Yaki 2
2
Uvelesa buraandu
1Baana baa ngu a me, a laapfuuta buraandu na imiinu hi lili na hyo mu Pfumu a bisu a benu Nga Muyusu, Yisu Kristo ve. 2Monwaani: isina imosi hyalwata mulunga a wolo na bikutu bi bibaamwedeme. Hyo hiyakoto mutso libundu la benu. Humbisa a kotili a nde, iyaha kaka hiyakoto na bikutu bya mbindu. 3Bu benu lili mu utaasila wu alwata bikutu bi bibaamwedeme, benu lu uleele nde: «We, tsahala ŋa mbuha yi likiinzu yi!» Ka benu lu uleele huli iyaha: «We, baa mu tele ŋana!» Buuve: «Tsahala hu tsina isuusili hya me hya milu!» 4Ni buuna kaka, benu lili mu usa buraandu ŋa hati la benu mwakulu. Benu lili banzonzi banga matsimi ma mabi.
5Yuhaani baana ba ngu a me baa litondo, Nzambi asooli biyaha bya ŋa toto, mana byo biba bisina mu imiinu. Bisina mu imiinu byuba babahi baa mukobe a Ipfumu hi Nzambi hasiidi nzuhisini, huli baa bubaatondo nde. 6Ka benu limiikumba iyaha! A li buni! Bisina ti ni bi bili mu ukwamisa benu, na ubita benu mu manzo ma tsundusu. A ni buuna ve? 7Ni byo bili mu ubaya nduhi yi likiinzu, ya nde wuuna wu uli Pfumu a benu.
8Ubamono ti benu likuhisi mukele Ipfumu hya Nzambi, we bu baasonehe mu Muhanda a Ngidi: «We utondo muna a we, we we mwakulu#Lev 19.18.» Tso benu lisiidi buuna, benu livaangi bubwe. 9Ka tso benu libaamweese buraandu, benu lili mu usa lisumu. Na benu laamiikwayaaba ti laamiidyata Mikele mya Nzambi. 10Ka tso muutu li mu udukala mikele myosi, na bwidi ndulu mu inzandi imosi ŋa hati li mikele, nde miibwa mu mikele myosi. 11Ni mu buuna, Nzambi wu aleele ti: «A hasa mayamba ve», aleele kaka ti: «A haduba ve#Pal 20.13-14». Tso we velisa mayamba, ka we li mu uduba, we li mutsali Mikele. 12Ka toywani na dyataani we baatu ba bu uyaka tsundusu, hu tsina mikele mi bunyanga. 13Mu tooni ati, tsundusu yili yi yavele na lingebe, huli baa bubaavelemweese lingebe. Fula-fula lingebe libaabingala tsundusu.
Imiinu hi hyavele na mavaanga hili hi hyakwa
14Baana baa ngu a me, ki kaluha yili huli muutu mu ubaaleele ti: «Me ndi na imiinu», tso nde a hali mu umweese mavaanga ma mabwe ve? Imiinu hya buuna, utwala ufuuhasa nde ve. 15Monwaani: mwaana a ngu buuve kedi veli na hi ulwata, na kondiini byudya bya pasi ilumbu. 16Mumosi mu benu leeli nde: «Yene mu hyenze, lwata ikutu hya piyu, na dya bubwe!» Tso nde leeli buuna, hwavele uva nde bi nde ali na byo nzala mu linyutu, tsoongo a mambu mo maana ki yo? 17Ni bumosi kaka mu imiinu. Tso hyo a hili na mavaanga ma mabwe ve, hyo hili hi hyakwa.
18Ka muutu aleele: «We li na imiinu; me ndi na mavaanga.» Mweese me imiinu hya we, hwavele mavaanga. Na me, mu mavaanga ma me, me umweese we imiinu. 19We li mu usa hiitu ti, Nzambi ndulu mosi? Maana ni mambu ma mabwe. Matengo kaka mali na hiitu mo hiina, na mo mali mu utsula likamba.
20Ka we, itsuudu mo hinihi, we afwana uyaba ti imiinu hi hyavele na mavaanga ma mabwe, hili hya mu pu! 21Nzambi asilisi Abrahami kaaha a bisu a benu. Nde amoni nde muutu wu akuha mu tooni mavaanga ma mabwe, bu nde hayayeholo mwaana a nde Isaki mu bungodu ŋa yulu a diiku la tsuhili bungodu. 22We li mu umono ti, imiinu hya nde hyakayene butsiitsa na mavaanga ma nde. Ni mu mavaanga mo maana, nde hakuhisi imiinu hya nde. 23Ni buuna hwavangimi Mabasonehe mu Mabuuku ma Ngidi: «Abrahami asiidi hiitu mu Nzambi, na Nzambi amoni nde wu akuha mu imiinu hya nde#Mba 15.6.» Na Nzambi ateeli nde mbaahi a nde. 24Benu lili mu umono ti, ni mu mavaanga muutu ubaamonehele wu akuha, ka ndulu a mu imiinu ve.
25Bumosi kaka Rahabi, mukaasu nga mayamba, amonihili wu akuha ŋa busu bwa Nzambi, mu mavaanga ma nde. Mu tooni a bu nde hayaki biluumbi#2.25 biluumbi baatu ba Yosuwa hatsindihi mu uyakete tsi a Kanana Yos 2.1-21. , na bu hafutili byo mu nzila kima. 26Ni we bu nyutu yi yavele na iluunzi, yili yi yakwa, bumosi kaka, imiinu hi hyavele na mavaanga ma mabwe, hili hi hyakwa.
© (Active), Wycliffe Bible Translators, Inc. All rights reserved.