hu busu bwa benu. Benu sa limono ibubuuru na mwana ibubuuru baakutala. Nyangulaani byo na behelaani me byo. 3Tso muutu leeli benu pasi dyambu, futalaani nde bu: “Pfumu li na nzala a byo.” Na masubete, muutu sa anyaha byo biyene.» 4Buuna bwavangimi, mana mambu ma mumbihuli matswiha:

5«Leelaani huli nuumba a Syoni#21.5 nuumba a Syoni Baatu ba Yeruselemi.:

Mono, mutumi a we aka muuya huli we,

wu aluula na bulembo, avaata ŋa yulu a buuru,

ŋa yulu ibubuuru, mwana a buuru wu mukadi#Zak 9.9».

6Bayihi baayeni na baasiidi we bu Yisu haatumi bo. 7Bo baabehi buuru wu mukadi na ibubuuru, bo baasuusi ŋa yulu a byo bi byole, bikutu bya bo na baatsahisi Yisu ŋa yulu a ibubuuru. 8Koonge a baatu yaayali biyunga bya bo mu nzila. Bakima baakesi mangemvu, na baakasuusa mo mu nzila#2Pf 9.13. 9Baatu ba baakayene ŋa busu bwa Yisu na ba baakaduukala nde, baakafulaha: «Osana, Mwana a Davidi! Nyaha Nzambi asyeme nde wuuna wu miiya mu nduhi a Pfumu! Osana#21.9 Osana mbindulili ni ti: «Yaanga hu likumbasa la bisu» (Mkg 118.25) dyambu mo liniili aka dyambu la kinya, na ileele hi muyusu., hu hati mayulu!»

10Ŋa Yisu haakoti hu Yeruselemi, musyenge woosi anyingimi na baakaleele: «Wunuuwu na ali?» 11Koonge a baatu ba baakayene na Yisu, baafutili: «Nde ni Yisu mumbihuli, musi Nazareti hu Ngalili.»

Yisu miibingisa banga mafwanda ba mu nzo a Nzambi

Mlk 11.15-19; Luk 19.45-48; Yow 2.13-17

12Yisu akoti mu litandala la nzo a Nzambi, nde abingisi basuumbisi na basuumbi boosi babaaba mu nzo a Nzambi, nde atakuli metse ma ba baakasa sanzi na mambuha ma basuumbisi ba mabembe. 13Titswene nde aleeli bo: «Baasonehe: “Nzo a me sa bateele yo nzo lisambulu.” Ka benu lamiikitusa yo murali a biibi#Esa 56.7; Yel 7.11.»

14Binzimana na banga matsode, baayasusaha huli Yisu mu litandala la nzo a Nzambi, na nde abeelusi bo. 15Ka bakuutu ba bangaanga ba Nzambi na milongisi mi Mikele, baamoni bubi mu bimangu bi nde hasiidi, na baana ba bangebe baakafulaha mu litandala la nzo a Nzambi: «Osana! Muyusu huli Mwana a Davidi!» 16Bo baaleeli Yisu: «We li mu uyuha ma bo bali mu uleele?» Yisu afutili bo: «Eye, benu kini a laataangi mambu mo maniima ve: “We asiidi ti tso bangebe, bikenyi bayuusa we#Mkg 8.3”?» 17Titswene, nde asiisi bo na apali mu musyenge mu uyene hu Betanya hu nde haavyosi butsuhu.

Yisu miisyembe muti a fiinge

Mlk 11.12-14,20-24

18Ŋa ngwali, mu taangu yi Yisu haaba mu ufutaha hu musyenge, nzala yaakaangi nde. 19Nde amoni mufiinge#21.19 mufiinge muti wu ubaabuta mbuutu yi bubaateele ti bafiinge. mumosi ŋa muvanga a nzila, nde ayasusaha ŋa pedu a nde, nde amoni ndulu makaya na makaya. Buuna, nde aleeli huli muti: «We a hukaabwebuta libutu tso limosi ve!» Masulubete, mufiinge akanyi. 20Bayihi bamono buuna, baakimuhi na baafuuli Yisu: «Buni mufiinge mo wunuuwu amiikanya mawasa mo maniima?» 21Yisu afutili bo: «Mu mbuli me ndi mu undeele benu, tso benu lili na imiinu na benu livelisa paha, benu a luusa ndulu mambu ma me miitsa mu mufiinge ve, ka benu utwala utuma isyelo mo hiniihi: “Mata ŋaana, na yabwa hutso mubu”, na buuna sa buvangama. 22Tso benu lili mu usa imiinu, benu luuyaka byosi bi benu luuvondo mu lisambulu.»

Lituma la Yisu huni laamati?

Mlk 11.27-33; Luk 20.1-8

23Yisu ayeni hu nzo a Nzambi, na abaandihi ulongese. Bakuutu ba bangaanga ba Nzambi na bakuutu ba Bayudaayo baayasusaha bebele na baafuuli nde: «Muki lituma we ubaavanga mambu mo maniima, na ava we muswaa mu mo?»

24Yisu afutili bo: «Me kaka maapa benu ndulu idoodo imosi. Na tso benu liviidi me mvutu, me tsa ndeele benu muki lituma me umbapaanga mambu mo maniima. 25Tondihili a Yowani huni yaamati? Hu yulu vo huli baatu?» Ka bo baalelisini: «Bisu lileele ti: “Hu yulu”, nde sa afuula bisu: “Ka mu hima benu laavelisiila Yowani imiinu?” 26Na bisu a benu lifutalaani ti: “Huli baatu”, bisu a benu lafwana ubata boomo bwa koonge a baatu, mu tooni ati, baatu boosi ubaatsima ti Yowani aba mumbihuli.» 27Buuna, bo baafutili huli Yisu: «Bisu a liyaabi ve.» Na nde kaka aleeli bo: «Me kaka, me a ndeele benu mu ki lituma me umbapaanga maniima ve.»

Kuma a baana boole ba babahala

28Yisu abweleele: «Benu buni lili mu utsima mu kuma mo yiiniyi? Bahala limosi laaba na baana boole ba babahala. Nde a matuma watsomi na aleeli: “Mwana a me, yasala lolo hu ngundu a me ya vinye.” 29Nde afutili: “Naana, me mbisi hwa me,” ka hu mbisa, nde asobi matsimi na ayeni hu ngundu a vinye. 30Taata abwetuma waboole, na abweleele bumosi. Nde wunuuwu afutili: “Eye, taata, me aka mu dwe huuna,” ka nde a hayeni huuna ve. 31Na, mu baboole asiidi litondo la taata a nde?» Bayihi baafutili: «Watsomi». Na Yisu aleeli bo: «Me undeele benu: ni imbuli, batsonzihi ba limandu na malaala bamiiteehele benu hu Ipfumu hya Nzambi. 32Mu tooni ati, Yowani mutondihi ayidi huli benu mu ulaha benu nzila yi butsiitsa, na benu a laasili nde imiinu ve. Ka batsonzihi ba limandu na malaala baasili nde imiinu. Na tso bu benu laamoni maana, benu a laasobo na usa imiinu mu nde ve.»

Kuma basali ba mangundu ma vinye

Mlk 12.1-12; Luk 20.9-19; Esa 5.1-9

33Yisu abweleele: «Yuhaani kuma kima: hwaba na pfumu a nzo mosi wu akuni ngundu yi miti mya vinye. Nde adiingi yo muumbu, nde avahi inyihili hya mbutu a vinye, na atuungi nzo yi mutaabu mu bakeedi. Titswene, nde asiisi ngundu huli basali ba mangundu ma vinye, na nde ayeni hu mudyenge. 34Bu taangu yi utsonzehe mbutu a vinye yatoodi, nga ngundu atsindihi basalili ba nde huli basali ba ngundu a vinye mana bo bava la nde kabu li muhunu a ngundu. 35Ka basali ba ngundu a vinye baakaangi basalili mo baana, baabeeti mumosi, baadubi wuna na baalangi wu mutatu mu mamanya mu uduba nde. 36Buuna pfumu a ngundu a vinye atsindihi basali bakima ba baalutili batsomi mu bulahi. Ka basali ba ngundu baasiidi bo kaka we bu baasiidi batsomi. 37Hu tsukusu, nde atsindihi bo mwana a nde wa bahala, bu nde hatsimi ti: “Bo sa baakiinza mwana a me wa bahala.” 38Ka bu basali ba ngundu a vinye baamoni mwana a nga ngundu, bo baalelisini bo mo na bo mo: “Nde wu mbadi ni wu ubyalila mukobe! Tswendaani lidubaani nde, na bisu a benu sa libahaani mukobe a nde!” 39Buuna, bo baakaangi nde na baabumi nde hu mbadi a ngundu a vinye na baadubi nde.»

40Titswene, Yisu afuuli bo: «Ŋa pfumu a ngundu a vinye huuya, nde hima huusa mu basali ba ngundu a vinye mo baana?» 41Bo baafutili nde: «Nde sa aduba bitsuuya mo biina hwavele lingebe la bo, na sa asoombese ngundu a nde a vinye huli basali bakima ba buukaava nde mbutu mu taangu yi yafwana.»

42Titswene, Yisu aleeli bo: «Benu a laamaataanga dyambu mo liniili mu Mabasonehe ma Ngidi ve?

“Manya li batuungi baabumi,

laaka manya la talu li itungu.

Pfumu ni wu asa buuna,

na lo ni dyambu la kimuhili ŋa miisu ma bisu!#Mkg 118.22-23”»

43Yisu abweleele: «Ni mu buuna, me ndi mu undeele benu ti sa bapatula benu Ipfumu hya Nzambi, na sa bava hyo huli baatu ba bukabaabutasa hyo mbutu. [44Pasi nde wu ubwa ŋa yulu a manya mo liina sa asumbaha, na tso lo libwidi ŋa yulu a muutu, lo sa lihesolo nde.]»

45Bakuutu ba bangaanga ba Nzambi na Bafarisi bu baayuhi makuma ma Yisu, baatsikihi ti nde mu bo haakatoyo. 46Buuna, bo baakasaha manzila ma ukaanga nde, ka bo baabati boomo bwa koonge a baatu ba baakamono Yisu we mumbihuli.

Currently Selected:

Mataayi 21: TSA

Highlight

Copy

Compare